Search form

Éxodo 10

Tachi Akꞌõrepa Egipto pidaarãmaa sisi chokꞌara pëida

1Maapꞌeda Tachi Akꞌõrepa Moisemaa mãgaji:

—Waya Faraonmaa wã́ji. Mɨa iru, poro waibɨarã ichi jua ekꞌari beerã ome kꞌɨɨrɨ kꞌisuapiji mɨ jua ãramaa unupi kꞌinia bairã. 2Ichiaba mãga ooji pɨa nepɨrɨmerã pɨ warrarãmaa mãikꞌaapa pɨ ãichakꞌeerãmaa sãgá mɨa Egipto pidaarã oo iru baji mãikꞌaapa ãchi tꞌãide mɨa ne–inaa ooda; ne–inaa eperãarãpa pꞌoyaa oodakꞌaa ãchi juadoopa. Mãgá parãpa kꞌawaadaitꞌeeda aji, mɨta Tachi Akꞌõre.

3Mãpai Tachi Akꞌõrepa Moisés, Aarón ome waya Faraonmaa pëiji.

Mãganajida:

—Tachi Akꞌõre, tai hebreorã Akꞌõre Waibɨapa nãga jara pëiru: “¿Sãapai pɨa ooitꞌeema mɨa jara bɨkꞌa? Mɨ eperãarã pëipáde a bɨ, mɨmaa ɨtꞌaa tꞌɨ̃nadamerã. 4Maa–e pɨrã nu sisi pëiitꞌee pɨ eujã jõmaade. 5Audú chokꞌara chedaitꞌee perã, eujã unuda–e paitꞌee. Ne–uu kꞌarra mãikꞌaapa pakꞌuru hielo baaidapa ãri–ee beeda jõmaweda kꞌokꞌoodaitꞌee. 6Parã Egipto pidaarã te sisipa ipurukꞌoodariitꞌee. Chonaarãpa unudapꞌedaa kꞌãyaara chokꞌaraara paraaitꞌeeda” a bɨ.

Mãga jarapꞌeda, Moisés, Aarón ome Faraón palaciodeepa uchiajida.

7Mãpai poro waibɨarã Faraón jua ekꞌari beerãpa mãgajida:

—¿Sãapai jã eperãpa tachi ichiakꞌau bɨitꞌeema? Israelitaarã pë́iji ãchi Akꞌõre Waibɨa apatamaa ɨtꞌaa tꞌɨ̃nadamerã. ¿Pɨa kꞌawa–e bɨkꞌã ajida, tachi eujã jõdai wã?

8Mãpai Faraonpa waya jara pëiji Moisés, Aarón ome chedamerã. Ãra pachedakꞌãri, irua mãgaji:

—Wã́tɨ Tachi Akꞌõre, pãchi Akꞌõre Waibɨamaa ɨtꞌaa tꞌɨ̃de. ¿Kꞌairãta wãdaitꞌeema? aji.

9Moisepa pꞌanauji:

—Jõmaweda wãdaitꞌee; chonaarã, wẽraarã, warrarã paara, Tachi Akꞌõre–itꞌee fiesta oodaitꞌee perã. Tai ovejaarã, chivoorã, pꞌakꞌaarã paara ateedaitꞌeeda aji, Tachi Akꞌõre–itꞌee paadaitꞌee.

10Mamĩda Faraonpa mãgaji:

—¿Mɨ kꞌũradaitꞌee kꞌĩsia pꞌanɨkꞌã? ¿Wãara ijãa pꞌanɨkꞌã pãchi Akꞌõre Waibɨapa parã kꞌaripa cheitꞌee? ¿Kꞌĩsia pꞌanɨkꞌã mɨa parã jõmaweda pëiitꞌee? 11¡Mãga–epɨ! Ɨmɨkꞌĩraarã aupai pëiyada aji, wãara wã kꞌinia pꞌanɨ pɨrã ɨtꞌaa tꞌɨ̃de Tachi Akꞌõremaa.

Mãga jarapꞌeda, Faraonpa jaraji poro waibɨarã ichi jua ekꞌari beerãmaa Moisés, Aarón ome ichimãiipa jëretꞌaadamerã.

12Mamĩda Tachi Akꞌõrepa Moisemaa mãgaji:

—Jua ɨapáde aji, Egipto eujã ɨ̃rɨ sisi chokꞌara chedamerã mãikꞌaapa kꞌokꞌoodamerã ne–inaa kꞌarra hielo baaikꞌãri piuda–e padapꞌedaa.

13Moisepa mãga ooji. Ichi pakꞌuru anipapariida ɨakꞌãri, Tachi Akꞌõrepa nãu pꞌuapiji oriente eereepa, ãstaawa, pꞌãrikꞌua pida. Mãgá aɨ norema sisi chokꞌara Egipto eujãde nɨ̃ba cheji. 14Egipto eujã jõmaade chokꞌara baai chejida. Chonaarãweda eperãarãpa waide mãgá sisi chokꞌara unudakꞌaa paji mãikꞌaapa Egiptode waa mãga unudakꞌaa paitꞌee. 15Eujã pꞌoyaa unudakꞌaa paji ma sisi kꞌaurepa. Ne–uu kꞌarra hielo baaidapa ãri–ee beeda jõmaweda kꞌokꞌoojida, nejõ, kꞌiru mãikꞌaapa pꞌũajara wẽe beerumaa.

16Aramata Faraonpa Moisés Aarón ome atapiji mãikꞌaapa mãgaji:

—Mɨa wãara kꞌachia ooji Tachi Akꞌõre, parã Akꞌõre Waibɨamaa mãikꞌaapa parãmaa. 17Mɨa kꞌachia ooda waya perdonáatɨ mãikꞌaapa ɨtꞌaa tꞌɨ̃nadapáde aji, parã Akꞌõre Waibɨamaa na sisi ãyaa pëimerã.

18Moisés Faraonmãiipa uchiapꞌeda, Tachi Akꞌõremaa ɨtꞌaa tꞌɨ̃ji. 19Mãpai Tachi Akꞌõrepa nãu pꞌuapiji occidente eereepa ma sisi ateemerã Mar Rojodee.+ Maperã Egipto eujãde sisi apida bee–e paji. 20Mamĩda Tachi Akꞌõrepa Faraón kꞌɨɨrɨ kꞌisuapiji israelitaarã pëinaamerã.

Tachi Akꞌõrepa Egipto eujã pꞌãriupida

21Mãpai Tachi Akꞌõrepa Moisemaa mãgaji:

—Pɨ jua ɨtꞌaa ɨapáde aji, Egipto eujã jõma audú pꞌãriudaimerã eperãarã ãchobeedarutamaa.

22Mãga ooji. Ewari õpee Egipto eujãde audú pꞌãriu baji. 23Egipto pidaarã ãyaa wãdakꞌaa paji ãchi te ikꞌaawa pꞌanadapꞌedaarãmaa paara, pꞌoyaa unudakꞌaa pada perã. Jõdee Gosén eujãde mãikꞌaapa israelitaarã tede ɨ̃daa baji.

24Mãga nɨ̃bakꞌãri, Faraonpa Moisés waya atapiji mãikꞌaapa mãgaji:

—Wã́tɨ israelitaarã jõmaweda, pãchi warrarã paara, parã Akꞌõre Waibɨamaa ɨtꞌaa tꞌɨ̃de. Mamĩda parã ovejaarã, pꞌakꞌaarã ome atabëidapáde aji.

25Mamĩda Moisepa pꞌanauji:

—¡Mãga–epɨ! Pɨa tai ne–animalaarã paara pëiitꞌee, taipa peedamerã mãikꞌaapa paa jõpidamerã Tachi Akꞌõre, tai Akꞌõre Waibɨa–itꞌee. 26Tai ne–animalaarã jõmaweda ateedaitꞌee. Maarepida atabëida–eda aji, kꞌawada–e pꞌanadairã chisãgɨta Tachi Akꞌõre, tai Akꞌõre Waibɨapa taimaa paapiitꞌee.

27Mamĩda Tachi Akꞌõrepa Faraón kꞌɨɨrɨ kꞌisuapida perã, atꞌãri pëi kꞌinia–e paji. 28Mapa Faraonpa Moisemaa mãgaji:

—¡Mɨ kꞌĩrapite waa chenáaji! Waya cheru pɨrã, mɨa pɨ peepiyada aji.

29Moisepa pꞌanauji:

—Pɨa jara bɨkꞌa ooitꞌeeda aji. Mɨ waa che–eda aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index