Search form

Éxodo 11

Tachi Akꞌõrepa jarada Egipto pidaarã warrarã naapemaarã piupiitꞌee

1Tachi Akꞌõrepa Moisemaa mãgaji:

—Faraonmaa mãikꞌaapa Egipto pidaarãmaa awaraa ne–inaa kꞌachia ooitꞌee. Mãga ookꞌãri, Faraonpa parã uchiapiitꞌee mãikꞌaapa jaraitꞌee parã waa chenaadamerã. 2Mamĩda mɨa mãga ooi naaweda, jarapáde aji, israelitaarã ɨmɨkꞌĩraarãmaa, wẽraarãmaa paara netꞌaa nẽedee ooda, pꞌaratꞌadee ooda iidinadamerã ãchi te ikꞌaawa pꞌanapataarãmaa.

3(Maapai Tachi Akꞌõrepa Egipto pidaarã tꞌãri piapiji israelitaarã ome. Ma awara ma kꞌaurepa Egipto pidaarãpa, poro waibɨarã Faraón jua ekꞌari beerãpa paara Moisés tꞌo pꞌanajida.)

4Mãpai Moisepa Faraonmaa nãga jaraji:

—Akꞌõre Waibɨapa nãga jara bɨda aji: ‘‘Esapɨte mɨ Egiptode wãyaaitꞌeeda a bɨ. 5Mãgá wãyaa wãkꞌãri, Egipto pidaarã warra naapemaarã jõmaweda piudaitꞌee; Faraón warra naapemadeepa esclava chupɨriara bɨ kꞌũrumade nebapari warra naapema parumaa. Ãra ovejaarã, chivoorã, pꞌakꞌaarã paara naapɨara tꞌoda jõmaweda aukꞌa piudaitꞌee. 6Egipto eujã jõmaade eperãarã tꞌãri pꞌuapa jẽedaitꞌee. Egiptode waide mãga unudakꞌaa mãikꞌaapa waa mãga unudakꞌaa paitꞌee. 7Mamĩda israelitaarã tꞌãide eperãarã kꞌãiwee pꞌanadaitꞌee. Parã usaarã jida piruda–e paitꞌee ãra uchiadakꞌãri ãchi ne–animalaarã ome. Mãga pꞌasakꞌãri, parãpa kꞌawadaitꞌeeda a bɨ, mɨa israelitaarã piara akꞌɨpari Egipto pidaarã kꞌãyaara.’’

8Ma awara Moisepa mãgaji:

—Mãga pꞌasakꞌãri, poro waibɨarã pɨ jua ekꞌari beerã mɨ kꞌĩrapite bedabaidaitꞌee mãikꞌaapa chupɨria iididaitꞌee tai israelitaarã namãikꞌaapa wãdamerã. Mãga oodai naaweda, tai wã–eda aji.

Mãga jarapꞌeda, Moisés kꞌĩrau uchiaji Faraón palaciodeepa.

9Tꞌẽepai Tachi Akꞌõrepa Moisemaa mãgaji:

—Faraonpa parã pedee ijãa–e paitꞌeeda aji. Mãgá Egiptode mɨa waapɨara ooitꞌee ne–inaa eperãarãpa pꞌoyaa oodakꞌaa ãchi juadoopa.

10Moisepa Aarón ome ma ne–inaa jõmaweda oojida Faraón kꞌĩrapite Tachi Akꞌõrepa oopidakꞌa. Mamĩda Faraonpa israelitaarã Egipto eujãdeepa atꞌãri uchiapi–e paji, Tachi Akꞌõrepa iru kꞌɨɨrɨ kꞌisuapida perã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index