Search form

Éxodo 12

Tachi Akꞌõrepa jarada Pascua fiesta oo kꞌawaadamerã

1Tachi Akꞌõre Egiptode Moisés ome mãikꞌaapa Aarón ome pedeekꞌãri, mãgaji:

2—Año chaa na atane naapema parãdé paitꞌee. 3Israelitaarã jõmaarãmaa nãga jarátɨ: “Ewari diezde na atanede parã Israeldeepa uchiadapꞌedaa te chaadepema ɨmɨkꞌĩraarãpa atadaipia bɨ oveja chakꞌe wa chivo chakꞌe pipɨara bɨ. 4-5Ma oveja wa chivo año aba iru baipia bɨ mãikꞌaapa pi–ia baipia bɨ, maarepida anida wẽe. Parã tede pꞌanapataarãpa ma ne–animal kꞌodaipia bɨ, ɨa bɨda–ee. Parã tede chokꞌara–ee pꞌanɨ pɨrã mãikꞌaapa ma ne–animal jõmaweda pꞌoyaa kꞌoda–e pɨrã, jedekꞌodaipia bɨ parã te kꞌaitꞌa pꞌanɨɨrã ome. 6Ewari catorce wãyaarude parãpa ma ne–animalaarã pia akꞌɨdaipia bɨ. Ma ewate akꞌõrejĩru baaikꞌãri, israelitaarã te chaa parãpa ma ne–animalaarã peedaipia bɨ 7mãikꞌaapa chi waapa pꞌurudaipia bɨ pãchi tedepema puerta ɨ̃rɨ mãikꞌaapa aɨ ikꞌaawa, ma tede ma ne–animal kꞌodaitꞌee perã. 8Ma pꞌãrikꞌua parãpa paadaipia bɨ chi chiara kꞌodaitꞌee kꞌiru asia ome mãikꞌaapa pan levadura wẽe bɨ ome. 9Chi chiara maarepida õkꞌoo kꞌodaikꞌaraa bɨ. Ichiaba chuuda kꞌodaikꞌaraa bɨ. Ma ne–animal jõmaweda tꞌɨpɨtaude paadaipia bɨ; chi poro, chi bɨɨrɨ, chi jɨ̃si paara. 10Jõmaweda kꞌoda–e pɨrã, aɨ norema pai naaweda, tꞌɨpɨtaude paa jõpitꞌaadaipia bɨ. 11Nãgá kꞌodaipia bɨ. Nekꞌodai naaweda, pãchi pꞌaru chancla ome jɨ̃daipia bɨ mãikꞌaapa pãchi pakꞌuru anipapata juade iru pꞌanadaipia bɨ. Maapꞌeda isapai kꞌodaipia bɨ aramata uchiadaitꞌee perã. Mãga oodakꞌãri, tꞌɨ̃ bɨdaitꞌee Tachi Akꞌõre Pascua fiesta. 12Ma ewate pꞌãrikꞌua mɨ Egipto eujãde wãyaaitꞌee mãikꞌaapa jõmaweda Egipto pidaarã warra naapemaarã, ne–animalaarã naa tꞌoda paara piupiitꞌee. Ma awara mɨa ãchi akꞌõre waibɨa apataarã pꞌoyaaitꞌee mãikꞌaapa kꞌachia ooitꞌee. Mɨ, Tachi Akꞌõrepa mãga jara bɨ.

13’’Parã puerta ɨ̃rɨ ma waa pꞌurudapꞌedaa kꞌaurepa, mɨa mɨchi eperãarã te kꞌawaitꞌee mãikꞌaapa jĩpꞌa wãyaaitꞌee. Mãgá parãdepema apida piuda–e paitꞌee. 14Año chaa ma ewate kꞌirãpadaipia bɨ mãikꞌaapa ichita mɨ, Tachi Akꞌõre–itꞌee na Pascua fiesta oodaipia bɨ, leykꞌa bairã parã–itꞌee mãikꞌaapa parãdeepa uchiadaitꞌeerã–itꞌee. 15Ma ne–animal peeda ewatedeepa tomia aba wãyaaru misa, parãpa pan levadura wẽe kꞌodaipia bɨ. Ma tomiade pãchi tede levadura iru pꞌanadaikꞌaraa bɨ. Ma tomiade apidaapa pan levadura ome ooda kꞌoru pɨrã, mãgɨ́ eperã jëretꞌaadaipia bɨ israelitaarã tꞌãideepa. 16Ma tomiade chi naapema ewari, chi tꞌẽepema ewari paara ɨ̃ipata ewarikꞌa baitꞌee. Ma ewate chipꞌedaipia bɨ mɨmaa ɨtꞌaa tꞌɨ̃daitꞌee mãikꞌaapa mimiadaikꞌaraa bɨ. Ma ewate chikꞌo aupai chuudai. 17Ma fiesta tꞌɨ̃jarapataadaitꞌee Pan Levadura Wẽe Kꞌopata Fiesta. Parã israelitaarãpa ma fiesta ichita ɨadaipia bɨ kꞌirãpadaitꞌee ma ewate mɨa parã Egipto eujãdeepa uchiapida. 18Naapema atanede ewari catorcede akꞌõrejĩru baaidadeepa ewari veintiunode akꞌõrejĩru baairumaa mãgá pan levadura wẽe kꞌodaipia bɨ. 19Ma tomiade pãchi tede levadura maarepida iru pꞌanadaikꞌaraa bɨ. Ma tomiade apidaapa pan levadura ome ooda kꞌoru pɨrã, jëretꞌaadaipia bɨ israelitaarã tꞌãideepa. Mãga oodaipia bɨ mãgɨ́ eperã israelitapa tꞌoji mĩda, maa–e pɨrã awaraa eujãdepema parã tꞌãide bapari mĩda. 20Maperã maarepida levadura kꞌodaikꞌaraa bɨ. Parã wãrutamaa pan levadura wẽe beeta kꞌodaipia bɨda’’ aji.

21Mãpai Moisepa tꞌɨ̃ pëiji israelitaarã poro waibɨarã mãikꞌaapa mãgaji:

—Wã́tɨ oveja chakꞌe wa chivo chakꞌe pipɨara bɨ jɨrɨde pãchideerã ome kꞌodamerã. Péetɨ Pascua fiesta oodaitꞌee. 22Ma ne–animal piuda waa ne–inaade wee atadapꞌeda mãikꞌaapa ma waade hisopo jua sãdapꞌeda, mãgɨpa pꞌurudaipia bɨ puerta ɨ̃rɨ, aɨ ikꞌaawa paara. Maapꞌeda jõmaweda teeda pꞌaneedaipia bɨ aɨ norema paru misa. 23Tachi Akꞌõre Egipto eujãde wãyaakꞌãri Egipto pidaarã peede, ma waa puerta ɨ̃rɨ, aɨ ikꞌaawa pꞌuruda unuitꞌee mãikꞌaapa parã temãi wãyaaitꞌee, apida pee–ee. Irua chi peepari parã tede tꞌĩupi–e paitꞌee. 24Parãpa mãikꞌaapa parãdeepa uchiadaitꞌeerãpa na fiesta ichita oodaipia bɨ mɨa idi jara bɨkꞌa. 25Parã wãdakꞌãri ma eujã Tachi Akꞌõrepa teeitꞌee bɨdee, na fiesta aukꞌa oodaipia bɨ. 26Ma awara parã warrarãpa iididakꞌãri: ‘‘¿Na fiesta kꞌãata jara kꞌinia bɨ?’’, 27parãpa nãga pꞌanaudaipia bɨ: ‘‘Pascua fiesta oodakꞌãri, na ne–animal peedapꞌeda, Tachi Akꞌõre–itꞌee paapata. Irua Egipto pidaarã warrarã naapemaarã peekꞌãri, tachi israelitaarã temãi wãyaaji. Mãgá tachi chonaarã kꞌaripa atajida” adaipia bɨ.

Israelitaarãpa mãga ũridakꞌãri, bedabaijida mãikꞌaapa ɨtꞌaa tꞌɨ̃jida akꞌɨpidaitꞌee Tachi Akꞌõre waawee pꞌanɨ. 28Tꞌẽepai israelitaarãpa oonajida Tachi Akꞌõrepa Moisemaa mãikꞌaapa Aaronmaa jaradakꞌa.

Egipto pidaarã warrarã naapemaarã piudapꞌedaa

29Ma ewate esapɨte Tachi Akꞌõrepa peeji jõmaweda Egipto pidaarã warrarã naapemaarã, Faraón warra naapemadeepa chi carcelde chupɨria bɨ warra naapema parumaa. Ichiaba peeji jõmaweda Egipto pidaarã ne–animalaarã naapɨara tꞌoda. 30Faraón, poro waibɨarã ichi jua ekꞌari beerã, apemaarã Egiptodepemaarã ome pꞌirabaijida mãikꞌaapa tꞌãri pꞌuapa jẽe para beeji. Biukꞌa para bapachi Egiptode, te chaa piuda paraada perã.

31Aɨ pꞌãrikꞌua Faraonpa tꞌɨ̃ pëiji Moisés Aarón ome mãikꞌaapa mãgaji:

—¡Parã mãikꞌaapa israelitaarã jõmaweda tai ikꞌaawaapa ãyaa wã́tɨ! Akꞌõre Waibɨamaa ɨtꞌaa tꞌɨ̃de wã́tɨ parãpa jaradapꞌedaakꞌa. 32Parã ovejaarã mãikꞌaapa pꞌakꞌaarã atéetɨ pãchia kꞌinia pꞌanɨkꞌa. Wã́tɨ mãikꞌaapa Akꞌõre Waibɨamaa iididapáde aji, mɨ chupɨria kꞌawaamerã.

33Egipto pidaarãpa israelitaarãmaa jarajida ãchi eujãdeepa isapai wãdamerã, kꞌĩsiadapꞌedaa perã ãchi jõmaweda kꞌiniidaitꞌee. 34Mãga jaradakꞌãri, israelitaarãpa ãchi pan masa arajãgaa, levadura wẽe atajida. Ma masa ãchi pan paapatade bɨdapꞌeda, ma jõma pꞌarude bedajida mãikꞌaapa ikꞌiade ateejida. 35Ma awara Moisepa jaradakꞌa Egipto pidaarãmaa iidinajida nẽe, pꞌaratꞌa mãikꞌaapa pꞌaru. 36Tachi Akꞌõrepa jaradakꞌa ooji ma Egipto pidaarã ome. Israelitaarã waawee pꞌanadapꞌedaa perã, teejida ãrapa iididapꞌedaa. Mãgá ma israelitaarã pꞌaneejida Egipto pidaarã netꞌaa ome.

Israelitaarã Egipto eujãdeepa uchiadapꞌedaa

37Ma pꞌãrikꞌua israelitaarã Ramsés pꞌuurudeepa wãjida Sucot pꞌuuru kꞌaipee badamaa. Seiscientos mil paji, wẽraarã, warrarã juasiada–ee. Ãchi jõmaweda wãjida bɨɨrɨpa. 38Awaraa eperãarã chokꞌara aukꞌa wãjida ãra ome. Ichiaba ovejaarã, pꞌakꞌaarã chokꞌara aukꞌa ateejida. 39Egipto pidaarãpa ãra jërekꞌoodakꞌãri ãchi eujãdeepa, jua araada–e paji nechuudaitꞌee. Mapa masa anipadapꞌedaadee ãrapa pan levadura wẽe ɨ̃pɨjida.

40Israeldeepa uchiadapꞌedaarã cuatrocientos treinta años pꞌanajida Egiptode. 41Ma cuatrocientos y treinta años wãyaada ewate Tachi Akꞌõre eperãarã ëreerã chaa ma eujãdeepa uchiajida. 42Ma ewate pꞌãrikꞌua Tachi Akꞌõrepa ichi eperãarã akꞌɨji mãikꞌaapa kꞌaripaji Egiptodeepa uchia ataitꞌee. Mapa año chaa Israeldeepa uchiadaitꞌeerãpa ma ewate pꞌãrikꞌua Tachi Akꞌõre–itꞌee ɨadaipia bɨ.

Tachi Akꞌõrepa Pascua fiesta–itꞌee ley jarada

43Tachi Akꞌõrepa Moisemaa mãikꞌaapa Aaronmaa mãgaji:

—Na ley jõmaweda Pascua fiesta–itꞌee.

“Awaraa eujãdepemaarãpa Pascua fiesta ewatepema–itꞌee ne–animal peeda kꞌodaikꞌaraa bɨ. 44Mamĩda parãpa esclavoorã netodapꞌedaarãpa kꞌodai, ãchi kꞌapꞌɨade tauchaa iru pꞌanɨ pɨrã.

45’’Awaraa eujãdepemaarã parã tꞌãide pꞌanapataarã maa–e pɨrã pꞌaratꞌa pari mimiapataarã, mãgɨɨrãpa ma ne–animal chiara kꞌodaikꞌaraa bɨ.

46’’Israelitaarãpa ma ne–animal peedapꞌedaa ãchi te chaa kꞌodaipia bɨ. Pite chakꞌe apida ateedaikꞌaraa bɨ ãchi tedeepa. Ma awara ma ne–animal peedapꞌedaa bɨɨrɨ bɨadaikꞌaraa bɨ.

47’’Israelitaarã jõmaarãpa mãga oodaipia bɨ. 48Mamĩda, awaraa eujãdepema parã tꞌãide baparipa Tachi Akꞌõre–itꞌee Pascua fiesta aukꞌa oo kꞌinia bɨ pɨrã, irumaa mãga oopidai naaweda, parãpa tauchaa bɨdaipia bɨ iru kꞌapꞌɨade mãikꞌaapa irudeerãdepema ɨmɨkꞌĩraarã kꞌapꞌɨade. Mãgá Israeldeepa uchiadapꞌedaarãkꞌa pꞌaneedakꞌãri, iru aukꞌa ma fiestade bai.

’’Eperã tauchaa wẽe bɨpa ma ne–animal chiara kꞌoikꞌaraa bɨ.”

49’Ma leyde jara bɨkꞌa oodaipia bɨda aji, Israeldeepa uchiadaitꞌeerãpa mãikꞌaapa awaraa eujãdepemaarã parã tꞌãide pꞌanapataarãpa.

50Israelitaarãpa jõma oojida Tachi Akꞌõrepa Moisemaa mãikꞌaapa Aaronmaa jaradakꞌa. 51Aɨ ewateweda Tachi Akꞌõrepa israelitaarã ëreerã chaachaa Egipto eujãdeepa uchiapiji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index