Search form

Éxodo 14

Israelitaarã Mar Rojo sĩadapꞌedaa

1Atꞌãri Etam eujãde pꞌanɨde Tachi Akꞌõrepa Moisemaa mãgaji:

2—Jaráji israelitaarãmaa ãpɨtee wãdamerã mãikꞌaapa ãchi carpa eebai jẽra bɨdamerã Pi Ajirot pꞌuuru kꞌĩrapite, Baal Zefón pꞌuuru kꞌaitꞌa; Migdoldeepa pꞌusamaa wãpari o esajĩakꞌa. 3Faraonpa kꞌawaakꞌãri parã mama pꞌanɨ, nãga kꞌĩsiaitꞌee: ‘‘Israelitaarã o atuadachida, eujã pania wẽe bɨdee wã kꞌiniada–e pꞌanadairã.’’ 4Mãpai mɨa iru waya kꞌɨɨrɨ kꞌisuapiitꞌee parã tꞌẽe chemerã. Mãga pꞌasakꞌãri, mɨa mɨ jua akꞌɨpiitꞌee Faraonmaa mãikꞌaapa iru soldaorãmaa. Mãgá Egipto pidaarãpa kꞌawaadaitꞌeeda aji, mɨta Tachi Akꞌõre.

Israelitaarãpa oojida Tachi Akꞌõrepa jaradakꞌa.

5Faraonpa kꞌawaakꞌãri israelitaarã wãdapꞌedaa, ichi, poro waibɨarã ichi jua ekꞌari beerã ome awara kꞌĩsiajida. Mãgajida:

—¿Sãapꞌeda tachia ma israelitaarã tachi jua ekꞌariipa uchia pëijidama? ajida.

6Aramata Faraonpa atapiji ichi carreta caballopa jidiupata aɨde wãpari jura chõonadakꞌãri. Ma awara ichi soldaorã chipꞌe atapiji. 7Carreta caballopa jidiupata jõmaweda ichia iru bada pꞌe atapiji, ichi soldaorã aɨde wãdamerã. Seiscientos carreta pipɨara iru baji. Ma awara awaraa carreta Egiptode pꞌanadapꞌedaa pꞌe atapipꞌeda, ma carreta jõmaade soldaorã poroorã ichi jua ekꞌari pꞌanadapꞌedaarã aukꞌa wãjida ãchi soldaorã ome.

8Mãgá Tachi Akꞌõrepa Faraón kꞌɨɨrɨ kꞌisuapiji israelitaarã tꞌẽe wãmerã, ma israelitaarã Tachi Akꞌõre jua ekꞌari sõcharra wã nipajida mĩda. 9Mãgá Egiptodepema soldaorã israelitaarã tꞌẽe wãjida. Ũkꞌuru carreta caballopa jidiupatade wãjida; ũkꞌuru caballoorã ɨ̃rɨ wãjida mãikꞌaapa chi apemaarã bɨɨrɨpa wãjida. Ununajida pꞌusa ide Pi Ajirot kꞌaitꞌa Baal Zefón kꞌĩrapite. Mama israelitaarãpa ãchi carpa eebai iru pꞌanajida.

10Israelitaarãpa ãpɨtee akꞌɨdakꞌãri, unujida Faraón ichi soldaorã ome ãchi tꞌẽe cheruta. Mapa pꞌeradachida mãikꞌaapa Tachi Akꞌõremaa ɨtꞌaa iidijida. 11Ãchobeepa Moisemaa mãgajida:

—¿Egiptode jãɨra wẽ–e pajikꞌã tai jãma jaukꞌoodamerã? ¿Sãapꞌeda tai jãmãikꞌaapa uchiapijima na pania wẽe bɨ eujãde piudamerã? 12Atꞌãri Egiptode pꞌanadakꞌãri, jarada–e pajikꞌã: “Tai ichiakꞌau bɨpáde ajida, Egipto pidaarã jua ekꞌari mimiadamerã.” ¡Piara bakꞌaji tai ãra esclavo pꞌanadapꞌedaa paara, piu baipꞌananadai kꞌãyaara eujã pania wẽe bɨde!

13Mamĩda Moisepa pꞌanauji:

—Pꞌeranáatɨ. Tachi Akꞌõrede ijãapatáatɨ. Nɨ́tɨ Tachi Akꞌõrepa ichi jua akꞌɨpimerã mãikꞌaapa tachi kꞌaripamerã. Jã Egipto pidaarã waa unuda–e paitꞌee. 14Kꞌãiwee pꞌanadapáde aji, Tachi Akꞌõre parã pari chõoitꞌee perã.

15Mãpai Tachi Akꞌõrepa Moisemaa mãgaji:

—¿Sãapꞌeda mɨmaa kꞌaripa iidi bɨma? Jaráji israelitaarãmaa waa wãdamerã. 16Pɨ pakꞌuru anipapari ɨtꞌaa jira atáji mãikꞌaapa pɨchi jua pꞌusamaa ɨ́aji tꞌooma omeede tꞌoodaimerã mãikꞌaapa israelitaarã ma pꞌoorude sĩadamerã. 17Mɨa Egipto pidaarã kꞌɨɨrɨ kꞌisuapiitꞌee parã tꞌẽe wãdamerã. Mãpai mɨ jua unupiitꞌee Faraonmaa, ichi eere pꞌanɨɨrãmaa paara. 18Mãga unudakꞌãrita, Egipto pidaarãpa kꞌawadaitꞌeeda aji, mɨ Tachi Akꞌõre.

19Mãpai Tachi Akꞌõrepa ángel pëida israelitaarã naa wãmerã ma jɨ̃arara ome, ãra ãpɨteikꞌa eere banaji. 20Mãgá ma jɨ̃arara Egipto pidaarã mãikꞌaapa israelitaarã esajĩakꞌa beeji. Egipto pidaarã eere pꞌãriu baji. Mamĩda israelitaarã eere ɨ̃daa baji. Mãgá pꞌãriu bada perã, ma pꞌãrikꞌua Egipto pidaarãpa israelitaarã pꞌoyaa ẽpꞌeda–e paji.

21Tachi Akꞌõrepa jaradakꞌa Moisepa ichi jua pꞌusamaa ɨaji. Mãpai Tachi Akꞌõrepa nãumia oriente eereepa pꞌuapiji. Kꞌeudakꞌãriipa ɨ̃datɨrumaa ma nãumia pꞌua nɨ̃baji. Mãgá Tachi Akꞌõrepa pꞌusa tꞌootꞌaaji esa–aukꞌa, aɨde eujã pꞌoo uchiamerã. 22Mãgá israelitaarã ma eujã pꞌoodade sĩajida, pꞌusa eekꞌa tau tꞌõdee beeru misa ãchi juaraare mãikꞌaapa ãchi juabi eere.

23Jõmaweda Egipto pidaarã Faraón carreta caballopa jidiupatade wãdapꞌedaarã, caballo ɨ̃rɨ wãdapꞌedaarã, bɨɨrɨpa wãdapꞌedaarã paara ãra tꞌẽe wãjida pꞌusa esa–aukꞌa panarutamaa. 24Taujaaweda Tachi Akꞌõrepa ma Egipto pidaarã akꞌɨji ma jɨ̃arara tꞌɨpɨtaukꞌa urua nɨ̃bɨdeepa. Mapa ãchi pꞌerakꞌoodachida. 25Mãga nɨde ãchi carreta caballopa jidiupata ãrikꞌoodachida. Mapa pꞌoyaa isapai waa wãda–e paji. Mãpai ma Egipto pidaarãpa mãgajida:

—¡Ãpɨtee wãdáma ajida, Tachi Akꞌõre ãra pari tachi ome chõomaa bairã!

26Mamĩda Tachi Akꞌõrepa Moisemaa mãgaji:

—Jua ɨapáde aji, pꞌusamaa Egipto pidaarã, ãchi caballoorã mãikꞌaapa carreta ɨ̃rɨ pania weedaimerã.

27Tachi Akꞌõrepa jaradakꞌa, Moisepa ichi jua pꞌusamaa ɨaji. Tapꞌeda pakꞌãri, ma pꞌusa naawedapemakꞌa beeji. Mapa Egipto pidaarã pꞌirajida mĩda, pꞌoyaa uchiada–e paji. Mãgá Tachi Akꞌõrepa ãra jõpiji. 28Ãchi carreta, caballoorã, soldaorã paara pꞌusa jãde tꞌaakꞌoodachida. Faraón eerepema soldao apida chokꞌai uchiada–e paji. 29Jõdee Tachi Akꞌõrepa israelitaarã sĩapiji eujã pꞌoodade pꞌusa eekꞌa tau tꞌõdee bee esajĩakꞌa ãchi juaraare mãikꞌaapa juabi eere.

30Ma ewate Tachi Akꞌõrepa israelitaarã kꞌaripa ataji Egipto pidaarã juadeepa. Pꞌusa ide israelitaarãpa Egipto pidaarã kꞌapꞌɨa piuda chokꞌara unujida. 31Israelitaarãpa unudakꞌãri Tachi Akꞌõrepa ooda ãchi kꞌaripaitꞌee, irude wãara ijãajida. Oo kꞌinia pꞌaneejida irua jara bɨkꞌa mãikꞌaapa Moisepa jara bɨkꞌa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index