Search form

Éxodo 15

Moisepa Tachi Akꞌõremaa kꞌarida

1Israelitaarãpa mãikꞌaapa Moisepa mãga unudapꞌedaa perã, Tachi Akꞌõremaa nãga kꞌarijida:

“Kꞌariitꞌee Tachi Akꞌõremaa, iru jõmaarã kꞌãyaara waibɨara bairã. Iruata caballode wãdapꞌedaarã pꞌoyaaji pꞌusa jãde jõpikꞌãri. 2Kꞌariitꞌee Tachi Akꞌõremaa, irua mɨ tꞌãri o–ĩapipari perã, juataurapipari perã mãikꞌaapa mɨ kꞌaripapari perã. Iruta mɨ Akꞌõre Waibɨa; irumaa pedee pia jarapariitꞌee. Iru mɨ akꞌõreerã Akꞌõre Waibɨa; ãrapa iru waawee pꞌanapatapꞌedaakꞌa mɨa iru waawee bapariitꞌee. 3Tachi Akꞌõre sõcharra bapari jura chõoitꞌee. ¡Iru tꞌɨ̃jarapata Tachi Akꞌõre! 4Iru juapa Faraón carreta tꞌaapikꞌooji mãikꞌaapa chi soldaorã, ãchi poro waibɨarã paara Mar Rojode piupiji. 5Mãukꞌa tꞌaadachida pꞌusa nãpɨa bɨde pania ãchi ɨ̃rɨ weedaikꞌãri.

6’’Tachi Akꞌõre, pɨ juaraarepema juapa tai kꞌĩra unuamaa iru pꞌanadapꞌedaarã pꞌoyaaji. 7Pɨ jõmaarã kꞌãyaara waibɨara bairã, pɨ juapa pɨ kꞌĩra unuamaa iru pꞌanadapꞌedaarã jõpiji. Ãra ome kꞌĩraudaikꞌãri, ãra jõtꞌaaji tꞌɨpɨtaupa pꞌũajara pꞌoo bɨ paa jõparikꞌa. 8Pɨa golpe jãrapꞌuaji pꞌusa eekꞌa tau tꞌõdeedaimerã. Pꞌusara ɨtꞌɨa nɨ̃beeji murallakꞌa mãikꞌaapa pꞌusa jã nãpɨara bɨmãi hielokꞌa chawadachi. 9Tachi kꞌĩra unuamaa iru pꞌanadapꞌedaarãpa kꞌĩsiajida: ‘Ãra tꞌẽe wãdaitꞌee ẽpꞌe atarutamaa mãikꞌaapa ãra netꞌaa jãri atadaitꞌee. Espadapa ãra peekꞌoodaitꞌee.’ 10Mamĩda pɨa jãrapꞌuaji pꞌusa mãɨrã ɨ̃rɨ chemerã. ¡Mãgá ma pꞌusara nɨ̃bɨde plomokꞌa tꞌaakꞌoodachida!

11’’Tachi Akꞌõre, awaraa Akꞌõre Waibɨa pɨkꞌa wẽ–e. Pɨ jõmaarã kꞌãyaara waibɨara bɨ. Eperãarãpa pɨ waaweepata, pɨa oopari perã ne–inaa eperãarãpa pꞌoyaa oodakꞌaa ãchi juadoopa. Maperã pɨmaa aupai ɨtꞌaa tꞌɨ̃pata. 12Pɨ juaraarepema juapa tachi kꞌĩra unuamaa iru pꞌanadapꞌedaarã kꞌiniipiji. 13Pɨa na eperãarã audú kꞌinia iru bapari perã, tai kꞌaripa ataji ma kꞌachia beerã juadeepa. Pɨa tai ateeitꞌee pɨ baparimaa. 14Awaraa eujãdepemaarã pꞌeradaitꞌee kꞌawaadakꞌãri pɨa ooda Egipto pidaarãmaa. Filisteorã tꞌãri ma–ãri jõnadaitꞌee. 15Edomitaarã poro waibɨarã pꞌera jõnɨpa pꞌoyaa pedeedakꞌaa paitꞌee. Moabitaarã poro waibɨarã pꞌera jõnɨpa kꞌapꞌɨa wëre jõnadaitꞌee mãikꞌaapa cananeorã chõodaamaa pꞌanadaitꞌee.

16’’Tachi Akꞌõre, mãɨrã pꞌerapíji mãga pꞌanadamerã. Pɨ juapa ãra tꞌɨdɨkꞌáji, mãukꞌa mimikꞌada–ee pꞌaneedamerã. Mãgá ãra iru báji pɨ eperãarã ãra eujãde wãyaaruta misa. Mãga óoji pɨa tai, pɨchi eperãarã papida perã. 17Pɨa tai ateeitꞌee pɨa eujã jɨrɨtꞌeradamaa, mama pɨ te ee nokꞌode oopiitꞌee perã.

18¡Tachi Akꞌõre ichita jõmaarã rey paitꞌee!”

Miriampa kꞌarida

19Faraón carreta caballopa jidiupatade wãdapꞌedaarã, caballo ɨ̃rɨ wãdapꞌedaarã, bɨɨrɨpa wãdapꞌedaarã paara pꞌusa jãde wãdakꞌãri israelitaarã tꞌẽe, Tachi Akꞌõrepa ãra ɨ̃rɨ pꞌusa weepiji. Jõdee israelitaarã ma pꞌusa eekꞌa tau tꞌõdee bee esajĩakꞌa pꞌoo bɨde wãyaajida. 20Maapꞌeda Tachi Akꞌõre pedee jarapari Miriampa tꞌõdoo ataji mãikꞌaapa chaa nɨ̃bɨ misa, o–ĩapa pairaji Tachi Akꞌõre–itꞌee awaraa wẽraarã ome. Ma Miriam Aarón ɨ̃pewẽra paji. 21Miriampa nãga kꞌariji:

“Kꞌaridáma Tachi Akꞌõremaa, iru jõmaarã kꞌãyaara waibɨara bairã. Irua tachi kꞌĩra unuamaa iru pꞌanadapꞌedaarã pꞌoyaaji mãikꞌaapa pꞌusade tꞌaapikꞌooji ãchi caballoorã ome.”

Pania asia unudapꞌedaa

22Maapꞌeda Moisés israelitaarã ome Mar Rojodeepa wãjida. Kꞌãima õpee nipajida Sur apatapꞌedaa eujã pania wẽe bɨde. Mama nipadakꞌãri, pania unuda–e paji. 23Ãchi Marade panajida. Mama pania paraaji. Mamĩda pꞌoyaa toda–e paji, asia bada perã. Maperã ma punto tꞌɨ̃jarapachida Mara.+ 24Pania todaitꞌee unuda–e pakꞌãri, israelitaarã Moisés ãpɨte ikꞌachia pedee para beeji. Iidipachida: “¿Kꞌãata todaitꞌeema?” ajida.

25Mapa Moisepa Tachi Akꞌõremaa kꞌaripa iidiji. Maapꞌeda Tachi Akꞌõrepa pakꞌuru jua unupiji. Mãpai Moisepa toida batꞌatꞌaaji. Mãgá pania naapꞌeedachi.

Mama pꞌanɨde Tachi Akꞌõrepa israelitaarãmaa ley jaraji mãikꞌaapa ne–inaa ooji, kꞌawa kꞌinia bada perã ichide wãara ijãa pꞌanɨ wa mãga–e. 26Mapa mãgaji:

—Mɨa jara bɨ ũriruta pɨrã mãikꞌaapa mɨa kꞌinia bɨkꞌa ooruta pɨrã, ma awara mɨa jara bɨkꞌa ooruta pɨrã mãikꞌaapa mɨ leyde jara bɨkꞌa ooruta pɨrã, mɨa parã kꞌayaapi–e paitꞌee Egipto pidaarã kꞌayaapidakꞌa. Mɨ Tachi Akꞌõre. Mɨata parã jɨpaparida aji.

27Maapꞌeda Elim apatapꞌedaamãi panajida. Mama pania poátrɨ uchia bee doce paraaji mãikꞌaapa setenta palma paraaji. Mapa mama pꞌaneejida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index