Search form

Éxodo 16

Tachi Akꞌõrepa maná mãikꞌaapa bichipõpokꞌa bee teeda

1Israelitaarã jõmaweda Elimdeepa wãjida mãikꞌaapa panajida Sin eujã pania wẽe bɨmãi. Mãgɨ́ Sin eujã Elim pania poátrɨ uchia beemãi Sinaí ee esajĩakꞌa bɨ. Egiptodeepa uchiadakꞌãriipa mama panadakꞌãri, atane aba apꞌeda, ewari quince wãyaa baji. 2Mama pꞌanɨde jõmaarãpa waya Moisés ãpɨte mãikꞌaapa Aarón ãpɨte ikꞌachia pedee para beeji. 3Ãramaa mãgajida:

—Tachi Akꞌõrepa Egiptode tai piupida paara, piara bakꞌaji. Mama tai su–akꞌɨ pꞌaneepachida nechiara kꞌuuru ikꞌaawa mãikꞌaapa kꞌopachida bi jãwaadarutamaa. Mamĩda parãpa tai aneejidada ajida, tai jõmaweda jarrapa piudamerã na eujã pania wẽe bɨde.

4Mãpai Tachi Akꞌõrepa Moisemaa mãgaji:

—Kꞌoi cheparikꞌa mɨa pajãdeepa chikꞌo pëiitꞌee. Ewari chaa eperãarã wãdaipia bɨ ma chikꞌo pꞌede. Pꞌedaipia bɨ ãchi te pidaarãpa ma ewate kꞌodamerã. Mɨa kꞌawa kꞌinia bɨ oodai mɨa jara bɨkꞌa wa mãga–e. 5Tomia chaa ewari seide ma chikꞌo aɨ noremapema–itꞌee ichiaba pꞌedaipia bɨda aji, mɨa kꞌinia–e bairã ɨ̃ipata ewaride pꞌedamerã.

6Mãpai Moisepa Aarón ome israelitaarãmaa mãgajida:

—Kꞌewara parãpa kꞌawadaitꞌee Tachi Akꞌõrépata parã uchiapiji Egipto eujãdeepa. 7Ma awara nu tapꞌeda iru kꞌĩra wãree unudaitꞌee. Irua ũri bɨ parãpa ikꞌachia pedee pꞌanɨ ichi ãpɨte. ¿Tai kꞌáirãma ajida, parãpa taimaa ikꞌachia jaradamerã?

8Ma awara Moisepa mãgaji:

—Kꞌewara Tachi Akꞌõrepa nechiara teeitꞌee parãpa kꞌodamerã. Ma awara nu tapꞌeda pan waibɨa teeitꞌee. Irua ũri bɨ parãpa pedee kꞌachia jara pꞌanɨ ichi ãpɨte. Wãara taimaa aupai ikꞌachia pedeeda–e pꞌanɨ. Tachi Akꞌõremaata ikꞌachia pedee pꞌanɨda aji.

9Maapꞌeda Moisepa Aaronmaa mãgaji:

—Jaráji israelitaarã Tachi Akꞌõre kꞌaitꞌa chedamerã. Iruata ãrapa pedee kꞌachia jaradapꞌedaa ũrijida aji.

10Aaronpa israelitaarãmaa mãga jaramaa bɨde, ma eujã pania wẽe badamãi ãchia unujida Tachi Akꞌõre kꞌĩra wãree cheru ma naaweda unudapꞌedaa jɨ̃ararade.

11Mãga nɨde Tachi Akꞌõrepa Moisemaa mãgaji:

12—Mɨa ũriji israelitaarãpa mɨ ãpɨte pedee kꞌachia jaradapꞌedaa. Pedéeji ãchi ome mãikꞌaapa nãga jaráji: “Kꞌewara nechiara kꞌodaitꞌee mãikꞌaapa tapꞌeda ɨtꞌaripema pan kꞌodaitꞌee bi jãwaadarutamaa. Mãgá kꞌawaadaitꞌeeda aji, mɨta parã Akꞌõre Waibɨa.”

13Aɨ kꞌewara irua israelitaarãmaa bichipõpokꞌa bee chokꞌara pëiji. Ãra pꞌanadapꞌedaamãi audú chokꞌara paraaji. Mapa jõmaweda pꞌe atajida kꞌodaitꞌee. Ichiaba aɨ norema tapꞌedaweda ma eujãde sereno unujida. 14Ma sereno wẽpakꞌãri, eujãde ne–inaa tꞌorroo, nãusaa beeji. 15Israelitaarãpa mãgɨ́ kꞌawada–e padapꞌedaa perã, iidi para beeji: “¿Na, kꞌãarema?” apachida.

Mãpai Moisepa mãgaji:

—Jãgɨ́ chi ɨtꞌaripema pan Tachi Akꞌõrepa teeda parãpa kꞌodamerã. 16Irua jara bɨ nãga oodamerã: “Parã tedepema eperãarã chaachaa–itꞌee litro omé+ atadapáde” aji.

17Israelitaarãpa mãga oojida. Ũkꞌuruurãpa waibɨa pꞌejida; ũkꞌuruurãpa waibɨa pꞌeda–e paji. 18Mamĩda litro omé chaaparide chaadakꞌãri chi waibɨa pꞌedapꞌedaarãde bee–e paji. Ichiaba chi waibɨa pꞌeda–e padapꞌedaarãpa ma–ãriara jitada–e paji. Eperã chaachaa aukꞌa litro omé jitajida.

19Maapꞌeda Moisepa mãgaji:

—Apidaapa ɨa bɨdaikꞌaraa bɨda aji, aɨ noremapema–itꞌee.

20Mamĩda ũkꞌuruurãpa Moisepa jaradakꞌa ooda–e paji. Ũkꞌuru ɨa bɨjida aɨ noremapema–itꞌee. Mamĩda ãridachi mãikꞌaapa kꞌi–idaadachi. Maperã Moisés mãgɨɨrã ome kꞌĩraudachi.

21Tapꞌedaweda ma ewatepema chikꞌo pꞌepachida, akꞌõrejĩrupa torrabaidaipachi perã. 22Mamĩda ewari seide litro kꞌĩmari atajida eperã chaachaa–itꞌee. Mãga unudakꞌãri, israelitaarã poroorãpa Moisemaa nepɨrɨnajida.

23Mãpai Moisepa pꞌanauji:

—Tachi Akꞌõrepa nãga jara bɨ parãpa oopataadamerã. Nu ɨ̃ipata ewari, ewari iru–itꞌee awara bɨda. Mapa idi nejóotɨ maa–e pɨrã páatɨ mãikꞌaapa ɨa bɨ́tɨ nupema–itꞌee.

24Moisepa jaradakꞌa chi beeda ɨa bɨjida aɨ noremapema–itꞌee. Mãgɨ́ ãri–e paji mãikꞌaapa maarepida kꞌi tekꞌa–e paji.

25Mãpai Moisepa mãgaji:

—Kꞌótɨ chi kꞌo kꞌiniata idi ɨ̃ipata ewari perã, Tachi Akꞌõre–itꞌee ewari awara bɨda. Idi chikꞌo eujãde unuda–e paitꞌeeda aji. 26Ewari seis wãyaarude pꞌedaipia bɨ. Mamĩda aɨ norema pꞌoyaa pꞌeda–eda aji, wẽ–e paitꞌee perã.

27Moisepa mãga jaraji mĩda, ɨ̃ipata ewari eperãarã ũkꞌuru uchiajida chikꞌo jɨrɨde. Mamĩda unuda–e paji.

28Mãpai Tachi Akꞌõrepa Moisemaa mãgaji:

—¿Sãapꞌeda parãpa mɨa jara bɨkꞌa ooda–e pꞌanɨma? 29Kꞌirãpátɨ mɨa ewari aba awara bɨda, aɨde parã ɨ̃idamerã. Mapa ewari seide mɨa chikꞌo waibɨara pëipariitꞌee. Mãgá ewari sietede teeda pꞌanadayada aji, maarepida mimiada–ee.

30Moisepa israelitaarãmaa mãga jarakꞌãri, ewari sietede ɨ̃ijida.

31Mãgɨ́ ne–inaa pꞌedapꞌedaa tꞌo–tꞌoo baji mãikꞌaapa kꞌũa baji galleta miéle ome pꞌurudakꞌa. Tꞌɨ̃ bɨjida ‘maná’.+

32Maapꞌeda Moisepa mãgaji:

—Tachi Akꞌõrepa nãga jara bɨ: ‘‘Ne–inaa litro omé araaparide maná pꞌedapáde a bɨ, ɨa bɨdaitꞌee eperãarã tꞌẽe tꞌorutaarãpa unudamerã mãikꞌaapa kꞌawaadamerã mɨa chikꞌo teeda parã Egiptodeepa uchiapipꞌeda, eujã pania wẽe bɨde pꞌanadakꞌãri.’’

33Mãpai Moisepa Aaronmaa mãgaji:

—Kꞌoraa atapꞌeda, maná litro omé aɨde pꞌe bɨ́ji. Mãpai Tachi Akꞌõre kꞌĩrapite bɨpáde aji, tꞌẽe tꞌorutaarãpa unudamerã.

34Aaronpa ooji Moisepa jaradakꞌa. Tꞌẽepai ma kꞌoraa bɨji Tachi Akꞌõrepa oopida baaltekꞌa bɨ kꞌĩrapite, mama ɨa iru pꞌanadamerã. Ma baaltekꞌa bɨ kꞌaurepa israelitaarãpa kꞌirãpadaitꞌee Tachi Akꞌõrepa pacto ooda ãchi ome. 35Cuarenta años eujã pania wẽe bɨde wãyaaruta misa, israelitaarãpa maná kꞌopachida. Pꞌepachida kꞌodaitꞌee Canaán eujãde panarutamaa.

36(Maapai dos litro tꞌɨ̃jarapachida gómer aba mãikꞌaapa gómer diez tꞌɨ̃jarapachida efa.)

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index