Search form

Éxodo 17

Tachi Akꞌõrepa peña bɨdeepa pania uchiapida

1Israelitaarã jõmaweda uchiajida Sin eujã pania wẽe bɨdeepa. Ɨ̃ida–ɨ̃idaa wãjida Tachi Akꞌõrepa jaradakꞌa. Refidinde panadakꞌãri, pania todaitꞌee unuda–e paji. 2Mapa Moisés ome aupedeemaa pꞌaneejida:

—¡Pania teepáde ajida, todaitꞌee!

Moisepa pꞌanauji:

—¿Sãapꞌeda mɨ ome nepɨra jɨrɨ pꞌanɨma? ¿Sãapꞌeda ijãada–e pꞌanɨma aji, Tachi Akꞌõrepa tachi kꞌaripai?

3Mamĩda israelitaarã opisia para baji. Maperã Moisemaa kꞌĩrau pedeejida. Mãgapachida:

—¿Sãapꞌeda pɨa tai Egiptodeepa uchiapijima? Tai, tai warrarã, tai ne–animalaarã paara opisiapa piudaitꞌeeda ajida.

4Mãpai Moisepa Tachi Akꞌõremaa ɨtꞌaa tꞌɨ̃ji:

—¿Kꞌãata ooima na eperãarã ome? ¿Mɨ mãupa peetꞌaadaitꞌee–ekꞌã? aji.

5Tachi Akꞌõrepa pꞌanauji:

—Wã́ji israelitaarã naa ãchi poro waibɨarã ũkꞌuru ome. Atéeji ma pakꞌuru Nilo to jãmaa wɨda. 6Mɨa nɨmaa baitꞌee Horeb eede peña bɨmãi. Panakꞌãri, pakꞌurupa ma peñamaa wɨ́ji. Mãga ookꞌãri, pania uchiaitꞌeeda aji, todamerã.

Moisepa mãga ooji israelitaarã poro waibɨarã kꞌĩrapite. 7Moisepa ma peñamãi tꞌɨ̃ bɨji Meribá, jara kꞌinia bɨ ‘aupedeedapꞌedaa,’ mama israelitaarãpa pania iididapꞌedaa perã. Ichiaba tꞌɨ̃ bɨji Masá, jara kꞌinia bɨ ‘ne–inaa oopidapꞌedaa kꞌawadaitꞌee’, mama Tachi Akꞌõrepa pania uchiapida perã ãrapa nãga jaradakꞌãri: “¿Tachi Akꞌõre tachi ome bɨkꞌã wa mãga–e?”

Israelitaarã amalecitaarã ome chõodapꞌedaa

8Israelitaarã atꞌãri Refidinde pꞌanadakꞌãri, amalecitaarã ãra ome chõode chejida.

9Mãpai Moisepa Josuemaa mãgaji:

—Ɨmɨkꞌĩraarã ũkꞌuru jɨrɨtꞌeráji mãikꞌaapa wã́tɨ amalecitaarã ome chõode. Nu mɨ baitꞌeeda aji, eede ɨtꞌɨ́ Tachi Akꞌõre pakꞌuru ome.

10Josuepa ooji Moisepa jaradakꞌa. Chõode uchiajida ma amalecitaarã ome. Mãɨmisa Moisés, Aarón mãikꞌaapa Jur wãjida ee nokꞌodee. 11Moisepa ichi jua ɨtꞌaa ɨakꞌãri, israelitaarãpa chõo pꞌoyaa wãpachida. Mamĩda ɨa–e pakꞌãri, amalecitaarãpa pꞌoyaa wãpachida. 12Moisés jua tꞌũmaadaikꞌãri, mãu atajida aɨ ɨ̃rɨ iru su–akꞌɨ beemerã. Mãpai Aaronpa mãikꞌaapa Jurpa iru jua jira iru pꞌaneejida; abaapa chi juaraarepema jua, apemapa chi juabi eerepema jua. Mãgá Moisés jua ɨa nɨ̃baji akꞌõrejĩru baairumaa. 13Mãgá Josué eere pꞌanadapꞌedaarãpa amalecitaarã soldaorã espadapa pꞌoyaajida.

14Maapꞌeda Tachi Akꞌõrepa Moisemaa mãgaji:

—Librode nãga pꞌã́ji mãikꞌaapa ɨa bɨ́ji ichita kꞌirãpadamerã: ‘‘Mɨa amalecitaarã jõmaweda jõpiitꞌee apidaapa ãra kꞌirãpanaadamerã.’’ Josuemaa mãga jarapáde aji.

15Mama Moisepa altar Tachi Akꞌõre–itꞌee ooji. Ma altar tꞌɨ̃ bɨji ‘Tachi Akꞌõre mɨ bandera’ 16mãikꞌaapa mãgaji:

—Tachi Akꞌõrepa ichi bandera jira iru bɨ. ¡Iruta jura chõopariitꞌee amalecitaarã ome ãra jõpirumaa!

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index