Search form

Éxodo 19

Israelitaarã Sinaí eede panadapꞌedaa

1Egiptodeepa uchiadakꞌãriipa, atane õpee wãyaa baji israelitaarã eujã pania wẽe bɨde Sinaí ee kꞌĩrapite panadakꞌãri. 2Refidindeepa uchiadapꞌeda, Sinaí ee kꞌĩrapite ãchi carpa eebai jẽra bɨjida. 3Mama pꞌanɨde Moisés eede ɨtꞌaa wãji Tachi Akꞌõre ome pedeeitꞌee.

Mama Tachi Akꞌõrepa mãgaji:

—Nãga jaráji israelitaarã, Jacobdeepa uchiadapꞌedaarãmaa: 4“Parãpa unujida mɨa Egipto pidaarã ome ooda. Nejɨ̃pɨpa ooparikꞌa chi chakꞌeerã ome, mãga pɨkꞌa mɨa parã aneeji nama mɨ bɨmãi, parã ode wãdade atuanaadamerã. 5Ɨ̃rá parãpa ne–inaa jõmaade mɨa jara bɨkꞌa ooruta pɨrã mãikꞌaapa ma pacto mɨa parã ome oodade jara bɨkꞌa ooruta pɨrã, na pꞌekꞌau eujãdepema pꞌuuru pidaarã tꞌãide mɨa parã awara bɨitꞌee, mɨ–itꞌee aupai pꞌanapataadamerã. Na pꞌekꞌau eujãdepema pꞌuuru pidaarã jõmaweda mëré mĩda, 6parãta pꞌaareerãkꞌa ɨtꞌaa tꞌɨ̃pataadaitꞌee apemaarã eperãarã pari mãikꞌaapa awaraa pꞌuuru pidaarã kꞌãyaara awara pꞌanapataadaitꞌee mɨa kꞌinia bɨkꞌa.” Ma jõma israelitaarãmaa jarapáde aji.

7Mãpai Moisepa tꞌɨ̃ pëiji israelitaarã poro waibɨarã mãikꞌaapa Tachi Akꞌõrepa ãramaa jara pëida jõmaweda jaraji. 8Mãga ũridakꞌãri, israelitaarã jõmaarãpa pꞌanaujida:

—Tachi Akꞌõrepa jara bɨkꞌa oodaitꞌeeda ajida.

Mãpai Moisés waya eede ɨtꞌaa wãji Tachi Akꞌõremaa jarade israelitaarãpa jaradapꞌedaa.

9Mama Tachi Akꞌõrepa mãgaji:

—Mɨ jɨ̃arara tꞌãmaa bɨde pɨmaa cheitꞌee eperãarãpa mãga unudamerã mãikꞌaapa ũridamerã mɨa pɨmaa jararu. Mãgá ãrapa waapɨara pɨ pedee ijãadayada aji.

Moisepa eperãarãpa jaradapꞌedaa waya jaranaji.

10Mãpai Tachi Akꞌõrepa mãgaji:

—Eperãarãmaa wã́ji mãikꞌaapa idi, nu paara mɨ–itꞌee ãra awara bɨ́ji. Jaráji mɨmaa ɨtꞌaa tꞌɨ̃dai naaweda, nãga oodamerã: Pꞌaru tꞌõdaipia bɨ 11mãikꞌaapa nɨdaipia bɨ, nunorema Sinaí eede mɨ ãra taide baai cheitꞌee perã. 12Ee kꞌarraya tꞌɨakꞌau bɨipia bɨ eperãarã wãyaanaadamerã. Jaraipia bɨ apida ma tꞌɨakꞌau bɨmãi wãyaanaadamerã, chi wãyaaru piuitꞌee perã. 13Apida ma tꞌɨakꞌau bɨmãi wãyaaru pɨrã, ma eperã tꞌõbaináatɨ. Mãupa batꞌa peetꞌaadaipia bɨ maa–e pɨrã flechapa. Ne–animal pɨrã, aukꞌa peetꞌaadaipia bɨ. Aba eperãarã na ee kꞌaitꞌa chedayada aji, ne–inaa oveja ɨmɨkꞌĩra cachodee ooda taarã chaadakꞌãri.

14Moisés ma eedeepa edaa chepꞌeda, mãga jaranaji eperãarãmaa mãikꞌaapa ãra Tachi Akꞌõre–itꞌee awara bɨji. Mãpai ãchi pꞌaru tꞌõjida Tachi Akꞌõrepa jaradakꞌa.

15Maapꞌeda Moisepa mãgaji:

—Nunorema parãpa Tachi Akꞌõre unudaitꞌee. Mapa irua jaradakꞌa óotɨ mãikꞌaapa pãchi wẽraarã ome kꞌãinaadapáde+ aji.

16Kꞌãima õpeede tapꞌedaweda pa tau pꞌorepꞌorepari nɨ̃beeji mãikꞌaapa pa jĩwaa nɨ̃beeji. Jɨ̃ararapa ma ee aneu ata cheji. Ichiaba trompeta golpe jĩwaa nɨ̃beeji. Ma jõma ũridakꞌãri, israelitaarã ãchobeepa kꞌapꞌɨa wëre para beeji. 17Mãpai Moisepa israelitaarã ãchi pꞌanadapꞌedaamãiipa Sinaí ee kꞌarraya chipꞌe ateeji Tachi Akꞌõre ome unudamerã. 18Mãpai Tachi Akꞌõre tꞌɨpɨtaukꞌa urua cheji. Mãga nɨde ma ee nari jɨ̃rakꞌawaa jẽra beeji hornodeepa nari jɨ̃rakꞌawaa uchiaparikꞌa mãikꞌaapa ma ee jõma wëre nɨ̃beeji. 19Trompeta jĩwaa nɨ̃bɨ ũrijida. Mãga bɨde audú golpeera jĩwaa wãpachi. Moisés pedeekꞌãri, Tachi Akꞌõrepa pꞌanaupachi pa jĩwaaparikꞌa.

20Mãga bɨde Tachi Akꞌõre Sinaí ee nokꞌode baai cheji mãikꞌaapa Moisemaa jaraji ichi waya kꞌĩrachuude wãmerã. Mãpai Moisés eede ɨtꞌaa wãji irua jaradakꞌa. Iru mama panakꞌãri, 21Tachi Akꞌõrepa mãgaji:

—Eperãarãmaa wã́ji mãikꞌaapa jaráji mɨ unu kꞌiniapa jã tꞌɨakꞌau bɨmãiipa wãyaanaadamerã. Mãga–e pɨrã, chokꞌara piudayada aji. 22Pꞌaareerã, mɨ kꞌaitꞌa chepataarã paara mɨ kꞌaitꞌa chedai naaweda, ne–inaa ãchia oopata oodaipia bɨ Tachi Akꞌõre–itꞌee awara pꞌaneedamerã. Maa–e pɨrã piudayada aji.

23Mãpai Moisepa Tachi Akꞌõremaa mãgaji:

—Eperãarã cheda–epɨ pɨa jarada perã na ee kꞌarraya tꞌɨakꞌau bɨdamerã mãikꞌaapa pɨ–itꞌee awara bɨdamerã.

24Mamĩda Tachi Akꞌõrepa mãgaji:

—Eperãarãmaa wã́ji. Maapꞌeda Aarón pɨ ome anéeji. Mamĩda pꞌaareerã mãikꞌaapa awaraa eperãarã ma tꞌɨakꞌau bɨmãiipa wãyaadaikꞌaraa bɨ mɨmaa chedaitꞌee. Mãga–e pɨrã, mɨa ãchi jõpiyada aji.

25Mãpai Moisés eedeepa edaa cheji mãga jarade.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index