Search form

Éxodo 20

Tachi Akꞌõrepa ley diez jarada

(Deuteronomio 5.1-21)

1Mãpai ee nokꞌodeepa Tachi Akꞌõrepa edaa pedeeji:

2—Mɨ Tachi Akꞌõre, parã Akꞌõre Waibɨa. Mɨata parã uchia ataji Egipto eujãde esclavo pꞌanadapꞌedaamãiipa.

3’Awaraa ne–inaamaa ɨtꞌaa tꞌɨ̃náatɨ. Mɨmaa aupaita ɨtꞌaa tꞌɨ̃patáatɨ.

4’Ne–inaa juapa oonáatɨ aɨ kꞌĩrapite ɨtꞌaa tꞌɨ̃daitꞌee: pajãdepema ne–inaakꞌa; eujãdepema ne–inaakꞌa maa–e pɨrã pꞌusadepema ne–inaakꞌa. 5Bedabaináatɨ mãgee ne–inaa kꞌĩrapite mãikꞌaapa mãgee ne–inaamaa ɨtꞌaa tꞌɨ̃náatɨ. Mɨta parã Akꞌõre Waibɨa, Tachi Akꞌõre. Mɨa mɨchi eperãarã jiwaapari. Mɨa ne–inaa kꞌachia oopari mɨ kꞌĩra unuamaa iru pꞌanapataarãmaa, ãchi warrarãmaa, ãichakꞌeerãmaa, mãɨrã warrarãmaa paara. 6Mamĩda mɨa kꞌinia iru bapari mɨ kꞌinia iru pꞌanapataarã mãikꞌaapa mɨa jara bɨkꞌa oopataarã; ãradeepa uchiadaitꞌeerã chokꞌara paara.

7’Mɨ tꞌɨ̃ ichi kꞌinia jaranáatɨ. Chi mãgá jara bɨmaa mɨa ne–inaa kꞌachia ooitꞌee.

8’Kꞌirãpátɨ tomia chaa ewari aba mɨ–itꞌee awara bɨdamerã mãikꞌaapa ma ewate ɨ̃idamerã. 9Ewari seis mimiadaipia bɨ. 10Mamĩda ewari sietede ɨ̃idaipia bɨ, ma ewate mɨ, parã Akꞌõre Waibɨa ewari perã. Ma ewate maarepida mimiadaikꞌaraa bɨ parã, pãchi warrarã, kꞌaurã, esclavoorã, awaraa eujãdepemaarã pãchi tꞌãide pꞌanapataarã, pãchi ne–animalaarã paara. 11Mãga oodaipia bɨ ewari seis mɨ mimiada perã. Ooji pajã, aɨde nɨ̃bɨ ome; na pꞌekꞌau eujã aɨde nɨ̃bɨ ome; pꞌusa aɨde nɨ̃bɨ ome. Mãpai ewari sietede ɨ̃iji. Maperã mɨa ma ewate “pia bɨda” aji, mãikꞌaapa ma ewate awara bɨji eperãarã ɨ̃idamerã.

12’Pãchi akꞌõre, pãchi nawe ome kꞌinia iru pꞌanapatáatɨ mãikꞌaapa ãra pedee ũripatáatɨ. Mãga ooruta pɨrã, taarã pꞌanapataadaitꞌee mɨa eujã teeitꞌee bɨde.

13’Chĩara peenáatɨ.

14’Taunemanáatɨ.

15’Nechɨanáatɨ.

16’Seewa jaranáatɨ chĩara kꞌachiade baaipidaitꞌee.

17’Kꞌɨ̃anáatɨ chĩara te, wẽra, esclavo, esclava, pꞌakꞌa, burro wa awaraa netꞌaa.

Israelitaarã pꞌera pꞌaneedapꞌedaa

18Israelitaarã jõmaarãpa ma pa tau pꞌorepꞌorepari nɨ̃bɨ mãikꞌaapa nari jɨ̃rakꞌawaa nɨ̃bɨ unudakꞌãri, ma awara pa jĩwaa nɨ̃bɨ, trompeta jĩwaa nɨ̃bɨ ũridakꞌãri, ãchobeedachida. Mapa ma eedeepa ãyaapai pꞌaneejida 19mãikꞌaapa Moisemaa mãgajida:

—Pɨta Tachi Akꞌõre pari tai ome pedéeji. Pɨa jara bɨkꞌa oodaitꞌee. Mamĩda Tachi Akꞌõre taimaa pedeepináaji, maa–e pɨrã tai kꞌiniidayada ajida.

20Mãpai Moisepa mãgaji:

—Pꞌeranáatɨ. Tachi Akꞌõrepa mãga jara cheji parãpa iru pedee kꞌawadamerã mãikꞌaapa iru waaweedamerã. Mãgá pꞌekꞌau kꞌachia ooda–e payada aji.

21Mãgá israelitaarã atꞌãri tꞌɨmɨɨpai pꞌanɨde, Moisés ma jɨ̃arara tꞌãmaa bɨ kꞌaitꞌa wãji.

Tachi Akꞌõrepa ley jarada altar oo kꞌawaadamerã

22Mama Tachi Akꞌõrepa Moisemaa mãgaji:

—Israelitaarãmaa nãga jaranáji: ‘‘Parãpa ũrijida mɨa pajãdeepa jarada. 23Ne–inaa nẽedee wa pꞌaratꞌadee oonáatɨ aɨ kꞌĩrapite ɨtꞌaa tꞌɨ̃daitꞌee mɨmaa ɨtꞌaa tꞌɨ̃patakꞌa. 24Mɨmaa akꞌɨpi kꞌinia pꞌanɨ pɨrã wãara mɨde ijãa pꞌanɨ, altar yoorodee óotɨ. Made oveja, chivo, wa pꞌakꞌa parãpa waridapꞌedaadepema ũkꞌuru peedapꞌeda, mɨ–itꞌee paa jõpítɨ mãikꞌaapa ũkꞌuru mɨ–itꞌee péetɨ pãchi aukꞌaarã ome jedekꞌodamerã. Mɨa parãmaa jararumãi parãpa mãga oodaipia bɨ mɨ kꞌirãpadamerã. Mãga oodakꞌãri, mɨa parã bendiciaitꞌee. 25Altar mãudee ooruta pɨrã, óotɨ mãu sĩda wẽe bɨdee. Mãu sĩda–idaa bɨdee ooruta pɨrã, ma altar mɨ–itꞌee awara bee–e pai. 26Ichiaba mɨ altarde tome bɨdaikꞌaraa bɨda aji, apidaapa parã kꞌãratau ununaadamerã ma tomede ɨtꞌaa wãdakꞌãri.”

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index