Search form

Éxodo 21

Tachi Akꞌõrepa ley jarada esclavoorã chipariirã–itꞌee

1Tachi Akꞌõrepa Moisemaa jaraji:

—Eperãarãmaa na ley jarateepáde aji.

2“Apidaapa hebreorãdepema esclavo aba neto ataru pɨrã, seis años mimia bapꞌeda, año sietede pëiipia bɨ; maarepida pꞌaratꞌa pꞌaapi–ee. 3Neto atakꞌãri, wẽra wẽe baji pɨrã, ituaba wãipia bɨ. Mamĩda neto atadai naaweda, wẽra paraa baji pɨrã, chi wẽra ome uchiaipia bɨ. 4Mamĩda esclavo chiparipa wẽra jɨrɨteeji pɨrã, iru ome pëiikꞌaraa bɨ. Ichiaba ma wẽra ome warrarã ooji pɨrã, pëiikꞌaraa bɨ chiparidé perã. 5Mamĩda ma esclavopa chipari, chi wẽra mãikꞌaapa chi warrarã kꞌinia bɨ pɨrã mãikꞌaapa wã kꞌinia–e bɨ pɨrã, waa mimiamaa beeipia bɨ. 6Mãga oo kꞌinia bɨ pɨrã, chiparipa ma esclavo ateeipia bɨ ɨtꞌaa tꞌɨ̃pata temaa Tachi Akꞌõre kꞌĩrapite. Mãpai puertamãi bainɨ̃ bapipꞌeda, ma esclavo kꞌɨɨrɨ punzonpa+ uyaipia bɨ. Mãga ookꞌãri, ma esclavo piurumaa chipari ome bapariitꞌee.

7’’Mamĩda eperãpa chi kꞌau netotꞌaaru pɨrã esclava pamerã, esclavo ɨmɨkꞌĩra ome oopatakꞌa oodaikꞌaraa bɨ. 8Chiparipa ma wẽra ichi wẽrakꞌa iru ba kꞌinia–e bɨ pɨrã, ma esclava chi ëreerãmaa netotꞌaaipia bɨ. Mamĩda awaraa eujãdepemaarãmaa netotꞌaaikꞌaraa bɨ ma wẽra akꞌõremaa jaradakꞌa oo–e pada perã. 9Jõdee esclava chiparipa iru neto ataji pɨrã chi warramaa teeitꞌee chi wẽra pamerã, ma esclava chiparipa ma wẽra ichi kꞌaukꞌa akꞌɨipia bɨ. 10Mamĩda esclava chiparipa ma wẽra chi wẽrakꞌa iru bɨde, awaraa wẽra ataru pɨrã chi wẽra pamerã, maarepida ma naarapema esclavamaa chikꞌo wa pꞌaru ma–ãriara teeikꞌaraa bɨ chi apema wẽramaa teepari kꞌãyaara mãikꞌaapa ichi kꞌapꞌɨa wãakꞌaikꞌaraa bɨ. 11Mamĩda ma ne–inaa õpee oo–e pɨrã, chi esclava arajãgaa pëiipia bɨ, pꞌaratꞌa maarepida pꞌaapi–ee.”

Tachi Akꞌõrepa ley jarada chĩaramaa ne–inaa kꞌachia oopataarã–itꞌee

12“Eperãpa ichi kꞌinia chĩara peeru pɨrã, ma eperã aukꞌa peetꞌaadaipia bɨ. 13Ichi kꞌinia pee–e paji pɨrã, awara ãi mɨa jararumaa pëidaipia bɨ chi piuda ëreerãpa peenaadamerã. 14Mamĩda ichi kꞌinia peeji pɨrã, mɨ altardepema cachokꞌa bɨ jitanaru pɨjida, mɨa iru chupɨria kꞌawa–e paitꞌee. Mapa mamãikꞌaapa ateedapꞌeda, peetꞌaadaipia bɨ.

15’’Eperãpa chi akꞌõre wa chi nawe sĩkꞌooru pɨrã, peetꞌaadaipia bɨ.

16”Eperãpa awaraa eperã secuestraaru pɨrã netotꞌaaitꞌee maa–e pɨrã ichi jua ekꞌari iru baitꞌee, ma eperã unu atadakꞌãri, peetꞌaadaipia bɨ. 17Eperãpa chi akꞌõreerãmaa ikꞌachia jararu pɨrã, peetꞌaadaipia bɨ.

18”Eperã omé chõo pꞌanɨde abaapa sĩru pɨrã juapa wa mãupa mãikꞌaapa ma eperã piu–ee ichi pꞌarudepai beeru pɨrã 19mãikꞌaapa tꞌẽepai pꞌirabaipꞌeda, bastón ome tꞌɨa beeru pɨrã, chi sĩda arajãgaa beei. Mamĩda irua pꞌaaipia bɨ chi apema pꞌarude ewari atuada mãikꞌaapa iru akꞌɨdapꞌedaa pari.

20”Eperãpa chi esclavo wa esclava pakꞌurupa wɨpꞌeda, piuru pɨrã, ma eperã miapidaipia bɨ ma piuda pari. 21Mamĩda kꞌãima abaamaa wa omeemaa ma esclavo pꞌirabairu pɨrã, chipari miapidaikꞌaraa bɨ ma esclavo irudé perã.

22”Ɨmɨkꞌĩraarã chõomaa pꞌanɨde wẽra biakꞌoo bɨ sĩruta pɨrã mãikꞌaapa ma sĩda kꞌaurepa warra ɨratɨadaru pɨrã, ma wẽra kꞌapꞌɨa pia beekꞌãri, chi ɨmɨkꞌĩrapa jara bɨkꞌa charraarãpa ma sĩdamaa pꞌaapidaipia bɨ. 23Mamĩda ma wẽra piuru pɨrã, chi sĩda peetꞌaadaipia bɨ. 24Tau ãridaru pɨrã, ichiaba chi sĩda tau ãritꞌaadaipia bɨ; kꞌida bɨadaru pɨrã, ichiaba chi sĩda kꞌida bɨatꞌaadaipia bɨ; jua pꞌu ootꞌaaru pɨrã, aukꞌa chi sĩda jua pꞌu ootꞌaadaipia bɨ; bɨɨrɨ pꞌu ootꞌaaru pɨrã, aukꞌa chi sĩda bɨɨrɨ pꞌu ootꞌaadaipia bɨ. 25Eperãpa tꞌɨpɨtaupa awaraa eperã paatꞌaaru pɨrã, aukꞌa paatꞌaadaipia bɨ. Ichiaba eperãpa awaraa eperã pꞌu ootꞌaaru pɨrã, maa–e pɨrã sĩtꞌaaru pɨrã, aukꞌa mãga oodaipia bɨ.

26”Chiparipa chi esclavo wa esclava taumaa sĩrupa tau ãridaru pɨrã, ma esclavo pëiipia bɨ. 27Ichiaba chiparipa chi esclavo sĩrupa chi kꞌida bɨadaru pɨrã, pëiipia bɨda” aji.

Tachi Akꞌõrepa ley jarada ne–animal chipariirã–itꞌee

28“Pꞌakꞌapa chi cachopa ɨmɨkꞌĩra wa wẽra supꞌeda, ma suda kꞌaurepa piuru pɨrã, ma pꞌakꞌa mãupa batꞌa peetꞌaadaipia bɨ mãikꞌaapa chi chiara kꞌodaikꞌaraa bɨ. Mamĩda ma pꞌakꞌa chipari miapidaikꞌaraa bɨ, iru kꞌaurepa–e pada perã. 29Mamĩda ma pꞌakꞌa kꞌachia bapari pɨrã mãikꞌaapa chi cachopa chi unuruta supari pɨrã, chiparipa kꞌawa bɨ chĩara peetꞌaai. Mãga kꞌawa bɨta, ichia ma pꞌakꞌa jɨ̃a–e bɨ pɨrã mãikꞌaapa ma pꞌakꞌapa ɨmɨkꞌĩra wa wẽra peeru pɨrã, ma pꞌakꞌa mãupa batꞌa peetꞌaadaipia bɨ. Ichiaba chipari peetꞌaadaipia bɨ. 30Ma pꞌakꞌa chipari pee kꞌiniada–e pꞌanɨ pɨrã, pꞌuuru pidaarã poro waibɨarãpa pꞌaratꞌa pꞌaapidaipia bɨ. 31Ma jaradakꞌa aukꞌa oodaipia bɨ pꞌakꞌapa warra maa–e pɨrã wẽra kꞌau sutꞌaaru pɨrã. 32Pꞌakꞌapa chĩara esclavo wa esclava sutꞌaaru pɨrã, ma pꞌakꞌa mãupa batꞌa peetꞌaadaipia bɨ. Maapꞌeda ma pꞌakꞌa chiparipa pꞌaratꞌa tau treinta pꞌaaipia bɨ ma esclavo chiparimaa.

33”Apidaapa pania tꞌɨpata pozo tꞌapꞌa–ee atabëiru pɨrã mãikꞌaapa aɨde chĩara pꞌakꞌa wa burro baairu pɨrã, 34ma pozo chiparipa pꞌaratꞌa pꞌaaipia bɨ ma ne–animal chiparimaa. Mamĩda ma pozo chipari ma ne–animal piuda ome beeipia bɨ.

35”Pꞌakꞌapa chi cachopa awaraa pꞌakꞌa su peetꞌaaru pɨrã, ma pꞌakꞌa chokꞌai netotꞌaadaipia bɨ mãikꞌaapa ma pꞌaratꞌa tꞌoodaipia bɨ. Ma awara chi pꞌakꞌa piuda chiara tꞌoodaipia bɨ. 36Mamĩda chi pꞌakꞌa chiparipa kꞌawa bɨ pɨrã ichi pꞌakꞌapa sui awaa bapari mãikꞌaapa ichiakꞌau bɨru pɨrã chĩara pꞌakꞌa su peemerã, ma pꞌakꞌa sui awaa bɨ chiparipa pꞌakꞌa awaraa teeipia bɨ ma pꞌakꞌa piuda pari. Jõdee ichi beei ma pꞌakꞌa piuda ome.”

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index