Search form

Éxodo 23

Tachi Akꞌõrepa awaraa ley jarada ichia kꞌinia bɨkꞌa pꞌanapataadamerã

1“Chĩarapa parãmaa bochinche jararuta pɨrã, awaraarãmaa nepɨrɨnáatɨ. Ma awara eperã ne–inaa kꞌachia ooyaa bɨ ome pedeeteenáatɨ charra kꞌĩrapite seewa jaradaitꞌee, mãgá iru kꞌaripadaitꞌee.

2”Ne–inaa kꞌachia oonáatɨ, awaraa eperãarã chokꞌaraarãpa mãga oo pꞌanɨ pɨjida.

”Charraarã kꞌĩrapite seewa jaranáatɨ, awaraa eperãarã chokꞌaraarãpa mãga jara pꞌanɨ pɨjida.

3”Ichiaba chupɨria beerã pedee audupɨara ijãadaikꞌaraa bɨ awaraa eperãarã pedee kꞌãyaara.

4”Parã kꞌĩra unuamaa iru pꞌanapataarã pꞌakꞌa wa burro mẽe atua ni unu ataruta pɨrã, chiparimaa teenátɨ. 5Ichita kꞌaripátɨ parã kꞌĩra unuamaa iru pꞌanapataarã. Ãra burro netꞌaa chɨkꞌɨapa eujãde baai bɨ unuruta pɨrã, kꞌaripátɨ.

6”Charraarã, chupɨria beerãpa parã kꞌĩrapite ãchi nepɨra jara chedakꞌãri, pia ũrítɨ. Ma awara ãrapa jaradapꞌedaa seewada anáatɨ, ãra chupɨria pꞌanadairã.

7”Ne–inaa kꞌachia ooda–e pꞌanɨɨrã ɨmɨateenáatɨ. Ãra peepináatɨ, ãrapa ne–inaa kꞌachia ooda–e pꞌanadairã. Apidaapa mãga ooru pɨrã, mɨa ma eperã ichita miapiitꞌee.

8”Eperãpa ne–inaa kꞌachia ookꞌãri, pꞌaratꞌa jitanáatɨ iru ma nepɨradeepa uchiapidaitꞌee, mãga oodakꞌãri awaraa eperã ne–inaa kꞌachia oo–e badata miapidaitꞌee perã. Chi mãgá pꞌaratꞌa jitadapa ichita mãga oopariitꞌee.

9”Awaraa eujãdepemaarãmaa ne–inaa kꞌachia oonáatɨ parã Egiptode pꞌanadakꞌãri, aukꞌa awaraa eujãdepemaarã padapꞌedaa perã. Parãpa kꞌawa pꞌanɨ sãga pꞌanapata awaraa eujãde pꞌanadakꞌãri.”

Tachi Akꞌõrepa ley jarada eujã ɨ̃ipipataadamerã mãikꞌaapa ɨ̃ipata ewari ɨapataadamerã

10“Seis años wãyaaru misa, parã eujãde ne–úutɨ mãikꞌaapa ewátɨ. 11Mamĩda año sietede ma eujã ɨ̃ipítɨ, madepema chupɨria chedeerãpa kꞌodamerã mãikꞌaapa chi beedadepema ne–animalaarãpa kꞌodamerã. Ichiaba mãga óotɨ uva kꞌãi ome mãikꞌaapa olivo kꞌãi ome.

12”Kꞌãima seis mimíatɨ. Mamĩda kꞌãima sietede ɨ̃́itɨ juatau jitadamerã parã, pãchi esclavoorã, awaraa eujãdepemaarã parã tꞌãide pꞌanapataarã, pãchi burroorã, pꞌakꞌaarã paara.

13”Ne–inaa jõmaweda óotɨ mɨa jaradakꞌa. Parã tꞌãide awaraarã akꞌõre waibɨa apataarã tꞌɨ̃ jaranaadapáde” aji.

Tachi Akꞌõrepa jarada año abaade fiesta õpee oodamerã

14“Año chaa parãpa mɨ–itꞌee fiesta õpee oodaipia bɨ. 15Pan levadura wẽe kꞌopata fiesta oodakꞌãri, mɨa jaradakꞌa tomia aba pan levadura wẽe ooda kꞌótɨ. Mãga óotɨ aviv atanede, ma atanede parã Egipto eujãdeepa uchiadapꞌedaa perã. Ma fiesta oodakꞌãri, mɨ–itꞌee ne–inaa wẽe chenáatɨ.

16”Parãpa ne–uu chauda ewadapꞌedaa fiesta oodakꞌãri, chi naapɨara ewadapꞌedaa mɨmaa anéetɨ. Año jõkꞌãri, ma fiesta aukꞌa óotɨ ne–uu chauda jõmaa ome.

17”Año chaa ɨmɨkꞌĩraarã jõmaweda cheda õpee chedaipia bɨ mɨ, Tachi Akꞌõremaa ɨtꞌaa tꞌɨ̃de.

18”Ne–animal peedapꞌeda, mɨ–itꞌee paapidaitꞌee aneedakꞌãri, chi waa paadaikꞌaraa bɨ pan levadura ome ooda ome. Ichiaba ma ne–animal traa ɨa bɨdaikꞌaraa bɨ aɨ noremapema–itꞌee.

19”Parãpa ne–uudapꞌedaadepema naapɨara ewadapꞌedaa pipɨara bee atéetɨ Tachi Akꞌõre, parã Akꞌõre Waibɨa ɨtꞌaa tꞌɨ̃pata temaa.

”Cabra chakꞌeerã peedapꞌeda, chi nawe jubade chuunaadapáde” aji.

Tachi Akꞌõre ángel

20Tachi Akꞌõrepa mãgaji:

—Mɨ ángel pëiitꞌee parã ode wãdade jɨ̃amerã mãikꞌaapa ma eujã parãmaa teeitꞌeeda adamaa ateemerã. 21Iru pedee ũripatáatɨ mãikꞌaapa irua jara bɨkꞌa oopatáatɨ, iru mɨ pari parã ome wãitꞌee perã. Iru parã ome bɨde irua jara bɨkꞌa ooda–e pɨrã, irua parã chupɨria kꞌawa–e paitꞌee. 22Mamĩda irua jara bɨkꞌa ooruta pɨrã, mɨa parã kꞌaripaitꞌee parã kꞌĩra unuamaa iru pꞌanapataarã mãikꞌaapa parã ome chõo kꞌinia pꞌanɨɨrã pꞌoyaadamerã. 23Iru parã naa wãitꞌee mãikꞌaapa parã ateeitꞌee nãgɨ́ pꞌuuru pidaarã pꞌanapata eujãdee: amorreorã, hititaarã, ferezeorã, cananeorã, heveorã mãikꞌaapa jebuseorã. Mɨa mãɨrã jõpiitꞌee. 24Ãra eujãde pꞌanadakꞌãri, oonáatɨ ãrapa oopatakꞌa mãikꞌaapa ɨtꞌaa tꞌɨ̃náatɨ ãra akꞌõre waibɨa apataarãmaa. Aba mɨmaa aupaita ɨtꞌaa tꞌɨ̃patáatɨ. Ãra altar ãrikꞌóotɨ ãra akꞌõre waibɨa apataarã ome, mãu awara bɨdapꞌedaa aɨ kꞌĩrapite ɨtꞌaa tꞌɨ̃pata paara. 25Mɨmaa aupai ɨtꞌaa tꞌɨ̃ruta pɨrã, mɨa parã bendiciaitꞌee kꞌayaanaadamerã mãikꞌaapa chikꞌo pania ome iru pꞌanadamerã. 26Parã tꞌãide wẽraarã warra tꞌodakꞌaa wẽ–e paitꞌee. Ma awara ãra warra ɨratɨada–e paitꞌee mãikꞌaapa parã pia pꞌanapataadaitꞌee chonaa parutamaa.

27’Parã wãyaaruta chaa mɨa ma eujãdepemaarã pꞌerapiitꞌee. Mãgá parã ãra eujã kꞌaitꞌa wãdakꞌãri, ãra pꞌeradaitꞌee mãikꞌaapa parã naa jĩchoodaitꞌee. 28Mãgá pꞌera jõnɨɨpa parã naa ma heveorã, hititaarã mãikꞌaapa cananeorã jĩchoodaitꞌee eperãarã netɨrrɨ waaweepa pꞌirapatakꞌa. 29Mamĩda año abaade mɨa ãra jõmaweda ãchi eujãdeepa jërekꞌoo–e paitꞌee, ãrapa ne–uudapꞌedaa siruanaamerã mãikꞌaapa ma eujãde ne–animal kꞌachia beerã ĩwadapꞌeda, parãmaa ne–inaa kꞌachia oonaadamerã. 30Maperã mɨa ãra piakꞌãa jërekꞌoo wãitꞌee, parã chokꞌara ĩwaruta misa ma eujãde pꞌanapataadamerã mãikꞌaapa ma eujã pãchi–itꞌee jãri atadamerã. 31Parãmaa, parãdeepa uchiadaitꞌeerãmaa paara, mɨa ma eujã jõmaweda teeitꞌee Mar Rojodeepa+ filisteorã eujã pꞌusa+ ide parumaa mãikꞌaapa eujã pania wẽe bɨdeepa Éufrates to parumaa. Mɨa ma eujãdepemaarã jõmaweda parã jua ekꞌari bɨitꞌee parãpa jërekꞌoodamerã.

32’Mamĩda ãra ome pacto oonáatɨ chõoda–ee pꞌanapataadaitꞌee mãikꞌaapa ãra akꞌõre waibɨa apataarãmaa ɨtꞌaa tꞌɨ̃náatɨ. 33Ãra pãchi eujãde ichiakꞌau bɨnaadapáde aji, parã ome pꞌanapataadamerã, ãrapa parãmaa ãchi akꞌõre waibɨa apataarãmaa ɨtꞌaa tꞌɨ̃pi kꞌinia pꞌanadaitꞌee perã mãikꞌaapa mãgá parã mɨ kꞌĩrapite kꞌachiade baaidaitꞌee perã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index