Search form

Éxodo 25

Tachi Akꞌõrepa jarada israelitaarãpa ichi ome unupata te oodamerã

1Moisés ma eede bakꞌãri, Tachi Akꞌõrepa irumaa mãgaji:

2—Jaráji israelitaarãmaa mɨ–itꞌee netꞌaa pꞌedamerã. Chi tee kꞌinia bɨpa ichi tꞌãripa tee kꞌinia bɨta teeipia bɨ. 3Nãgee netꞌaata pɨa pꞌeipia bɨ: nẽe; pꞌaratꞌa; bronce; 4oveja kꞌara pꞌãpꞌãraa, pꞌoree, pꞌupꞌuchia tꞌɨda; pꞌaru lino nãusaadee ooda; cabra kꞌara; 5oveja ɨmɨkꞌĩra e pꞌoree tꞌɨda mãikꞌaapa awaraa ne–animalaarã e, chi pipɨara bɨ; acacia pakꞌuru pia; 6aceite olivodee ooda lamparade tꞌɨdaitꞌee; kꞌera pꞌoiradaitꞌee aceite ome+ mãikꞌaapa ne–inaa tꞌũa bapari mɨ–itꞌee paadamerã; 7mãu pi–ia ónice awaraa mãu pi–ia ome bɨdaitꞌee pꞌaareerã poro waibɨa efod apatade mãikꞌaapa ne–inaa tꞌũade jɨ̃paride. 8Ma ne–inaa pꞌe atapꞌeda, ãramaa te ne–edee oopíji, mɨ–itꞌee awara beemerã mãikꞌaapa mama parã tꞌãide mɨ bapariimerã. 9Jõmaweda oodaipia bɨda aji, mɨa pɨmaa akꞌɨpiitꞌee bɨkꞌa.

Tachi Akꞌõrepa Moisemaa jarada baaltekꞌa bɨ oopimerã

10’Acacia pakꞌurudee baaltekꞌa bɨ oopíji metro aba apꞌeda diez centímetros chi teesoo; setenta centímetros chi jetꞌee; setenta centímetros chi ɨtꞌɨa. 11Ma baaltekꞌa bɨ taawaikꞌa eere, edajãde paara nẽepapai pꞌẽepíji. Ne–inaa nẽedee nonoree oopíji, mãgɨpa chi taawaikꞌa eerepema i jõma pꞌɨrrabaimerã. 12Ichiaba argolla kꞌĩmari nẽedee oopíji, ma baaltekꞌa bɨ bɨɨrɨ kꞌĩraichaa bɨdamerã; omé bi abaade, omé chi apema bide. 13Ma awara acacia pakꞌurudee pakꞌuru omé teesoo oopíji mãikꞌaapa ma pakꞌuru nẽepa pꞌẽepíji. 14Ma pakꞌuru ma baaltekꞌa bɨ argolla kꞌĩraichaa tꞌɨ bɨ́ji. Mãgá ma baaltekꞌa bɨ ãyaa ateedai, tꞌõbaida–ee. 15Ma pakꞌuru ichita ma argollade tꞌɨ pꞌanadaitꞌee. 16Ma baaltekꞌa bɨ edajãde mɨa ley mãude pꞌãda atabɨ́ji.

17’Ma baaltekꞌa bɨ tꞌapꞌa+ nẽedee oopíji; metro aba apꞌeda diez centímetros chi teesoo; setenta centímetros chi jetꞌee. 18-19Ma tꞌapꞌa oopikꞌãri, mãgɨ́ nẽe lámina abaadee martillopa ɨtꞌaripemaarãkꞌa muñecakꞌa bɨ omé oopíji aɨ ɨ̃rɨ aba–abaa chi teesoomaa bainɨ̃ pꞌaneedamerã. 20Ma ɨtꞌaripemaarãkꞌa oopíji baaltekꞌa bɨ tꞌapꞌa ɨ̃rɨ bainɨ̃ pꞌaneedamerã mãikꞌaapa kꞌĩrapa edaa chi tꞌapꞌamaa akꞌɨdamerã. Oopíji ma baaltekꞌa bɨ tꞌapꞌa ɨ̃rɨ chi isia eratɨ jõnɨpa wãkꞌadamerã. 21Ma tꞌapꞌa oo aupadakꞌãri, bɨpíji ma baaltekꞌa bɨ ɨ̃rɨ. Mɨa ley pꞌãda teeitꞌee bɨ aɨde ɨa bɨ́ji. 22Ma ɨtꞌaripemaarãkꞌa omé pꞌanɨ esajĩakꞌa mɨ pɨ ome unupariitꞌee mãikꞌaapa pedeepariitꞌee. Mãgá pɨa israelitaarãmaa mɨ ley jarateeyada aji.

Tachi Akꞌõrepa Moisemaa jarada mesa oopimerã

23’Mesa acacia pakꞌurudee oopíji mɨ tede bɨdamerã. Oopíji noventa centímetros chi teesoo; cuarenta y cinco centímetros chi jetꞌee; setenta centímetros chi ɨtꞌɨa. 24Ma jõma nẽepapai pꞌẽepipꞌeda, ne–inaa nẽedee ooda nonoree bɨpíji ma mesade pꞌɨrrabaimerã. 25Ma mesa ide tabla jetꞌee siete centímetros bɨpíji, mãikꞌaapa ne–inaa nẽedee ooda nonoree bɨpíji ma tabla ide pꞌɨrrabaimerã. 26Ichiaba nẽedee argolla kꞌĩmari oopíji ma mesa esquina chaa argolla aba bɨdamerã chi mesa bɨɨrɨ bɨmãi. 27-28Ichiaba acacia pakꞌurudee oopíji pakꞌuru teesoo omé mãikꞌaapa ma pakꞌuru nẽepa pꞌẽepíji. Ma pakꞌuru tꞌɨ bɨdaipia bɨ ma argollade. Mãgá ma mesa ãyaa ateedai. 29Ne–inaa ma mesa ɨ̃rɨ bɨpata jõmaweda nẽedee oopíji: pꞌaratꞌu, taza, kꞌusarra, jarra mãikꞌaapa vaso mɨ–itꞌee vino weepari. 30Ma mesa mɨ kꞌĩrapite baitꞌee perã, aɨ ɨ̃rɨ ichita bɨpipáde aji, pan mɨ–itꞌee awara bɨdapꞌedaa.

Tachi Akꞌõrepa Moisemaa jarada lámpara bɨpata oopimerã

31’Ichiaba nẽedee oopíji lámpara bɨpata; chi basa, chi bɨɨrɨ mãikꞌaapa chi jua tꞌai. Ma jua tꞌai kꞌɨ̃ chaa copa oopíji almendro pꞌonokꞌa chi kꞌiru ome, aɨde ma lámpara kꞌoopata aceite weedamerã. Ma jõma nẽe lámina abaadee martillopa oopíji. 32Ma lámpara bɨpata bɨɨrɨde jua tꞌai seis oopíji, kꞌĩraichaa õpee–õpee pꞌaneedamerã. 33Ma jua tꞌai chaachaa, copa õpee oopíji almendro pꞌonokꞌa chi kꞌiru ome. 34Ma lámpara bɨpata bɨɨrɨde ichiaba copa kꞌĩmari oopíji almendro pꞌonokꞌa chi kꞌiru ome, 35madepema copa õpeedeepa jua tꞌai omé uchiadamerã; aba chi i chaa. 36Ma jõma nẽe lámina abaadee martillopa oopiipia bɨ. 37Lámpara siete oopíji nokꞌooree ɨ̃daamerã. 38Ma awara nẽedee oopíji tijerakꞌa, mãgɨpa lámpara mecha tꞌɨɨpataadamerã. Ichiaba oopíji platillo aɨde ma tijerakꞌa, mecha ome bɨdamerã. 39Ma lámpara bɨpata, chi tijerakꞌa, chi mecha chi platillo paara; ma jõma oodaitꞌee nẽe treinta y tres kilos iru pꞌanadaipia bɨ. 40Ma lámpara bɨpata mɨa na ee nokꞌode akꞌɨpidakꞌa aukꞌa oopipáde aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index