Search form

Éxodo 26

Tachi Akꞌõrepa Moisemaa jarada ichi te oopimerã

1’Cortina diez oopíji, ma te edajãde mɨ–itꞌee awara bɨdamerã. Ma cortina oopíji lino nãusaadee mãikꞌaapa made ɨtꞌaripemaarãkꞌa kꞌapíji oveja kꞌara pꞌãpꞌãraa, pꞌupꞌuchia, pꞌoree tꞌɨdadee. 2Ma cortina chaa nãga oopíji; doce metros apꞌeda cincuenta centímetros chi teesoo; metro aba apꞌeda ochenta centímetros chi jobɨa. 3Ma cortina diezdepema joisomaa araa kꞌaatꞌɨpíji cortina aba uchiamerã. Aukꞌa oopíji chi apema joisomaa ome. 4Pꞌaru pꞌupꞌuchia sĩautaa tꞌɨɨpíji teesoomaa bedapꞌeda, pꞌɨtrɨa kꞌaatꞌɨdamerã. Mãgee oopíji ma cortina omeeweda chi i chaa kꞌaatꞌɨdamerã. 5Chi naapema cortina ide mãgee cincuenta kꞌaatꞌɨpíji mãikꞌaapa chi apema cortina ide aukꞌa mãga oopíji, mãgá ma cortina i omeeweda ganchopa araa jõi pꞌaneedamerã. 6Ma–itꞌee gancho cincuenta nẽedee oopíji, mãgɨpa chi cortina i jõi pꞌaneedamerã te jãdepema pared–itꞌee.

7’Ichiaba cortina teesoo once cabra kꞌaradee kꞌada oopíji, mãgɨpa chi te kꞌirukꞌa bɨdamerã. 8Ma cortina chaachaa oopíji trece metros apꞌeda cincuenta centímetros chi teesoo mãikꞌaapa metro aba apꞌeda ochenta centímetros chi jobɨa. 9Ma cortina oncedepema joisomaa araa kꞌaatꞌɨpíji; chi apema seis ichiaba araa kꞌaatꞌɨpíji. Ma seidepema aba bedadaipia bɨ, mãgɨpa ma te edajãde tꞌĩupatamãi tꞌapꞌadamerã. 10Ma cortina araa pꞌaneedamerã pꞌaru sĩautaa tꞌɨɨpíji teesoomaa bedadapꞌeda, pꞌɨtrɨa kꞌaatꞌɨdamerã. Chi naapema cortina ide mãgee cincuenta kꞌaatꞌɨpíji mãikꞌaapa chi apema cortina ide aukꞌa mãga oopíji, mãgá ma cortina i omeeweda araa jõi pꞌaneedamerã. 11Ma–itꞌee gancho broncedee cincuenta oopíji, mãgɨpa chi cortina cabra kꞌaradee oodade araa jõi pꞌaneedamerã. 12Ma cortina teesoora baitꞌee perã, te ãpɨteikꞌa eere ma cortina esa–aukꞌa baijira beeitꞌee. 13Jõdee teesoomaa chi i chaa cincuenta centímetros baijira beeitꞌee.

14’Ma cortina ɨ̃rɨikꞌa eere oveja e pꞌoree tꞌɨda bɨpíji. Aɨ ɨ̃rɨikꞌa eere ne–e pipɨara bee bɨpíji.

15Tabla acacia pakꞌurudee oopipꞌeda, jĩpꞌa bainɨ̃ bɨpíji, chi paredkꞌa beemerã. 16Mãgɨ́ tabla chaa oopíji metro kꞌĩmari apꞌeda cincuenta centímetros chi teesoo mãikꞌaapa setenta centímetros chi jetꞌee. 17Ma tabla i abaade muesca omé oopíji chi apema tabla ide jootꞌɨ beemerã mãikꞌaapa ma tabla edaikꞌa eere muesca omé oopíji basade pia jootꞌɨ pꞌaneedamerã ma te bainɨ̃ bɨdakꞌãri. Mãga oopíji ma tedepema tabla chaachaa. 18Ma te sur eerepema pared–itꞌee veinte tablas oopíji. 19Ichiaba basa cuarenta pꞌaratꞌadee oopíji ma tabladepema muesca chaachaa basa abaade jootꞌɨ bɨdamerã.

20’Norte eerepema pared–itꞌee aukꞌa veinte tablas oopíji. 21Ichiaba basa cuarenta pꞌaratꞌadee oopíji, ma tabla chaa basa omeede bainɨ̃ bɨdamerã. 22Ma te ãpɨteikꞌa eere, occidente eere, seis tablas bainɨ̃ bɨpíji; 23ma chaachaa basa omé. Ma awara esquina chaa awaraa tabla omé chi basa ome bainɨ̃ bɨpíji. 24Ma tabla pareddepema tabla ome araa jootꞌɨ bɨpiipia bɨ chi naapema ɨtꞌaikꞌa eerepema argolla parumaa. Mãga oopíji ma ãpɨteikꞌa eerepema esquina chaa. 25Mãgá ma eere tabla ocho jootꞌɨ pꞌaneedaitꞌee dieciséis basas pꞌaratꞌadee oodade.

26’Ma tabla erkꞌa pꞌaneedamerã pakꞌuru teesoo joisomaa acacia pakꞌurudee oopíji pared bi abaade teesoomaa bɨdamerã. 27Aukꞌa mãga oopíji aɨ kꞌĩrapitepema paredde, ma te ãpɨteikꞌa eere, pia jaraitꞌeera occidente eerepema paredde paara mãga bɨdamerã. 28Ma pakꞌuru joisomaadepema aba bɨpiipia bɨ ma pared bi esa–aukꞌa, jĩpꞌa wãyaamerã esquina abaadeepa chi apema esquina parumaa. 29Ma tabla chaa nẽepa pꞌẽepíji mãikꞌaapa aɨde argolla nẽedee ooda bɨpíji. Ichiaba ma pakꞌuru joisomaa nẽepa pꞌẽepíji ma argollade tꞌɨ bɨdamerã. 30Ma jõma mɨa pɨmaa ee nokꞌode akꞌɨpidakꞌa oopíji. 31Te edajãdepema–itꞌee cortina awaraa oopíji pꞌaru lino nãusaadee mãikꞌaapa made ɨtꞌaripemaarãkꞌa bee kꞌapíji oveja kꞌara pꞌãpꞌãraa, pꞌupꞌuchia, pꞌoree tꞌɨdadee. 32Edupɨara bɨ cuarto tꞌɨakꞌau beemerã poste kꞌĩmari acacia pakꞌurudee ooda erkꞌa bainɨ̃ bɨpíji basa kꞌĩmari pꞌaratꞌadee oodade. Ma poste nẽepa pꞌẽepíji. Ichiaba gancho nẽedee ooda ma poste kꞌĩmariide bɨpíji ma ganchode ma cortina jõi bɨdamerã. 33Mãgɨ́ cortina ganchode jõi bɨdapꞌeda, mãgɨpa te edajãde tꞌɨakꞌau bɨpíji, edupɨara bɨ cuarto mɨ–itꞌee awara beemerã ma baaltekꞌa bɨ ome mãikꞌaapa taawaikꞌa eerepema cuarto mɨ netꞌaa–itꞌee awara beemerã. Mɨa ley jarada ma baaltekꞌa bɨde ɨa bɨ́ji, israelitaarãpa kꞌirãpadamerã mɨa ãra ome pacto ooda. 34Ma baaltekꞌa bɨ chi tꞌapꞌa+ ome edupɨara bɨ cuarto mɨ–itꞌee awara bɨdaitꞌee pꞌanɨmãi bɨpíji. 35Jõdee ma mesa taawapema cuartode norte eere bɨpíji mãikꞌaapa ma lámpara bɨpata aɨ kꞌĩrapite sur eere bɨpíji.

36’Ma te tꞌĩupatamãipema–itꞌee oopíji cortina lino nãusaadee mãikꞌaapa made nonoree kꞌapíji oveja kꞌara pꞌãpꞌãraa, pꞌupꞌuchia, pꞌoree tꞌɨdadee. 37Ma cortina jõi bɨdamerã, acacia pakꞌurudee poste joisomaa oopíji gancho ome mãikꞌaapa ma jõmaweda nẽepa pꞌẽepíji. Ma poste basa joisomaa broncedee oodade bainɨ̃ bɨpíji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index