Search form

Éxodo 27

Tachi Akꞌõrepa Moisemaa jarada altar broncedee oopimerã

1’Altar nẽchoma acacia pakꞌurudee oopíji; metro omé apꞌeda treinta centímetros chi teesoo, chi jetꞌee jida aukꞌa mãikꞌaapa metro aba apꞌeda treinta centímetros chi ɨtꞌɨa. 2Ma pakꞌurudee ichiaba oopíji ne–animal cachokꞌa ma altar esquina chaa pꞌaneedamerã mãikꞌaapa ma jõma broncepa pꞌẽepíji. 3Ichiaba broncedee oopíji nãgee ne–inaa jõma ma altarde bɨdamerã: itꞌabarre pꞌora pꞌepata; pala; taza; tenedor mãikꞌaapa tꞌɨpɨ kꞌĩra pꞌepata. 4Rejilla broncedee oopíji mãikꞌaapa ma esquina chaa argolla broncedee ooda bɨpíji. 5Ma rejilla bɨdaipia ma altar edajãde esajĩakꞌa. 6Ma altar–itꞌee pakꞌuru teesoo oopíji acacia pakꞌurudee mãikꞌaapa broncepa pꞌẽepíji. 7Ma pakꞌuru tꞌɨ bɨdaipia bɨ chi argolla ma altar bi chaa beede. Mãgá ma altar ãyaa ateedai. 8Ma altar baaltekꞌa bɨ pakꞌurudee oopíji tꞌapꞌa wẽe mãikꞌaapa jã wẽe, mɨa pɨmaa akꞌɨpidakꞌa ee nokꞌode bakꞌãri.

Tachi Akꞌõrepa Moisemaa jarada ichi te ãukꞌidaa tꞌɨakꞌau bɨdamerã

9’Te ãukꞌidaa tꞌɨakꞌau bɨpíji cortina pꞌaru lino nãusaadee oodapa. Sur eere tꞌɨakꞌau bɨdamerã, cuarenta y cinco metros chi teesoo oopíji. 10Ma eerepema ide poste veinte pakꞌurudee ooda mãikꞌaapa broncepa pꞌẽeda aba–abaa basa veinte broncedee oodade bainɨ̃ bɨpíji. Ma poste chaa gancho pꞌaratꞌadee ooda bɨpíji mãikꞌaapa pꞌaratꞌadee pakꞌurukꞌa teesoo oopíji ma poste kꞌɨ̃ chaa tꞌɨakꞌau beemerã. 11Chi norte eerepema tꞌɨakꞌau bɨdamerã, aukꞌa mãga oopíji. 12Jõdee occidente eerepema chi jetꞌee oopíji veintidós metros apꞌeda cincuenta centímetros. Made poste diez bainɨ̃ bɨpíji basa diezde, ma postede cortina jõi bɨdamerã. 13Chi oriente eerepema aukꞌa veintidós metros apꞌeda cincuenta centímetros oopíji. 14-15Ma oriente eere chi tꞌĩupata bɨpíji. Chi tꞌĩupata i chaa bɨpíji poste õpee chi basa ome mãikꞌaapa cortina siete metros chi teesoo bɨpíji. 16Jõdee chi tꞌĩupatade poste kꞌĩmari bɨpíji chi basa ome. Made jõi bɨpíji cortina lino nãusaadee ooda mãikꞌaapa made nonoree kꞌapíji oveja kꞌara pꞌãpꞌãraa, pꞌupꞌuchia, pꞌoree tꞌɨdadee mãikꞌaapa hilo lino nãusaa oodadee. Ma cortina teesoo nueve metros oopíji. 17Ma te ãukꞌidaa tꞌɨakꞌau bɨdepema poste broncepa pꞌẽeda basa broncedee oodade bainɨ̃ bɨpíji. Ma poste chaachaa gancho pꞌaratꞌadee ooda bɨpíji mãikꞌaapa pꞌaratꞌadee pakꞌurukꞌa teesoo oopíji ma poste kꞌɨ̃ chaa tꞌɨakꞌau beemerã. 18Ma tꞌɨakꞌau bɨ teesoo cuarenta y cinco metros baitꞌee; chi jetꞌee veintidós metros apꞌeda cincuenta centímetros baitꞌee; chi ɨtꞌɨa metro omé apꞌeda treinta centímetros baitꞌee. Ma poste basa broncedee oodade bainɨ̃ bɨdapꞌeda, aɨde cortina lino nãusaadee ooda jõi bɨpíji. 19Ma tedepema mãikꞌaapa te ãukꞌidaapema estaca jõmaweda broncedee oopíji. Ichiaba broncedee ne–inaa oopipáde aji, ma tede mimiadakꞌãri, mãgee ne–inaapa mimiadamerã.

Tachi Akꞌõrepa Moisemaa jarada aceite oopimerã ichi tedepema lampara–itꞌee

20’Israelitaarãmaa jaráji aceite olivodee ooda aneedamerã. Ma aceite maarepida nejarra wẽe baipia bɨ. Ma aceitepa mɨ tedepema lámpara kꞌoodaipia bɨ, kꞌewaradeepa tapꞌeda parumaa ichita urua nɨ̃bamerã. 21Mɨ ome unupata tede Aaronpa mãikꞌaapa ichideepa uchiadaitꞌeerãpa ma lámpara ichita kꞌoodaipia bɨ pꞌãrikꞌua uruadamerã mɨ kꞌĩrapite ma tꞌɨakꞌau bada cortina taawaikꞌa eerepema cuarto mɨ netꞌaa–itꞌee awara bɨdaitꞌee pꞌanɨde. Mɨa kꞌinia bɨ israelitaarãdeepa uchiadaitꞌeerãpa ichita mãga oodamerã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index