Search form

Éxodo 3

Tachi Akꞌõrepa Moisemaa jarada israelitaarã kꞌaripamerã

1Moisés chãure Reuel ichiaba tꞌɨ̃jarapachida Jetro. Ma Jetro Madiandepema pꞌaare paji.

Ewari aba Moisepa Jetro ovejaarã akꞌɨmaa bakꞌãri, eujã pania wẽe bɨdeepa tꞌɨmɨpɨara pꞌe ateeji. Panaji Horeb+ eede; Tachi Akꞌõre ee apatapꞌedaamãi. 2Mama Tachi Akꞌõre angelpa ichi Moisemaa unupiji zarzade+ Ma zarzade tꞌɨpɨtaukꞌa urua nɨ̃baji, kꞌĩi–ee. Moisepa pia akꞌɨkꞌãri, kꞌawaaji ma zarza paa jõ–e nɨ̃bɨ. 3Mapa kꞌĩsiaji: “¿Na kꞌãarema? ¿Sãapꞌeda paa jõ–ema? Kꞌaitꞌaara akꞌɨde wãitꞌeeda” aji. 4Kꞌaitꞌaara wãkꞌãri, Tachi Akꞌõrepa ma zarzadeepa tꞌɨ̃jaraji:

—Moisés, Moisés.

Moisepa pꞌanauji:

—Nama bɨda aji.

5Mãpai Tachi Akꞌõrepa mãgaji:

—Kꞌaitꞌaara chenáaji. Pɨchi chancla ẽra bɨ́ji, nama pɨ mɨ kꞌĩrapite bainɨ̃ bairã. 6Mɨ pɨ akꞌõre Akꞌõre Waibɨa, ichiaba pɨ chonaarã Abraham, Isaac mãikꞌaapa Jacob ijãadapꞌedaa Akꞌõre Waibɨa.

Moisepa mãga ũrikꞌãri, ichi kꞌĩra wãkꞌaji, waawee bada perã Tachi Akꞌõremaa akꞌɨitꞌee.

7Mãpai Tachi Akꞌõrepa mãgaji:

—Mɨa unu bɨ mɨ eperãarã Egiptode chupɨria pꞌanɨ. Ũri bɨ ãra chupɨria bia jõnɨ, esclavoorã poro waibɨarãpa ãra miapi iru pꞌanadairã. 8Maperã cheji Egipto pidaarã juadeepa kꞌaripaitꞌee. Ma eujãdeepa ateeitꞌee eujã pi–iadee; eujã waibɨadee, leche, miéle+ ome waibɨa paraamãi. Mama pꞌanapata nãgɨ́ eperãarã: cananeorã, hititaarã, amorreorã, ferezeorã, heveorã mãikꞌaapa jebuseorã. 9Mɨa israelitaarã biapi ũri bɨ mãikꞌaapa unu bɨ Egipto pidaarã juade ãra chupɨria pꞌanɨ. 10Mapa Faraonmaa wãpáde aji, mɨ eperãarã, israelitaarã Egipto eujãdeepa uchia atade.

11Mamĩda Moisepa pꞌanauji:

—Mɨ eperãarã poro waibɨa–epɨ Faraón kꞌĩrapite wãitꞌee. Mɨa israelitaarã Egipto eujãdeepa pꞌoyaa uchia ata–eda aji.

12Mãpai Tachi Akꞌõrepa mãgaji:

—Mɨ pɨ ome baitꞌee. Pɨa Egipto eujãdeepa mɨ pꞌuuru pidaarã uchia atakꞌãri, nãgɨ́ eede parã jõmaarãpa mɨmaa ɨtꞌaa tꞌɨ̃daitꞌeeda aji. Mãga pꞌasakꞌãri, kꞌawadaitꞌee mɨata pɨ pëiji.

13Mãpai Moisepa mãgaji:

—Mɨa israelitaarãmaa jararu pɨrã: “Tachi Akꞌõre, parã chonaarã Akꞌõre Waibɨapa mɨ pëiji”, ãrapa pɨ tꞌɨ̃ kꞌawa kꞌinia pꞌanadaitꞌee. Mãga iididakꞌãri, ¿mɨa sãga pꞌanauyama? aji.

14Tachi Akꞌõrepa pꞌanauji:

—Mɨta chi ichita baparida+ aji. Israelitaarãmaa nãga jaranáji: “Chi ichita baparipa mɨ pëiji parã kꞌaripamerã.”

15Ma awara Tachi Akꞌõrepa mãgaji:

—Ichiaba nãga jaráji: “Mɨ pëiji tachi chonaarã Abraham, Isaac mãikꞌaapa Jacob ijãadapꞌedaa Akꞌõre Waibɨapa. Iru tꞌɨ̃jarapata Tachi Akꞌõre.” Parã israelitaarãpa, parãdeepa uchiadaitꞌeerãpa paara ichita mɨ mãga tꞌɨ̃jarapataadaitꞌee. 16Egiptode panakꞌãri, jara pë́iji israelitaarã poro waibɨarãmaa chipꞌedaidamerã. Maapꞌeda ãramaa nãga jaráji: “Tachi Akꞌõre, parã chonaarã Akꞌõre Waibɨa, Abraham, Isaac mãikꞌaapa Jacob Akꞌõre Waibɨapa ichi mɨmaa unupiji. Mɨmaa jaraji ichia wãara unu bɨ parã israelitaarã chupɨria chitoonɨ Egipto pidaarã juade. 17Ichiaba jaraji ichia parã uchiapiitꞌee ma Egipto pidaarã juadeepa mãikꞌaapa parã ateeitꞌee eujã pi–ia bɨde, leche, miéle waibɨa paraamaa. Ma eujãde pꞌanapata cananeorã, hititaarã, amorreorã, ferezeorã, heveorã mãikꞌaapa jebuseorã.”

18Ma awara Tachi Akꞌõrepa Moisemaa mãgaji:

—Pɨa israelitaarã poro waibɨarãmaa mãga jaranakꞌãri, pɨ pedee ijãadaitꞌee mãikꞌaapa pɨ ome Egiptodepema reymaa wãdaitꞌee. Mama panadakꞌãri, irumaa pɨa nãga jaráji: “Tachi Akꞌõre, hebreorã Akꞌõre Waibɨa tai ome unuji. Mapa tai pë́iji eujã pania wẽe bɨdee. Kꞌãima õpee ma eujãde wãyaadaitꞌee mãikꞌaapa ne–animalaarã peedapꞌeda, paadaitꞌee Tachi Akꞌõre, tai Akꞌõre Waibɨa–itꞌee.” 19Pɨa Egiptodepema reymaa mãga jararu pɨjida, mɨa kꞌawa bɨ irua parã pëi–e paitꞌee mɨa pëipi–emaa. 20Mapa mɨa mɨ jua Egipto pidaarãmaa unupiitꞌee. Ãra miapiitꞌee mãikꞌaapa chokꞌara piudaitꞌee mɨa ookꞌãri ne–inaa eperãarãpa pꞌoyaa oodakꞌaa ãchi juadoopa. Maapꞌeda Faraonpa parã pëiitꞌee. 21Ma awara mɨa Egipto pidaarãmaa kꞌĩsiapiitꞌee israelitaarã kꞌaripadamerã mãikꞌaapa ãramaa netꞌaa teedamerã. 22Israelitaarã wẽraarãpa iididakꞌãri ãchi kꞌaitꞌa pꞌanapataarãmaa wa awaraa Egiptodepemaarãmaa, teedaitꞌee ne–inaa pꞌaratꞌadee ooda, nẽedee ooda mãikꞌaapa parã warrarã–itꞌee, wẽra kꞌaurã–itꞌee pꞌaru teedaitꞌee. Mãgá mɨa parãmaa Egiptodepemaarã netꞌaa teeitꞌeeda aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index