Search form

Éxodo 30

Tachi Akꞌõrepa jarada altar kꞌaipee oodamerã

1’Awaraa altar acacia pakꞌurudee oopíji, ma altarde ne–inaa tꞌũa bapari mɨ–itꞌee paadamerã. 2Oopíji cuarenta y cinco centímetros chi teesoo; aukꞌa chi jetꞌee; jõdee noventa centímetros chi ɨtꞌɨa. Mãgɨ́ pakꞌurudee ichiaba ne–animal cachokꞌa oopíji ma altar esquina chaa. 3Ma altar jõma nẽepapai pꞌẽepíji mãikꞌaapa ne–inaa nẽedee nonoree oopíji, chi taawaikꞌa eerepema ide pꞌɨrrabaimerã. 4Ichiaba argolla nẽedee oopíji, ma altar bi chaa omee–omee bɨdamerã ma ne–inaa nẽedee ooda edaikꞌa eere, ma argollade pakꞌuru teesoo tꞌɨ bɨdamerã mãikꞌaapa ãyaa ateedakꞌãri mãgɨde jitadamerã. 5Ma pakꞌuru omé acacia pakꞌurudee oopíji mãikꞌaapa nẽepa pꞌẽepíji. 6Ma altar bɨpíji ma cortinapa tꞌɨakꞌau bɨda taawaikꞌa eere, edupɨara bɨ cuartodepema baaltekꞌa bɨ kꞌaitꞌa. Ma baaltekꞌa bɨde mɨ ley pꞌãda bɨ́ji, kꞌirãpadamerã mɨa parã ome pacto ooda. Mama ma baaltekꞌa bɨ tꞌapꞌa ɨ̃rɨ pꞌaareerã poro waibɨapa ne–animalaarã waa pꞌuruitꞌee, mɨa israelitaarãpa pꞌekꞌau kꞌachia oopatapꞌedaa ãyaa bɨmerã. Ma baaltekꞌa bɨmãi mɨ pɨ ome unuitꞌee. 7Ewari chaa tapꞌedaweda Aaronpa mɨ tedepema lámpara kꞌĩi chekꞌãri, mɨ–itꞌee ne–inaa tꞌũa bapari ma altarde paaipia bɨ. 8Ichiaba akꞌõrejĩru baaikꞌãri mãikꞌaapa irua ma lámpara kꞌoo chekꞌãri, mɨ–itꞌee ne–inaa tꞌũa bapari ma altarde paaipia bɨ. Ichita mãga oodaipia bɨ mɨ, Tachi Akꞌõre, kꞌĩrapite. 9Ma altarde pꞌaarepa nãgee ne–inaa paaikꞌaraa bɨ: awaraa ne–inaa tꞌũa bapari mɨa jara–e pada; ne–animalaarã mɨ–itꞌee paa jõpipata; netꞌa tau mãikꞌaapa aɨ ɨ̃rɨ vino weeikꞌaraa bɨ. 10Ma altar mɨ–itꞌee aupai awara baitꞌee. Año chaa Aaronpa ne–animal peekꞌãri mɨa eperãarãpa pꞌekꞌau kꞌachia oodapꞌedaa ãyaa bɨmerã, ma ne–animal peeda waapa ma altar cachokꞌa beede pꞌuruipia bɨ, ma altar maarepida kꞌachia wẽe beemerã. Año chaa pꞌuruda apai pꞌuruipia bɨ. Pꞌaareerã poro waibɨapa ichita mãga ooipia bɨda aji.

Tachi Akꞌõrepa jarada ichi–itꞌee pꞌaratꞌa teedamerã

11Tachi Akꞌõrepa Moisemaa mãgaji:

12—Israelitaarã juasiakꞌãri, ãra chaachaa jaráji mɨ–itꞌee pꞌaratꞌa teedamerã mɨa ãra chokꞌai iru bɨ pari. Ãra juasiaruta chaa mãgá pꞌaratꞌa teeda–e pɨrã, ãramaa kꞌayaa kꞌachia bariitꞌee. 13Ãra juasiakꞌãri, tꞌɨ̃ pꞌã́ji. Ãra chaachaa siclo+ esa–aukꞌa mɨ tedepema balanzade chaapatakꞌa mɨmaa teedaipia bɨ. 14Israelitaarã jõmaweda veinte añodeepa waa iru pꞌanɨɨrãpa siclo esa–aukꞌa mɨmaa teedaipia bɨ. 15Mɨa israelitaarã chokꞌai pꞌanapimerã, ma gramo seis pꞌaadakꞌãri, pꞌaratꞌara beerãpa seis gramodeepa waa pꞌaadaikꞌaraa bɨ. Ichiaba chupɨria chedeerãpa seis gramodeepa edaara pꞌaadaikꞌaraa bɨ. Jõmaarãpa aukꞌa pꞌaratꞌa gramo seis pꞌaadaipia bɨ. 16Ma pꞌaratꞌa israelitaarãpa teedapꞌedaa pꞌe atáji mãikꞌaapa mɨ ome unupata tede ɨa bɨ́ji, ma pꞌaratꞌapa netꞌaa neto atadapꞌeda, mɨ tede mimia oopataadamerã. Ma pꞌaratꞌa teedapꞌedaa kꞌaurepa mɨa ãra kꞌirãpa bapariitꞌee mãikꞌaapa chokꞌai pꞌanapiitꞌeeda aji.

Tachi Akꞌõrepa jarada pailakꞌa oodamerã

17Ichiaba Tachi Akꞌõrepa Moisemaa mãgaji: 18—Ne–inaa broncedee oopíji pailakꞌa chi bɨɨrɨ ome, madepema paniapa pꞌaareerãpa ãchi jua, bɨɨrɨ ome sɨɨdamerã. Ma pailakꞌa bɨ mɨ ome unupata te tꞌĩupata kꞌĩrapite bɨpíji. Mamĩda kꞌaitꞌaara bɨpíji ma taawapema altar kꞌãyaara. Maapꞌeda paniapa ipurupíji. 19Aaronpa chi warrarã ome ma paniapa ãchi jua, bɨɨrɨ ome sɨɨdaipia bɨ. 20Ãra mɨ ome unupata tede tꞌĩuruta chaa, mãgá sɨɨdaipia bɨ. Ichiaba mãgá sɨɨdaipia bɨ ne–animal peedai naaweda ma taawapema altarde paadaitꞌee pakꞌãri. Mãga ooruta pɨrã, piuda–e paitꞌee. 21Aaronpa mãikꞌaapa irudeepa uchiadaitꞌeerãpa ichita ãchi jua, bɨɨrɨ ome mãgá sɨɨdaipia bɨ mɨa na leyde jara bɨkꞌa. Mãga ooda–e pɨrã, piudaitꞌeeda aji.

Tachi Akꞌõrepa jarada ichi–itꞌee aceite oodamerã

22Ichiaba Tachi Akꞌõrepa Moisemaa mãgaji: 23—Jɨrɨtꞌeráji nãgee ne–inaa tꞌũa bapari: mirra kilo seis; canela kilo õpee; caña kilo õpee; 24casia kilo seis. Ma jõma cháaji mɨ ome unupata tedepema balanzade. Ichiaba aceite olivodee ooda litro kꞌĩmari jɨrɨ́ji mãikꞌaapa ma ne–inaa tꞌũa bapari ome pꞌoiráji. 25Kꞌera oo kꞌawaa bɨpa ooparikꞌa, pɨa ma netꞌaa jõma pꞌe atapꞌeda, mɨ–itꞌee aceite óoji, ma aceite ne–inaa ɨ̃rɨ weekꞌãri, mɨ–itꞌee ma ne–inaa awara beemerã. 26Mãgɨ́ aceite wéeji mɨ ome unupata te ɨ̃rɨ; baaltekꞌa bɨ ɨ̃rɨ; 27mesa ɨ̃rɨ mãikꞌaapa netꞌaa aɨde nɨ̃bɨ ɨ̃rɨ; lámpara bɨpata ɨ̃rɨ mãikꞌaapa chi netꞌaa ɨ̃rɨ; altar teedapema ɨ̃rɨ; 28taawapema altar ne–animalaarã mɨ–itꞌee paa jõpipata ɨ̃rɨ mãikꞌaapa jõma netꞌaa aɨde nɨ̃bɨ ɨ̃rɨ; jua, bɨɨrɨ sɨɨpari pailakꞌa bɨ ɨ̃rɨ mãikꞌaapa chi basa ɨ̃rɨ. 29Ma netꞌaa ɨ̃rɨ ma aceite weekꞌãri, ma netꞌaa mɨ–itꞌee awara beeitꞌee mãikꞌaapa awaraa netꞌaapa ma netꞌaa tꞌõbairu pɨrã, mãgɨ́ jida aukꞌa mɨ–itꞌee awara beeitꞌee.

30’Mãgɨ́ aceitepa ichiaba Aarón poro ɨ̃rɨ weeipia bɨ mãikꞌaapa chi warrarã ɨ̃rɨ jĩapꞌeipia bɨ, ãrapa mɨ–itꞌee pꞌaareerã mimia oopataadamerã. 31Maapꞌeda israelitaarãmaa nãga jaráji: ‘‘Tachi Akꞌõrepa jara bɨ: Nãgɨ́ aceite ichita mëré paitꞌeeda a bɨ, weedaitꞌee perã netꞌaa ɨ̃rɨ, mɨ–itꞌee awara bɨdakꞌãri. 32Nãgɨ́ aceite eperã jĩpꞌaa ɨ̃rɨ weedaikꞌaraa bɨ. Ichiaba nãgɨ́ aceitekꞌa oodaikꞌaraa bɨ, nãgɨ́ aceite mɨ–itꞌee aupai perã. 33Apidaapa nãgɨ́ aceitekꞌa ooruta pɨrã maa–e pɨrã eperã jĩpꞌaa ɨ̃rɨ weeruta pɨrã, ma eperã parã tꞌãideepa jëretꞌaadapáde” a bɨ.

Tachi Akꞌõrepa jarada ichi–itꞌee ne–inaa tꞌũa bapari oodamerã

34Tachi Akꞌõrepa Moisemaa mãgaji:

—Nãgee ne–inaa jɨrɨ́ji mãikꞌaapa aɨdee ne–inaa tꞌũa bapari oopíji mɨ–itꞌee paadamerã: resina; ámbar mãikꞌaapa gálbano. Ma chaachaa gramo aukꞌa ataipia bɨ. 35Maapꞌeda kꞌera oo kꞌawaa bɨpa ooparikꞌa, pɨa ma ne–inaa jõmaweda tꞌã ome pꞌoiraipia bɨ, ma ne–inaa tꞌũa bapari pi–ia beemerã mãikꞌaapa mɨ–itꞌee aupai beemerã. 36Ma ne–inaa tꞌũa bapari ũkꞌuru nãusaa bapꞌeda, bɨ́ji mɨ ome unupata tede mɨ baaltekꞌa bɨ kꞌĩrapitepema altarde, pɨ ome unukꞌãri, mɨ mama bapariitꞌee perã. Ma ne–inaa tꞌũa bapari mɨ–itꞌee aupai awara baitꞌee. 37Mapa mãgɨ́ ne–inaa tꞌũa bapari pɨ–itꞌee wa awaraarã–itꞌee oopiikꞌaraa bɨ, mãgɨ́ mɨ–itꞌee aupai awara beeitꞌee perã. 38Apidaapa mãgɨ́ ne–inaa tꞌũa baparikꞌa ooru pɨrã chi tꞌũa ɨ̃ kꞌiniapa, ma eperã parã tꞌãideepa jëretꞌaadapáde aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index