Search form

Éxodo 32

Israelitaarãpa Aaronmaa pꞌakꞌa chakꞌe nẽedee oopidapꞌedaa

(Deuteronomio 9.6-29)

1Mamĩda Moisés ma eede taarã bada perã, israelitaarã Aaronmaa wãdapꞌeda, mãgajida:

—Ne–inaa óoji aɨ kꞌĩrapite ɨtꞌaa tꞌɨ̃daitꞌee. Ma akꞌõre waibɨapa tachimaa o akꞌɨpiyada ajida, kꞌawada–e pꞌanadairã kꞌãata pꞌasaji jã Moisés, tachi Egiptodeepa aneeda ome.

2Mãpai Aaronpa pꞌanauji:

—Wẽraarã mãikꞌaapa warrarã kꞌɨɨrɨdeepema nẽedee ooda pꞌe atátɨ mãikꞌaapa namaa aneedapáde aji.

3Jõmaarãpa ãchi kꞌɨɨrɨdeepema nẽedee ooda ẽra atadapꞌeda, Aaronmaa aneejida. 4Aaronpa ma jõma pꞌe atapꞌeda, torrabaitꞌaaji mãikꞌaapa cincelpa pꞌakꞌa ɨmɨkꞌĩra chakꞌekꞌa oo ataji.

Mãpai jõmaarãpa mãgajida:

—¡Israelitaarã, nãgɨ́ akꞌõre waibɨ́apata tachi Egiptodeepa aneejida! ajida.

5Aaronpa unukꞌãri ãrapa made ijãa pꞌanɨ, altar oo ataji ma pꞌakꞌa chakꞌekꞌa nẽedee ooda kꞌĩrapite mãikꞌaapa golpe pedeeji:

—Nu fiesta oodaitꞌeeda aji, Tachi Akꞌõre–itꞌee.

6Aɨ norema tapꞌeda ne–animalaarã chokꞌara peedapꞌeda, ũkꞌuru Tachi Akꞌõre–itꞌee paa jõpijida mãikꞌaapa ũkꞌuru paapijida ma pꞌakꞌa chakꞌekꞌa bɨ kꞌĩrapite jedekꞌodaitꞌee. Maapꞌeda su–akꞌɨ pꞌaneejida nekꞌodaitꞌee mãikꞌaapa ne–inaa todaitꞌee. Ma tꞌẽepai pꞌirabaijida pëiradaitꞌee mãikꞌaapa awaraarã jɨrɨjida mãɨrã ome pꞌekꞌau oodaitꞌee.

7Mãɨmisa Tachi Akꞌõrepa Moisemaa mãgaji:

—Edaa wã́ji eperãarã pɨ jua ekꞌari pꞌanɨɨrã, pɨa Egiptodeepa uchia atadaarãpa ne–inaa kꞌachia oomaa pꞌanadairã. 8Taarã–eweda mɨa jarada oo amaajidada aji. Pꞌakꞌa chakꞌe nẽedee oo atajida aɨ kꞌĩrapite ɨtꞌaa tꞌɨ̃daitꞌee. Mãgɨ́ ne–inaa–itꞌee ne–animalaarã paapimaa pꞌanɨ mãikꞌaapa nãga jaramaa pꞌanɨ: ‘‘Israelitaarã, nãgɨ́ akꞌõre waibɨ́apata tachi Egiptodeepa aneejida’’ a pꞌanɨ.

9Ma awara Tachi Akꞌõrepa Moisemaa mãgaji:

—Mɨa kꞌawa bɨ jã eperãarã audú kꞌɨɨrɨ kꞌisua pꞌanɨ. 10¡Mɨ ãra ome audú kꞌĩrau bɨ! ¡Mapa pɨ na nepɨrade tꞌĩunáaji, mɨata ãra jõmaweda jõtꞌaaitꞌee perã! Pɨ aupaita chokꞌai atabɨitꞌeeda aji, pɨdeepa uchiadaitꞌeerã mɨchi pꞌuuru pidaarã padamerã.

11Mamĩda Moisepa Tachi Akꞌõremaa nãga chupɨria iidiji mãga oonaamerã:

—Tachi Akꞌõre, ¿sãapꞌeda pɨchi eperãarã ome audú kꞌĩrau bɨma? Pɨchi juapa ãra uchiapiji Egipto pidaarã juadeepa. 12Pɨa israelitaarã jõmaweda peekꞌooru pɨrã, ¿Egipto pidaarãpa nãga jaradai–ekꞌã? ‘Tachi Akꞌõrepa ãra uchiapiji, eera jẽra bɨmãi peekꞌooitꞌee, na pꞌekꞌau eujãde apida beenaamerã.’ ¡Mapa kꞌĩrau banáaji mãikꞌaapa mãga oonáaji! ¡Ãra pɨchi eperãarãpɨ!

13’Kꞌirãpáji pɨa Abrahammaa, Isaacmaa, Israelmaa jarada pɨchi tꞌɨ̃de nãga juraakꞌãri: ‘‘Mɨa parãdeepa uchiadaitꞌeerã chokꞌara ĩwapiitꞌee lucero pajãde chokꞌara nɨ̃baparikꞌa. Na eujã mɨa parãmaa teeitꞌeeda ada parãdeepa uchiadaitꞌeerãpa ichita jɨ̃adaitꞌeeda’’ aji.

14Moisepa mãgá chupɨria iidida perã, Tachi Akꞌõrepa waa kꞌĩsia–e paji ichi eperãarã peekꞌooitꞌee. 15Mãpai Moisés edaa cheji ma mãu pꞌepꞌedee omé kꞌĩraichaaweda Tachi Akꞌõrepa pꞌã iru bada ome. 16Tachi Akꞌõrepa ichi juadoopa ma mãu pꞌepꞌedee ooda paji mãikꞌaapa aɨde ichi ley pꞌã iru baji.

17Moisés pachekꞌãri Josuepa nɨmaa badamãi, Josuepa mãgaji:

—Eperãarãpa ãchi carpa eebai jẽra bɨdapꞌedaamãi jura chõomaa pꞌanadakꞌãri, biukꞌa nɨ̃baparikꞌa ũri bɨda aji.

18Mãpai Moisepa pꞌanauji:

—Mãga–epɨ. Biada–e pꞌanɨ chõo pꞌoyaa wãda perã maa–e pɨrã atua wãda perã. Kꞌarimaata pꞌanɨda aji.

19Kꞌaitꞌaara chedakꞌãri, unu chejida pëira para bɨ pꞌakꞌa chakꞌe nẽedee ooda kꞌĩrapite. Mapa Moisés kꞌĩraudachi mãikꞌaapa Tachi Akꞌõrepa pꞌãda mãu omeeweda ma ee kꞌarramaa batꞌakꞌooji. Mãgá omeeweda tꞌodoochoodachida. 20Aramata Moisepa ma pꞌakꞌa chakꞌe nẽedee ooda tꞌɨpɨtaude batꞌatꞌaaji. Maapꞌeda ma nẽe baji pꞌora uchiarumaa. Ma nẽe pꞌora pꞌotꞌaaji pania ɨ̃rɨ mãikꞌaapa israelitaarãmaa topiji.

21Mãpai Moisepa Aaronmaa iidiji:

—¿Jã eperãarãpa pɨmaa, kꞌãata oojidama aji, pɨa ãramaa jãgá pꞌekꞌau kꞌachia oopimerã?

22Aaronpa pꞌanauji:

—Mɨchi waibɨa, mɨ ome kꞌĩraunáaji. Pɨa kꞌawa bɨ na eperãarã kꞌachia ooi awaa pꞌanapata. 23Mɨmaa jarajida: ‘‘Akꞌõre waibɨa ooteepáde ajida, mãgɨpa tachimaa o akꞌɨpimerã, kꞌawada–e pꞌanadairã jã Moisés, tachi Egiptodeepa aneeda ome kꞌãata pꞌasaji.’’ 24Mãpai mɨa nãga pꞌanauji: ‘‘Chi nẽe iru beerãpa anéetɨ.” ¡Ma nẽe aneedakꞌãri, mɨa tꞌɨpɨtaude batꞌatꞌaaji mãikꞌaapa pꞌakꞌa chakꞌekꞌa bɨ nẽedee ichi itu uchiajida! aji.

25Moisepa unuji jã eperãarã Tachi Akꞌõrede ijãada–e pꞌanɨ mãikꞌaapa pariatua ne–inaa oomaa pꞌanɨ, Aaronpa ãra pia akꞌɨ–e bada perã. Kꞌawaji ma kꞌaurepa ãra kꞌĩra unuamaa iru pꞌanapatapꞌedaarãpa ãra oo iru pꞌanadaitꞌee.

26Mapa Moisés bainɨ̃ beeji eperãarã te ne–edee ooda pꞌanadapꞌedaa tꞌĩupatamãi mãikꞌaapa mãgaji:

—Chi Tachi Akꞌõre eere pꞌanɨɨrã mɨ ikꞌaawa chedapáde aji.

Mãpai Levideepa uchiadapꞌedaarã jõmaweda chejida.

27Mãpai Moisepa ãramaa mãgaji:

—Tachi Akꞌõre, israelitaarã Akꞌõre Waibɨapa nãga jara bɨ: ‘‘Espada atanátɨ mãikꞌaapa te awara–awaraa beemãi peekꞌoo wãdapáde a bɨ ɨmɨkꞌĩraarã; pãchi ëreerã, pãchi kꞌõpꞌãyoorã, pãchi te ikꞌaawa pꞌanapataarã paara.’’

28Levideepa uchiadapꞌedaarãpa Moisepa jaradakꞌa oojida. Ma ewate perá ɨmɨkꞌĩraarã tres mil peejida.

29Mãpai Moisepa mãgaji:

—Idi Tachi Akꞌõrepa parã Levideepa uchiadapꞌedaarã awara bɨji ichi–itꞌee mimiapataadamerã, parãpa oodapꞌedaa perã irua jaradakꞌa pãchi warrarã ome mãikꞌaapa ɨ̃pemaarã ome. Mãga oodapꞌedaa perã, irua parã bendiciaitꞌee.

30Aɨ norema Moisepa israelitaarãmaa mãgaji:

—Parãpa audú pꞌekꞌau kꞌachia oojida. Mɨ waya ee nokꞌodee wãitꞌeeda aji, Tachi Akꞌõremaa parã pari chupɨria iidide. Taawa mɨa parã pari chupɨria iidikꞌãri, irua parãpa pꞌekꞌau kꞌachia oodapꞌedaa ãyaa bɨi.

31Mãgá Moisés Sinaí eede ɨtꞌɨ́ panakꞌãri, Tachi Akꞌõremaa mãgaji:

—Wãara israelitaarãpa audú pꞌekꞌau kꞌachia oojida ma ne–inaa nẽedee oodakꞌãri. 32Mamĩda ɨ̃rá ãrapa pꞌekꞌau kꞌachia oodapꞌedaa ãyaa bɨ́ji maa–e pɨrã mɨ tꞌɨ̃ pɨa ijãapataarã tꞌɨ̃ librode pꞌã iru bɨdeepa wẽpatꞌaapáde aji.

33Mamĩda Tachi Akꞌõrepa pꞌanauji:

—Chi pꞌekꞌau kꞌachia oodapꞌedaarã tꞌɨ̃ aupaita wẽpatꞌaaitꞌee mɨa librode pꞌã iru bɨdeepa. 34Wã́ji eperãarãmaa mãikꞌaapa ãra atéeji mɨa jaradamaa. Mɨa mɨ ángel pëiitꞌee o jaratee wãmerã. Ewari cherude mɨa ãramaa ne–inaa kꞌachia ooitꞌeeda aji, ãrapa pꞌekꞌau kꞌachia oodapꞌedaa pari.

35Moisepa Tachi Akꞌõrepa jaradakꞌa ooji. Ma tꞌẽepai Tachi Akꞌõrepa kꞌayaa kꞌachia baripiji israelitaarãmaa, ãrapa ɨtꞌaa tꞌɨ̃dapꞌedaa perã Aaronpa pꞌakꞌa chakꞌe nẽedee ooda kꞌĩrapite.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index