Search form

Éxodo 33

Tachi Akꞌõrepa jarada awara ãyaa wãdamerã

1Ma tꞌẽepai Tachi Akꞌõrepa Moisemaa mãgaji:

—Wã́ji jã eperãarã pɨa Egipto eujãdeepa uchiapidaarã ome. Wã́tɨ Canaán eujãdee mɨa juraada perã ma eujã teeitꞌee Abrahammaa, Isaacmaa, Jacobmaa, ãradeepa uchiadaitꞌeerã mama pꞌanapataadamerã. 2Mɨa ángel pëiitꞌee parã naa parãpa o kꞌawaa wãdamerã. Ma eujãdeepa mɨa jërekꞌooitꞌee cananeorã, amorreorã, hititaarã, ferezeorã, heveorã mãikꞌaapa jebuseorã. 3Wã́tɨ ma eujã piadee leche, miéle+ ome waibɨa paraamaa. Mamĩda mɨ parã ome wã–e. Mɨ wãru pɨrã, parã jõma kꞌiniipikꞌooyada aji, audú kꞌɨɨrɨ kꞌisua pꞌanadairã.

4Moisepa israelitaarãmaa Tachi Akꞌõrepa jarada jaranakꞌãri, tꞌãri pꞌuapa jẽedachida. Apidaapa ne–inaa nẽedee ooda, awaraa ne–inaa pi–ia jida jɨ̃da–e paji, 5aɨ naaweda Tachi Akꞌõrepa Moisemaa nãga jarada perã:

“Israelitaarãmaa nãga jaráji: ‘Parã audú kꞌɨɨrɨ kꞌisua pꞌanadairã, mɨ parã ome wãru pɨrã, parã peekꞌooitꞌee. Pãchi ne–inaa nẽedee ooda mãikꞌaapa awaraa ne–inaa pi–ia jɨ̃pata ẽra bɨdapáde aji, mɨa kꞌĩsiaru misa parã ome kꞌãata ooitꞌee.’ ”

6Mapa Horeb eede pꞌanadakꞌãriipa mãgee ne–inaa waa jɨ̃da–e paji.

Tachi Akꞌõre ome unupata te ne–edee oodapꞌedaa

7Maapai Moisepa te ne–edee ooda israelitaarã te ikꞌaawaapa tꞌɨmɨɨpai oonaji. Ma te tꞌɨ̃ bɨji ‘Tachi Akꞌõre ome unupata te’. Eperãarãpa Tachi Akꞌõremaa ne–inaa iidi kꞌinia pꞌanadakꞌãri, ma temaa wãpachida. 8Moisés ma temaa wãkꞌãri, eperãarã ãchi te tꞌĩupata chaa akꞌɨnɨ̃ pꞌaneepachida, iru ma tede tꞌĩuru misa. 9Moisés ma tede tꞌĩukꞌãri, jɨ̃arara baai chepachi ma tede tꞌĩupatamãi mãikꞌaapa Tachi Akꞌõre mama beepachi Moisés ome pedee auparumaa. 10Ma jɨ̃arara unudakꞌãri, eperãarã ãchi te chaa bedabaidaipachida akꞌɨpidaitꞌee Tachi Akꞌõre waawee pꞌanɨ.

11Mama Tachi Akꞌõre Moisés ome pedeepachi, eperã ichi kꞌõpꞌãyo ome pedeeparikꞌa. Maapꞌeda Moisés waya chepachi eperãarã pꞌanapatapꞌedaamaa. Mamĩda chi kꞌaripapari, Nun warra, Josué ma tede bapachi.

Tachi Akꞌõrepa Moisemaa ichi kꞌĩra wãree unupida

12Tꞌẽepai Moisepa Tachi Akꞌõremaa mãgaji:

—¿Pɨa atꞌãri kꞌinia bɨ–ekꞌã mɨa na eperãarã akꞌɨpariimerã mãikꞌaapa Canaán eujãdee ateemerã? Mamĩda pɨa jara–e bɨ kꞌaita mɨ ome pëiitꞌee. ¿Pɨa jarapari–ekꞌã mɨ pia kꞌawa bɨ mãikꞌaapa mɨ pia akꞌɨpari? 13Mãga pɨrã, pɨa kꞌĩsia iru bɨ mɨmaa kꞌawapíji. Mãgá mɨa pɨ ichiaba kꞌawaitꞌee mãikꞌaapa mɨa kꞌawaitꞌee wãara pɨa mɨ pia akꞌɨpari. Kꞌirãpapáde aji, na eperãarã përé.

14Mãpai Tachi Akꞌõrepa pꞌanauji:

—Mɨta pɨ ome wãitꞌeeda aji, pɨ kꞌãiwee bapariimerã.

15Mamĩda Moisepa mãgaji:

—Pɨ tai ome wã–e pɨrã, tai namãikꞌaapa pëináaji. 16Pɨ tai ome wã–e pɨrã, ¿sãgá kꞌawadaima wãara pɨa tai, pɨchi eperãarã, pia akꞌɨpari? Pɨ tai ome nipa–e pɨrã, tai awaraa pꞌuuru pidaarãkꞌa pꞌanadaitꞌee.

17Mãpai Tachi Akꞌõrepa mãgaji:

—Pɨa jara bɨkꞌa ooitꞌeeda aji, mɨa pɨ pia kꞌawa bairã mãikꞌaapa pɨ pia akꞌɨpari perã.

18Mãpai Moisepa mãgaji:

—¡Pɨ kꞌĩra wãree mɨmaa unupipáde! aji.

19Mãpai Tachi Akꞌõrepa pꞌanauji:

—Mɨ pɨ kꞌĩrapite wãyaakꞌãri, pɨa mɨ tꞌãri pia bapari unuitꞌee mãikꞌaapa pɨ kꞌĩrapite mɨchi tꞌɨ̃, Tachi Akꞌõre, golpe jaraitꞌee. Mɨa chupɨria kꞌawaaitꞌee chi mɨa chupɨria kꞌawaa kꞌinia bɨɨrã. Pia akꞌɨitꞌee mɨa pia akꞌɨ kꞌinia bɨɨrã. 20Mamĩda pɨmaa mɨ kꞌĩra unupi–e paitꞌee apidaapa pꞌoyaa mɨ kꞌĩra unuda–e perã. Eperãpa mɨ kꞌĩra unuru pɨrã, ma eperã piuitꞌee.

21Ichiaba Tachi Akꞌõrepa mãgaji:

—Akꞌɨ́ji. Mɨ kꞌaitꞌa mãu te uria bɨmãi bainɨ̃ béeji. 22Mɨ kꞌĩra wãree wãyaakꞌãri, mɨa pɨ tꞌĩupiitꞌee jã mãu te uriade mãikꞌaapa mɨchi juapa pɨ tꞌapꞌaitꞌee. 23Maapꞌeda, mɨ jua ãyaa atakꞌãri, pɨa mɨ ekꞌarra akꞌɨi. Mamĩda pɨa mɨ kꞌĩra pꞌoyaa unu–eda aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index