Search form

Éxodo 35

Tachi Akꞌõrepa jarada ɨ̃ipata ewari ɨadamerã

1Maapai Moisepa israelitaarã jõmaweda chipꞌe ataji mãikꞌaapa mãgaji:

—Tachi Akꞌõrepa jara bɨ parãpa nãga oodamerã: 2Ewari seis mimiadaipia bɨ. Mamĩda ewari sietede mɨ, Tachi Akꞌõre–itꞌee awara beeitꞌee, ma ewate parã ɨ̃ipataadamerã. Apida ma ewate mimiaru pɨrã, ma eperã peetꞌáatɨ. 3Parã wãrutamaa ma ewate mãgá ɨadaipia bɨ. Ma ewate tꞌɨpɨtau paara kꞌoodaikꞌaraa bɨda aji, ɨ̃ipata ewari perã.”

Moisepa jarada netꞌaa aneedamerã Tachi Akꞌõre te oodaitꞌee

4Ichiaba Moisepa israelitaarãmaa mãgaji:

—Tachi Akꞌõrepa jara bɨ parãpa nãga oodamerã: 5Pãchia netꞌaa iru pꞌanɨdepema pꞌedapꞌeda, anéetɨ mãikꞌaapa iru–itꞌee téetɨ. Chi tꞌãripa tee kꞌinia pꞌanɨɨrãpa nãgee netꞌaa aneedaipia bɨ: nẽe, pꞌaratꞌa, bronce, 6pꞌaru lino nãusaadee ooda; oveja kꞌara tꞌɨda pꞌãpꞌãraa; pꞌupꞌuchia, pꞌoree; cabra kꞌara; 7oveja ɨmɨkꞌĩra e tꞌɨda pꞌoree; awaraa ne–e pipɨara bee; acacia pakꞌuru; 8aceite olivodee ooda lamparade tꞌɨdamerã; kꞌera aceite ome mãikꞌaapa ne–inaa tꞌũa bapari ome pꞌoiraitꞌee Tachi Akꞌõre–itꞌee awara bamerã; 9mãu pi–ia ónice mãikꞌaapa awaraa mãu pi–ia kꞌĩra tꞌãdoo bɨdaitꞌee pꞌaareerã poro waibɨa efodde mãikꞌaapa ne–inaa tꞌũade jɨ̃paride.

Tachi Akꞌõre tedepema netꞌaa

10’Israelitaarã ne–inaa pia oo kꞌawaa beerã jõmaweda Tachi Akꞌõre ome unupata temaa chedaipia bɨ mãikꞌaapa nãgɨ́ ne–inaa jõmaweda oodaipia bɨ Tachi Akꞌõrepa jaradakꞌa: 11iru ome unupata te ne–edee mãikꞌaapa pꞌarudee; gancho; tabla; pakꞌuru teesoo; poste; basa 12baaltekꞌa bɨ chi tꞌapꞌa mãikꞌaapa chi pakꞌuru teesoo ãyaa ateepata ome; te jãde tꞌɨakꞌau bɨdepema cortina; 13iru tedepema mesa aɨde netꞌaa nɨ̃bɨ ome, chi pakꞌuru teesoo ãyaa ateepata ome, pan iru–itꞌee awara bɨpata paara; 14lámpara bɨpata, mãgɨpa iru te ɨ̃daamerã; lámpara mãikꞌaapa netꞌaa ma lámpara kꞌoopata; aceite ma lampara–itꞌee; 15iru tedepema ne–inaa tꞌũa bapari paapata altar, chi pakꞌuru teesoo ãyaa ateepata ome; aceite jĩapꞌepata ne–inaa iru–itꞌee awara bɨdakꞌãri; ne–inaa tꞌũa bapari; pꞌaru teesoo te tꞌĩupatamãi jõi bɨpata; 16te taawaikꞌa eerepema altar waibɨa ne–animalaarã iru–itꞌee paa jõpipata, chi rejilla broncedee ooda ma altar edajãde esajĩakꞌa bɨ ome, pakꞌuru teesoo ãyaa ateepata ome, madepema netꞌaa paara; pailakꞌa bɨ broncedee ooda chi basa ome; 17iru te ãukꞌidaa tꞌɨakꞌau bɨdepema cortina, chi poste mãikꞌaapa basa; ma te ãukꞌidaa tꞌɨakꞌau bɨ tꞌĩupatamãipema cortina; 18iru tedepema jɨ̃kꞌara, estaca jõmaweda, ma te ãukꞌidaa tꞌɨakꞌau bɨdepema jɨ̃kꞌara, estaca paara; 19pꞌaru lino nãusaadee ooda Aaron–itꞌee mãikꞌaapa chi warrarã–itꞌee awara bɨda jɨ̃pataadamerã Tachi Akꞌõre netꞌaa–itꞌee awara bɨda cuartode pꞌaareerã mimia oodakꞌãri.

Israelitaarãpa Tachi Akꞌõre–itꞌee netꞌaa aneedapꞌedaa

20Moisés pedee aupakꞌãri, israelitaarã ãchi te chaa erreujida. 21Maapꞌeda chi tꞌãripa tee kꞌinia pꞌanadapꞌedaarãpa Tachi Akꞌõre–itꞌee netꞌaa aneejida, mãgee netꞌaapa iru te ne–edee oodamerã, aɨdepema netꞌaa oodamerã mãikꞌaapa pꞌaareerã–itꞌee pꞌaru oodapꞌeda, awara bɨdamerã. 22Ɨmɨkꞌĩraarã, wẽraarã paara, chi tꞌãripa tee kꞌinia pꞌanadapꞌedaarãpa aneejida ãchia jɨ̃patapꞌedaa cadena, sortija, pulsera, kꞌɨɨrɨdeepema mãikꞌaapa awaraa ne–inaa kꞌĩra tꞌãdoo nẽedee ooda. Ma netꞌaa jõmaweda Tachi Akꞌõre–itꞌee awara bɨjida. 23Ichiaba aneejida oveja kꞌara tꞌɨda pꞌãpꞌãraa, pꞌupꞌuchia, pꞌoree; pꞌaru lino nãusaadee ooda; cabra kꞌara; oveja ɨmɨkꞌĩra e tꞌɨda pꞌoree; awaraa e pipɨara bee paara. 24Ichiaba aneejida pꞌaratꞌa bronce ome Tachi Akꞌõre kꞌĩrapite bɨdaitꞌee. Aneejida acacia pakꞌuru, aɨdee iru tedepema ne–inaa oodamerã. 25Wẽraarã pꞌaru kꞌa kꞌawaa beerãpa aneejida oveja kꞌara tꞌɨda pꞌãpꞌãraa, pꞌupꞌuchia, pꞌoree, mãikꞌaapa pꞌaru lino nãusaadee ooda. 26Awaraarã, ne–inaadee hilo siratꞌɨ kꞌawaa beerãpa cabra kꞌaradee hilo siratꞌɨjida, ãchi tꞌãripa tee kꞌinia pꞌanadapꞌedaa perã. 27Israelitaarã poro waibɨarãpa mãu pi–ia ónice awaraa mãu pi–ia ome aneejida pꞌaareerã poro waibɨa efodde mãikꞌaapa ne–inaa tꞌũade jɨ̃paride bɨdamerã. 28Ichiaba aneejida aceite olivodee ooda lamparade tꞌɨdamerã mãikꞌaapa ne–inaa awara bɨdakꞌãri, mãgɨpa jĩapꞌedamerã. Ichiaba kꞌera aneejida pꞌoiradamerã aceite olivodee ooda ome mãikꞌaapa ne–inaa tꞌũa bapari ome. 29Israelitaarã jõmaarãpa kꞌaripa kꞌinia pꞌanajida Tachi Akꞌõrepa Moisemaa jaradakꞌa oodaitꞌee. Tꞌãripa ãchia ma netꞌaa chokꞌara Tachi Akꞌõre–itꞌee aneejida.

Tachi Akꞌõre tedepema–itꞌee netꞌaa oo kꞌawaa beerã jɨrɨtꞌerada

30Maapꞌeda Moisepa israelitaarãmaa mãgaji:

—Ũrítɨ. Tachi Akꞌõrepa Judadeepa uchiada Bezalel jɨrɨtꞌeraji. Iru Uri warra mãikꞌaapa Jur ãichakꞌe. 31Tachi Akꞌõrepa ichi Jaure Bezalelmaa pëiji, kꞌĩsia kꞌawaa beemerã, ne–inaa kꞌĩra tꞌãdoo kꞌawaamerã mãikꞌaapa netꞌaa pi–ia oo kꞌawaa bamerã. 32Maperã irua ne–inaa nẽedee, pꞌaratꞌadee, broncedee oo kꞌawaa bɨ. 33Ichiaba mãu pi–ia ɨrra kꞌawaa bɨ mãikꞌaapa ne–inaade jootꞌɨ kꞌawaa bɨ. Ma awara ne–inaa kꞌĩra tꞌãdoo pakꞌurudee oo kꞌawaa bɨ. 34Tachi Akꞌõrepa irumaa ichiaba kꞌĩsia kꞌawaapiji awaraarãmaa jarateemerã. Mãga ooji ichiaba Dandeepa uchiada Ajisamac warra, Aholiab ome. 35Ma omeerãmaa Tachi Akꞌõrepa netꞌaa pia kꞌĩra tꞌãdoo oo kꞌawaapiji. Pꞌaru lino nãusaadee oo kꞌawaapiji mãikꞌaapa aɨde ne–inaa kꞌĩra tꞌãdoo oveja kꞌara pꞌãpꞌãraa, pꞌupꞌuchia, pꞌoree tꞌɨdadee kꞌa kꞌawaapiji. Ma awara awaraa netꞌaade nonoree kꞌĩra tꞌãdoo oo kꞌawaapiji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index