Search form

Éxodo 36

1Mãgá Tachi Akꞌõrepa kꞌĩsia kꞌawaapiji Bezalelmaa, Aholiabmaa mãikꞌaapa awaraa ne–inaa oo kꞌawaa beerãmaa, ãrapa ichi tedepema ne–inaa jõma oodamerã ichia jaradakꞌa.

Netꞌaa aneedapꞌedaa Tachi Akꞌõre ome unupata te–itꞌee

2Mãpai Moisepa tꞌɨ̃ pëiji Bezalel, Aholiab mãikꞌaapa awaraa ne–inaa oo kꞌawaa beerã, ãrapa ma mimia oodamerã. Tachi Akꞌõrepa ãra kꞌĩsia kꞌawaapiji ne–inaa oo kꞌawaadamerã mãikꞌaapa tꞌãripa ma mimia oodamerã. 3Moisepa ãramaa teeji ma netꞌaa jõma israelitaarãpa Tachi Akꞌõre–itꞌee teedapꞌedaa ma te oodamerã. Ma mimia oomaa pꞌanɨde ewari chaa tapꞌeda israelitaarãpa atꞌãri netꞌaa aneepachida. 4Maperã ma ne–inaa oo kꞌawaa beerã waa mimiada–e paji mãikꞌaapa Moisemaa chedapꞌeda, 5mãgajida:

—Eperãarãpa audupai netꞌaa anee pꞌanɨda ajida. Waa falta–e bɨda ajida, Tachi Akꞌõre te oodaitꞌee.

6Moisepa mãga ũrikꞌãri, nãga jara pëiji: “Ɨmɨkꞌĩraarã, wẽraarã jida Tachi Akꞌõre te–itꞌee waa mimianáatɨ mãikꞌaapa waa netꞌaa aneenáatɨ.” Mapa israelitaarãpa waa netꞌaa Tachi Akꞌõre te–itꞌee aneeda–e paji, 7aɨ naaweda netꞌaa aneedapꞌedaapapai Tachi Akꞌõre te jõma oo aupakꞌajida perã.

Tachi Akꞌõre ome unupata te oodapꞌedaa

8Ne–inaa jõmaweda oojida Tachi Akꞌõrepa Moisemaa jaradakꞌa iru ee nokꞌode bakꞌãri. Chi ne–inaa oo kꞌawaa beerãpa awaraa mimiapataarã ome ma te edajãde oojida diez cortina pꞌaru lino nãusaadee mãikꞌaapa made ɨtꞌaripemaarãkꞌa bee kꞌajida oveja kꞌara pꞌãpꞌãraa, pꞌupꞌuchia, pꞌoree tꞌɨdadee. 9Ma cortina chaachaa oojida doce metros apꞌeda cincuenta centímetros chi teesoo mãikꞌaapa metro aba apꞌeda ochenta centímetros chi jobɨa. 10Ma cortina diezdepema joisomaa araa kꞌaatꞌɨjida cortina nẽchoma beemerã. Aukꞌa oojida chi apema joisomaa ome. 11Maapꞌeda pꞌaru pꞌupꞌuchiadee sĩautaa tꞌɨɨdapꞌeda, teesoomaa bedajida mãikꞌaapa pꞌɨtrɨa kꞌaatꞌɨjida. 12Chi naapema cortina ide mãgee cincuenta kꞌaatꞌɨjida mãikꞌaapa chi apema cortina ide aukꞌa mãga oojida ma cortina i omeeweda ganchopa araa jõi bɨdamerã. 13Ma–itꞌee gancho cincuenta nẽedee oojida mãikꞌaapa mãgɨpa chi cortina araa jõi bɨjida te jãde paredkꞌa beemerã. Mãgá te edajãde tꞌɨakꞌau bɨjida.

14Ichiaba cortina teesoo once cabra kꞌaradee kꞌaatꞌɨjida, mãgɨpa chi te kꞌirukꞌa bɨdamerã. 15Ma cortina chaachaa oojida trece metros apꞌeda cincuenta centímetros chi teesoo mãikꞌaapa metro aba apꞌeda ochenta centímetros chi jobɨa. 16Ma cortina oncedepema joisomaa araa kꞌaatꞌɨjida cortina aba nẽchoma beemerã. Maapꞌeda awaraa cortina seis araa kꞌaatꞌɨjida awaraa cortina nẽchoma beemerã. 17Maapꞌeda pꞌaru sĩautaa tꞌɨɨdapꞌeda, teesoomaa bedajida mãikꞌaapa pꞌɨtrɨa kꞌaatꞌɨjida. Chi naapema cortina ide mãgee cincuenta kꞌaatꞌɨjida mãikꞌaapa chi apema cortina ide aukꞌa mãga oojida, mãgá ma cortina i omeeweda araa jõi pꞌaneedamerã. 18Ma cortina cabra kꞌaradee ooda araa jõi bɨjida gancho cincuenta broncedee oodapꞌedaapa. 19Ichiaba awaraa cortina oojida oveja ɨmɨkꞌĩra edee, kꞌĩra pꞌoree tꞌɨda. Mãgɨ́ bɨjida chi cabra kꞌaradee ooda ɨ̃rɨ. Maapꞌeda awaraa ne–e pipɨara bɨdee oojida. Mãgɨ́ apemaarã cortina ɨ̃rɨ bɨjida.

20Maapꞌeda tabla acacia pakꞌurudee oojida mãikꞌaapa ma tedepema paredkꞌa jĩpꞌa bainɨ̃ bɨjida. 21Ma tabla chaachaa oojida metro kꞌĩmari apꞌeda cincuenta centímetros chi teesoo mãikꞌaapa setenta centímetros chi jetꞌee. 22Ma tabla i abaade muesca omé oojida chi apema tabla ide jootꞌɨ beemerã mãikꞌaapa ma tabla edaikꞌa eere muesca omé oojida ma te bainɨ̃ bɨdakꞌãri, chi basade pia jootꞌɨ pꞌaneedamerã. Mãga oojida ma tedepema tabla chaachaa. 23Ma te sur eerepema pared–itꞌee veinte tablas oojida. 24Ma tabla jootꞌɨ bɨjida cuarenta basas pꞌaratꞌadee oodade. Tabla chaachaa basa omeede bɨjida chi muesca basa aba–abaade jootꞌɨ beemerã. 25Norte eerepema pared–itꞌee aukꞌa veinte tablas oojida. 26Ma tabla ichiaba jootꞌɨ bɨjida cuarenta basas pꞌaratꞌadee oodade. 27Tabla seis oodapꞌeda, ma te ãpɨteikꞌa eere, pia jaraitꞌeera occidente eere bainɨ̃ bɨjida. 28Ma awara tabla omé oodapꞌeda, ma ãpɨteikꞌa eerepema esquina chaa bainɨ̃ bɨjida. 29Ma tabla pareddepema tabla ome araa jootꞌɨ bɨjida chi naapema ɨtꞌaikꞌa eerepema argolla parumaa. Mãga oojida ma ãpɨteikꞌa eerepema esquina chaa. 30Mãgá ma eere tabla ocho jootꞌɨ pꞌaneejida dieciséis basas pꞌaratꞌadee oodade. Ma tabla chaachaa basa omeede jootꞌɨ bɨjida.

31Acacia pakꞌurudee ichiaba pakꞌuru teesoo joisomaa oojida ma pared bide teesoomaa bɨdaitꞌee. Aba ma pared bi esa–aukꞌa bɨjida. 32Ma pakꞌuru teesoo joisomaa bɨjida norte eerepema paredde; joisomaa bɨjida sur eerepema paredde mãikꞌaapa joisomaa bɨjida occidente eerepema paredde. 33Ma pakꞌuru esajĩakꞌa bɨjida jĩpꞌa wãyaamerã esquina abaadeepa chi apema esquina parumaa. 34Maapꞌeda ma tabla pareddepema jõmaweda nẽepa pꞌẽejida mãikꞌaapa argolla nẽedee oojida aɨde bɨdaitꞌee. Ichiaba ma pakꞌuru joisomaa nẽepa pꞌẽejida ma argollade tꞌɨ bɨdamerã.

35Ma cortina te edajãde tꞌɨakꞌau bɨdaitꞌee cuarto omé uchiadamerã oojida pꞌaru lino nãusaadee mãikꞌaapa aɨde ɨtꞌaripemaarãkꞌa bee kꞌajida oveja kꞌara pꞌãpꞌãraa, pꞌupꞌuchia, pꞌoree tꞌɨdadee. 36Poste kꞌĩmari acacia pakꞌurudee oodapꞌeda, nẽepa pꞌẽejida mãikꞌaapa basa pꞌaratꞌadee oojida ma poste aɨde jootꞌɨ bɨdaitꞌee. Maapꞌeda gancho nẽedee ooda ma postede bɨjida aɨde ma cortina jõidamerã. 37Ma te tꞌĩupatamãipema–itꞌee cortina lino nãusaadee oojida mãikꞌaapa aɨde nonoree pi–ia kꞌajida oveja kꞌara pꞌãpꞌãraa, pꞌupꞌuchia, pꞌoree tꞌɨdadee.

38Ma awara poste joisomaa oojida mãikꞌaapa basa broncedee oojida ma poste aɨde jootꞌɨ bɨdaitꞌee. Nẽedee pakꞌurukꞌa teesoo oojida ma poste kꞌɨ̃ chaa tꞌɨakꞌau beemerã mãikꞌaapa ma poste ɨtꞌaikꞌa eere nẽepa pꞌẽejida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index