Search form

Éxodo 37

Baaltekꞌa bɨ ooda

1Bezalelpa baaltekꞌa bɨ acacia pakꞌurudee ooji. Ooji metro aba, apꞌeda diez centímetros chi teesoo; setenta centímetros chi jetꞌee. Chi ɨtꞌɨa aukꞌa mãga ooji. 2Ma baaltekꞌa bɨ taawaikꞌa eere, edajãde paara nẽepapai pꞌẽeji. Ma taawaikꞌa eerepema i jõma ne–inaa nẽedee nonoree oodapa pꞌẽeji. 3Ichiaba argolla kꞌĩmari nẽedee ooji mãikꞌaapa bɨji ma baaltekꞌa bɨ bɨɨrɨ kꞌĩraichaa; omé bi abaade, omé chi apema bide. 4Ichiaba acacia pakꞌurudee pakꞌuru teesoo ooji mãikꞌaapa nẽepa pꞌẽeji. 5Maapꞌeda ma pakꞌuru teesoo bee tꞌɨ bɨji ma argollade, mãgá ma baaltekꞌa bɨ ãyaa ateedamerã.

6Ma baaltekꞌa bɨ tꞌapꞌa nẽedee ooji. Ooji metro aba apꞌeda, diez centímetros chi teesoo; setenta centímetros chi jetꞌee. 7Mãgɨ́ nẽe lámina abaadee martillopa muñecakꞌa bee omé ɨtꞌaripemaarãkꞌa ooji 8mãikꞌaapa aba–abaa bɨji ma tꞌapꞌa teesoomaa. 9Ma muñecakꞌa bee baaltekꞌa bɨ tꞌapꞌa ɨ̃rɨ ooji bainɨ̃ pꞌaneedamerã mãikꞌaapa kꞌĩrapa edaa chi tꞌapꞌamaa akꞌɨdamerã. Ooji ma tꞌapꞌa ɨ̃rɨ chi isia eratɨ jõnɨpa wãkꞌadamerã.

Tachi Akꞌõre tedepema mesa ooda

10Maapꞌeda Bezalelpa mesa acacia pakꞌurudee ooji. Ooji noventa centímetros chi teesoo; cuarenta y cinco centímetros chi jetꞌee; setenta centímetros chi ɨtꞌɨa. 11Ma jõma nẽepapai pꞌẽepꞌeda, ne–inaa nẽedee ooda nonoree bɨji ma mesade pꞌɨrrabaimerã. 12Ma mesa ide tabla jetꞌee siete centímetros bɨji mãikꞌaapa ne–inaa nẽedee ooda nonoree bɨji ma tabla ide pꞌɨrrabaimerã. 13Ichiaba argolla kꞌĩmari nẽedee ooji mãikꞌaapa ma mesa esquina chaa argolla aba bɨji chi mesa bɨɨrɨmãi. 14Mãgá ma argolla bɨji ma tabla i ekꞌari, pakꞌuru teesoo aɨde tꞌɨ bɨdamerã ma mesa ãyaa ateedaitꞌee pakꞌãri. 15Ma–itꞌee pakꞌuru teesoo omé acacia pakꞌurudee oopꞌeda, nẽepa pꞌẽeji. 16Ichiaba nãgee netꞌaa nẽedee ooji ma mesade pꞌe bɨdamerã: pꞌaratꞌu, taza, kꞌusarra, jarra, vaso Tachi Akꞌõre–itꞌee vino weepari.

Lámpara bɨpata nẽedee ooda

17Bezalelpa ichiaba ooji lámpara bɨpata. Nẽedee ooji chi basa, chi bɨɨrɨ, chi jua tꞌai mãikꞌaapa ma jua tꞌai kꞌɨ̃ chaa copa almendro pꞌonokꞌa chi kꞌiru ome ooji aɨde ma lámpara kꞌoopata aceite weedamerã. Ma jõma nẽe lámina abaadee martillopa ooji. 18Ma lámpara bɨpata bɨɨrɨde jua tꞌai seis ooji kꞌĩraichaa õpee–õpee pꞌaneedamerã. 19Ma jua tꞌai chaachaa ooji copa õpee almendro pꞌonokꞌa chi kꞌiru ome. 20Ma lámpara bɨpata bɨɨrɨde ichiaba copa kꞌĩmari ooji almendro pꞌonokꞌa chi kꞌiru ome, 21ma copa õpeedeepa jua tꞌai omé uchiadamerã; aba chi i chaa. 22Ma jõma nẽe lámina abaadee martillopa ooji.

23Ichiaba nẽedee lámpara siete ooji. Ma awara nẽedee tijerakꞌa ooji mãgɨpa lámpara mecha tꞌɨɨpataadamerã. Ichiaba ooji platillo aɨde ma tijerakꞌa, mecha ome bɨdamerã. 24Ma lámpara bɨpata chi tijerakꞌa, chi mecha, chi platillo ome nẽe treinta y tres kilodee ooji.

Altar ooda aɨde ne–inaa tꞌũa bapari paapataadamerã

25Bezalelpa ichiaba ooji altar kꞌaipee, aɨ ɨ̃rɨ ne–inaa tꞌũa bapari paadamerã. Ooji acacia pakꞌurudee cuarenta y cinco centímetros chi teesoo; chi jetꞌee aukꞌa; noventa centímetros chi ɨtꞌɨa. Mãgɨ́ pakꞌurudee ma altar esquina chaa ne–animal cachokꞌa ooji. 26Maapꞌeda ma altar jõma nẽepapai pꞌẽeji mãikꞌaapa ne–inaa nẽedee nonoree ooji chi taawaikꞌa eerepema ide pꞌɨrrabaimerã. 27Ichiaba argolla nẽedee ooji, ma altar bi chaa omee–omee bɨdamerã ma ne–inaa nẽedee ooda edaikꞌa eere, ma argollade pakꞌuru teesoo tꞌɨ bɨdamerã mãikꞌaapa ãyaa ateedakꞌãri, mãgɨde jitadamerã. 28Ma pakꞌuru acacia pakꞌurudee ooji mãikꞌaapa nẽepa pꞌẽeji.

Aceite mãikꞌaapa ne–inaa tꞌũa bapari ooda

29Bezalelpa ichiaba ooji aceite ne–inaa ɨ̃rɨ jĩapꞌedamerã, Tachi Akꞌõre–itꞌee awara bɨdakꞌãri. Ichiaba ne–inaa tꞌũa bapari ooji ma altar kꞌaipeede paadamerã. Ma jõma ooji kꞌera oopataarãpa oopatakꞌa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index