Search form

Éxodo 38

Taawapema altar broncedee ooda

1Bezalelpa taawapema altar acacia pakꞌurudee ooji, made ne–animalaarã peedapꞌeda, Tachi Akꞌõre–itꞌee paa jõpidamerã. Ooji metro omé apꞌeda, treinta centímetros chi teesoo; chi jetꞌee jida aukꞌa; metro aba apꞌeda, treinta centímetros chi ɨtꞌɨa. 2Ma pakꞌurudee ichiaba ooji ne–animal cachokꞌa ma altar esquina chaa pꞌaneedamerã mãikꞌaapa ma jõma broncepa pꞌẽeji. 3Ichiaba nãgee ne–inaa broncedee ooji ma altarde bɨdaitꞌee: itꞌabarre pꞌora pꞌepata; pala; taza; tenedor mãikꞌaapa tꞌɨpɨ kꞌĩra pꞌepata. 4Ichiaba rejilla broncedee ooji ma altar edajãde esajĩakꞌa bɨitꞌee. 5Ichiaba broncedee ooji argolla kꞌĩmari mãikꞌaapa ma rejilla esquina chaa bɨji ãyaa ateedaitꞌee pakꞌãri, aɨde pakꞌuru teesoo tꞌɨ bɨdamerã. 6Maapꞌeda acacia pakꞌurudee ma pakꞌuru teesoo ooji mãikꞌaapa broncepa pꞌẽeji. 7Ma pakꞌuru teesoo tꞌɨ bɨji ma argolla altar bi chaa beede mãgá ma altar ãyaa ateedamerã. Ma altar baaltekꞌa pakꞌurudee ooji jã wẽe.

Pailakꞌa broncedee ooda

8Wẽraarã Tachi Akꞌõre ome unupata te tꞌĩupatamãi mimiapataarãpa espejo broncedee ooda iru pꞌanajida. Madee Bezalelpa pailakꞌa bɨ chi bɨɨrɨ ome ooji, made pꞌaareerãpa ãchi jua mãikꞌaapa bɨɨrɨ sɨɨdamerã.

Tachi Akꞌõre ome unupata te ãukꞌidaa tꞌɨakꞌau bɨdapꞌedaa

9Ma tꞌẽepai Tachi Akꞌõre ome unupata te ãukꞌidaa tꞌɨakꞌau bɨjida. Chi sur eerepema–itꞌee cuarenta y cinco metros teesoo oojida mãikꞌaapa tꞌɨakꞌau bɨjida cortina lino nãusaadee oodapa. 10Ma cortina jõi pꞌaneedamerã nãgee ne–inaa broncedee oojida: veinte postes mãikꞌaapa veinte basas ma poste aɨde bainɨ̃ bɨdaitꞌee; gancho pꞌaratꞌadee mãikꞌaapa pakꞌurukꞌa teesoo pꞌaratꞌadee ma poste ɨ̃rɨ bɨdaitꞌee. 11Ma te ãukꞌidaa norte eere aukꞌa oojida. Chi cortina teesoo cuarenta y cinco metros baji. Ichiaba veinte postes, veinte basas broncedee, ganchos mãikꞌaapa pakꞌurukꞌa teesoo pꞌaratꞌadee iru pꞌanajida. 12Jõdee chi occidente eerepema–itꞌee veintidós metros apꞌeda cincuenta centímetros oojida mãikꞌaapa tꞌɨakꞌau bɨjida cortina lino nãusaadee oodapa. Ma cortina jõi pꞌaneedamerã diez postes, diez basas, ganchos mãikꞌaapa pakꞌurukꞌa teesoo pꞌaratꞌadee oo pꞌe iru pꞌanajida. 13Chi oriente eerepema–itꞌee aukꞌa veintidós metros apꞌeda, cincuenta centímetros oojida. 14-15Ma oriente eere chi tꞌĩupata oojida. Ma tꞌĩupata i chaapema–itꞌee oo pꞌe iru pꞌanajida cortina siete metros chi teesoo, poste õpee mãikꞌaapa basa õpee. 16Ma te ãukꞌidaa tꞌɨakꞌau bada cortina jõmaweda lino nãusaadee ooda paji. 17Ma basa poste–itꞌee oodapꞌedaa jõmaweda broncedee ooda paji. Jõdee chi gancho postede bɨdaitꞌee mãikꞌaapa pakꞌurukꞌa teesoo oodapꞌedaa ma poste kꞌɨ̃ chaa tꞌɨakꞌau bɨdaitꞌee pꞌaratꞌadee ooda paji. Ma awara ma poste chaa chi kꞌɨ̃de pꞌaratꞌapa pꞌẽe beeji.

18Ma tꞌɨakꞌau bada tꞌĩupata–itꞌee cortina lino nãusaadee ooji mãikꞌaapa made nonoree kꞌaji oveja kꞌara pꞌãpꞌãraa, pꞌupꞌuchia, pꞌoree tꞌɨdadee mãikꞌaapa hilo lino nãusaa oodadee. Ma cortina nueve metros baji chi teesoo; chi ɨtꞌɨa metro omé apꞌeda, treinta centímetros, apema cortina tꞌɨakꞌau badakꞌa. 19Ma tꞌĩupatamãi poste kꞌĩmari bainɨ̃ bɨ pꞌanajida basa kꞌĩmari broncedee oodade. Chi gancho mãikꞌaapa pakꞌurukꞌa teesoo ma poste kꞌɨ̃ chaa tꞌɨakꞌau bɨdaitꞌee pꞌaratꞌadee oo pꞌe iru pꞌanajida. Chi poste chaa chi kꞌɨ̃de pꞌaratꞌapa pꞌẽe beeji. 20Tachi Akꞌõre ome unupata temãi mãikꞌaapa ma te ãukꞌidaa tꞌɨakꞌau badamãi estaca sudapꞌedaa jõmaweda broncedee ooda paji.

Tachi Akꞌõre ome unupata te–itꞌee ne–inaa metaldee oodapꞌedaa

21Moisepa pꞌaareerã poro waibɨa Aarón warra Itamar bɨji Levideepa uchiadapꞌedaarã akꞌɨmerã. Irua ãra akꞌɨpachi ãrapa pꞌãdakꞌãri Tachi Akꞌõre ome unupata tede metal bɨdakꞌãri. Ma tede Tachi Akꞌõre ley ichi baaltekꞌa bɨde ɨa bɨjida, israelitaarãpa irua pacto ãra ome ooda kꞌirãpadamerã.

22Bezalel Uri warra mãikꞌaapa Jur ãichakꞌe paji. Ãra Judadeepa uchiadapꞌedaarã paji. Bezalelpa jõma ooji Tachi Akꞌõrepa Moisemaa jaradakꞌa. 23Dandeepa uchiada Ajisamac warra Aholiabpa Bezalel nãgee ne–inaa ome kꞌaripaji. Irua ne–inaa metaldee oopachi. Pꞌaru lino nãusaadee ne–inaa kꞌĩra tꞌãdoo oopachi mãikꞌaapa ne–inaa kꞌapachi oveja kꞌara pꞌãpꞌãraa, pꞌupꞌuchia, pꞌoree tꞌɨdadee.

24Ma tedepema ne–inaa nẽedee oodapꞌedaa jõmaweda oojida israelitaarãpa Tachi Akꞌõre–itꞌee nẽe tee chedapꞌedaadee. Ma nẽe Tachi Akꞌõre tedepema balanzade chaadakꞌãri, tonelada aba baji.

25Israelitaarã juasiadakꞌãri, eperã chaachaa pꞌaratꞌa pꞌaapijida. Ma pꞌaratꞌa chaadakꞌãri Tachi Akꞌõre tedepema balanzade, tonelada õpee apꞌeda esa–aukꞌa baji. 26Eperãarã veinte añodeepa ɨtꞌaa juasiadakꞌãri, seiscientos tres mil quinientos cincuenta pꞌanajida. Ma eperãarã chaachaa pꞌaratꞌa seis gramos pꞌaapidakꞌãri, Tachi Akꞌõre tedepema balanzade chaajida. 27Mãgá tres mil trescientos kilos pꞌaratꞌa iru pꞌanajida ma tedepema basa oodaitꞌee mãikꞌaapa ma cortina teesoo bɨdepema basa–itꞌee. Ma pꞌaratꞌadee basa cien oojida. Basa chaachaa pꞌaratꞌa treinta y tres kilo iru baji. 28Ma pꞌaratꞌa beedadee Bezalelpa gancho jõmaweda ooji postede bɨitꞌee. Ichiaba ma poste chaa chi kꞌɨ̃de ma pꞌaratꞌapa pꞌẽeji. Ma awara ma pꞌaratꞌadee pakꞌurukꞌa teesoo ooji poste ɨ̃rɨ bɨitꞌee.

29Israelitaarãpa bronce tee chedapꞌedaa dos mil trescientos cuarenta kilos iru baji. 30Ma broncedee oojida ma basa bɨdapꞌedaa Tachi Akꞌõre ome unupata te tꞌĩupatamãi; altar waibɨa te taawaikꞌa eere bada chi edajãdepema rejilla ome mãikꞌaapa netꞌaa jõmaweda ma altarde nɨ̃bada paara. 31Ichiaba ma broncedee oojida chi basa te ãukꞌidaa tꞌɨakꞌau bɨdapꞌedaa, chi tꞌĩupatamãi bɨdapꞌedaa paara mãikꞌaapa jõmaweda estaca sudapꞌedaa Tachi Akꞌõre ome unupata temãi; ichiaba ma te ãukꞌidaa tꞌɨakꞌau badamãi sudapꞌedaa paara.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index