Search form

Éxodo 6

1Mãpai Tachi Akꞌõrepa pꞌanauji:

—Taarã–e nɨde unudaitꞌee mɨa Faraón ome ooitꞌee bɨ. Mɨchi juapa mãga ookꞌãri, irua parã Egiptodeepa uchiapiitꞌee. Iruata jaraitꞌee wãdamerã.

Tachi Akꞌõrepa Moisemaa jarada

2Mãpai Tachi Akꞌõrepa Moisemaa mãgaji:

—Mɨta Tachi Akꞌõre. 3Mɨ unupikꞌãri Abrahammaa, Isaacmaa mãikꞌaapa Jacobmaa, jaraji mɨ tꞌɨ̃jarapataadamerã ‘Jõmaarã Akꞌõre Waibɨa’. + Maapai ãramaa jara–e paji mɨ ichiaba tꞌɨ̃jarapataadamerã Tachi Akꞌõre.+ 4Mɨa ãra ome pacto ookꞌãri, jaraji ãradeepa uchiadaitꞌeerãmaa Canaán eujã teeitꞌee. Maapai ãra ma eujãde awaraa eujãdepemaarãkꞌa pꞌanapachida. 5Ɨ̃rá mɨa unu bairã israelitaarã chupɨria chitoonɨ Egipto pidaarã juade, ma pactode jaradakꞌa ooitꞌee. 6Mapa wã́ji israelitaarãmaa mãikꞌaapa nãga jaráji: “Mɨ, Tachi Akꞌõrépata parã Egipto pidaarã juadeepa uchiapiitꞌee. Parã audú mimia pꞌanɨ esclavoorã perã. Mamĩda mɨa ne–inaa eperãarãpa waide unudakꞌaa ookꞌãri, mãɨrã miapiitꞌee mãikꞌaapa mãgá parã kꞌaripa ataitꞌee. 7Mɨa parã israelitaarã jɨrɨtꞌeraitꞌee mɨchi pꞌuuru pidaarã padamerã mãikꞌaapa mɨ parã Akꞌõre Waibɨa paitꞌee. Mɨa parã Egipto pidaarã juadeepa uchiapikꞌãri, kꞌawadaitꞌee mɨ parã Akꞌõre Waibɨa. 8Parã ma eujãdee ateeitꞌee mɨa juraada perã ma eujã teeitꞌee Abrahammaa, Isaacmaa mãikꞌaapa Jacobmaa. Mɨ, Tachi Akꞌõrépata mãga jara bɨ.”

9Moisepa israelitaarã poro waibɨarãmaa mãga jaranaji. Mamĩda ijãa kꞌiniada–e paji, audú mimia chaaree mimia pꞌanadapꞌedaa perã Egipto pidaarã jua ekꞌari.

10Mãpai Tachi Akꞌõrepa Moisemaa mãgaji:

11—Wã́ji Faraonmaa mãikꞌaapa jarapáde aji, israelitaarã Egiptodeepa wãpimerã.

12Mamĩda Moisepa pꞌanauji:

—Israelitaarãpa mɨ pedee ũridaamaa pꞌanɨ. ¿Sãgá Faraonpa mɨ pedee ũriyama aji, mɨ pedee atua pɨkꞌa bairã?

13Mamĩda Tachi Akꞌõrepa Moisés, Aarón ome pëiji israelitaarãmaa mãikꞌaapa Faraonmaa jaranadamerã iruata ãchi pëiji israelitaarã Egiptodeepa uchiapidamerã.

Nãgɨ́ chonaarãdeepa Moisés, Aarón ome uchiadapꞌedaa

14Israeldeepa uchiadapꞌedaa ëreerãdepema poro waibɨarã nãgɨɨrã paji:

Israel warra naapema Rubendeepa uchiajida Janoc, Falú, Jezrón mãikꞌaapa Carmí. Mãgɨɨrãdeepa uchiadapꞌedaa ëreerã jõmaweda Rubendeepa uchiadapꞌedaarã paji.

15Israel warra Simeondeepa uchiajida Jemuel, Jamín, Oad, Jaquín, Zojar mãikꞌaapa Saúl. Saúl Canaán eujãdepema wẽradeepa uchiada paji. Mãgɨɨrãdeepa uchiadapꞌedaa ëreerã jõmaweda Simeondeepa uchiapꞌedaarã paji.

16Israel warra Leví ciento treinta y siete años baji na pꞌekꞌau eujãde. Irudeepa na warrarã uchiajida; chi naapemadeepa tꞌẽepema parumaa: Guersón, Coat mãikꞌaapa Merari.

17Guersondeepa na warrarã uchiajida: Libní mãikꞌaapa Simí, ãradeepa uchiadapꞌedaarã paara.

18Leví warra Coat ciento treinta y tres años baji na pꞌekꞌau eujãde. Irudeepa na warrarã uchiajida: Amirán, Izar, Hebrón mãikꞌaapa Uziel.

19Leví warra Merarideepa na warrarã uchiajida: Majlí mãikꞌaapa Musí. Mãga paji Leví warrarãdeerã; chi naapemadeepa tꞌẽepema parumaa.

20Coat warra Amirán miakꞌãiji chi chĩapa chõtrãa Jocabed ome. Mãgɨpa tꞌoji Aarón mãikꞌaapa Moisés. Ãchi akꞌõre Amirán ciento treinta y siete años baji na pꞌekꞌau eujãde.

21Coat warra Izardeepa uchiajida Coré, Néfeg mãikꞌaapa Zicrí.

22Coat warra Uzieldeepa uchiajida Misael, Elzafán mãikꞌaapa Sitri.

23Amirán warra Aarón miakꞌãiji Elisabet ome. Ma wẽra Aminadab kꞌau paji mãikꞌaapa chi ɨ̃pema Naasón paji. Elisabetpa nãgɨ́ warrarã tꞌoji: Nadab, Abiú, Eleazar mãikꞌaapa Itamar.

24Izar warra Coredeepa uchiajida Asir, Elcaná mãikꞌaapa Abiasaf. Mãɨrãdeepa uchiadapꞌedaarã jõmaweda coreitaarã apachida.

25Aarón warra Eleazar miakꞌãiji Futiel kꞌau ome. Mãgɨ́ wẽrapa warra tꞌoji. Tꞌɨ̃jarapachida Finés. Mãgɨɨrã jõmaweda Levideepa uchiadapꞌedaarã paji. Ãra ãchideerã poro waibɨarã paji chi warra naapemadeepa tꞌẽepema parumaa.

26Tachi Akꞌõrepa jaraji ma Levideepa uchiadapꞌedaarã Aaronpa mãikꞌaapa Moisepa ome israelitaarã Egipto eujãdeepa ãchi ëreerã chaachaa uchia atadamerã mãikꞌaapa ãyaa wãdamerã. 27Ma Aarón, Moisés ome pedeejida Faraón ome, irua israelitaarã ichi eujãdeepa pëimerã.

Tachi Akꞌõrepa Moisés, Aarón ome jɨrɨtꞌerada

28Moisés Egipto eujãde bakꞌãri, Tachi Akꞌõrepa irumaa mãgaji:

29—Mɨta Tachi Akꞌõre. Jarapáde aji, Faraonmaa mɨa jõmaweda pɨmaa jararu.

30Mamĩda Moisepa pꞌanauji:

—Mɨchi Waibɨa, mɨ pia pedeekꞌaa. ¿Sãgá Faraonpa mɨ pedee ũriyama? aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index