Search form

Éxodo 7

1Mãpai Tachi Akꞌõrepa Moisemaa mãgaji:

—Mɨ pari pɨ Faraón kꞌĩrapite wãitꞌee mãikꞌaapa mama pɨa ne–inaa mɨa oopi bɨkꞌa ooitꞌee. Mamĩda pɨ ɨ̃pema Aarón pɨ pari pedeeitꞌee. 2Pɨa irumaa jõmaweda mɨa jara bɨkꞌa jaraitꞌee. Mãpai irua jaraitꞌee Faraonmaa israelitaarã pëimerã Egipto eujãdeepa. 3Mamĩda mɨa Faraón kꞌɨɨrɨ kꞌisuapiitꞌee pëinaamerã. Mãga nɨde Egipto eujãde mɨa ne–inaa chokꞌara eperãarãpa waide unudakꞌaa unupiitꞌee. 4Mamĩda Faraonpa ũriamaa baitꞌee parãpa jararuta. Maperã mɨa ne–inaa chokꞌara ooitꞌee Egiptode mãikꞌaapa mɨ eperãarã, israelitaarã, mamãikꞌaapa uchiapiitꞌee. 5Mɨa mãga ookꞌãri, Egipto pidaarãpa kꞌawadaitꞌeeda aji, mɨ Tachi Akꞌõre.

6Moisepa Aarón ome jõmaweda oojida Tachi Akꞌõrepa jaradakꞌa. 7Moisés ochenta años iru baji; jõdee Aarón ochenta y tres años iru baji Faraón kꞌĩrapite pedeenadakꞌãri.

Aaronpa pakꞌuru anipapari

8Wãdai naaweda, Tachi Akꞌõrepa Moisemaa mãikꞌaapa Aaronmaa mãgaji:

9—Faraonpa iidikꞌãri parãpa oodamerã ne–inaa eperãarãpa pꞌoyaa oodakꞌaa ãchi juadoopa, nãga óoji. Jaráji Aaronmaa ichi pakꞌuru anipapari atapꞌeda, te jãde batꞌatꞌaamerã Faraón kꞌĩrapite, mãgá taama padaimerã.

10Maapꞌeda Moisés Aarón ome wãjida Faraonmaa Tachi Akꞌõrepa jarapida jarade. Oojida jõma irua jaradakꞌa Faraón kꞌĩrapite mãikꞌaapa poro waibɨarã ichi ekꞌari beerã kꞌĩrapite. Aaronpa ichi pakꞌuru te jãde batꞌatꞌaakꞌãri, taama padachi. 11Mãga unukꞌãri, Faraonpa kꞌĩsia kꞌawaa beerã mãikꞌaapa petau tau kꞌawaa beerã tꞌɨ̃ pëiji. Pachedakꞌãri, ãrapa aukꞌa oojida, secreto kꞌawaa pꞌanadapꞌedaa perã. 12Ãchi pakꞌuru anipapatapꞌedaa batꞌatꞌaadakꞌãri, aukꞌa taama padachida. Mamĩda Aarón pakꞌuru taama padaridapa chi apemaarãde kꞌokꞌooji. 13Faraonpa ma jõma unuji mĩda, ijãa–e paji, kꞌɨɨrɨ kꞌisuadariida perã Tachi Akꞌõrepa naaweda jaradakꞌa.

Tachi Akꞌõrepa pania waa papida

14Maapꞌeda Tachi Akꞌõrepa Moisemaa mãgaji:

—Faraón kꞌɨɨrɨ kꞌisua bairã, israelitaarã pëiamaa bɨ. 15Maperã nu tapꞌedaweda Faraón Nilo to idee wãi naaweda, pɨ wãipia bɨ iru nɨde to ide ma pakꞌuru taama padaipari ome. 16Iru mama pakꞌãri, jaráji: “Tachi Akꞌõre, hebreorã Akꞌõre Waibɨapa mɨ pëiji nãga jaramerã: ‘Mɨ eperãarã wãpipáde aji, eperãarã pꞌanadakꞌaamaa, mama mɨmaa ɨtꞌaa tꞌɨ̃nadamerã.’ Mamĩda pɨ kꞌɨɨrɨ kꞌisua bairã mãga ooamaa bɨ. 17Mapa Tachi Akꞌõrepa jara bɨ: ‘Ɨ̃rá kꞌawaaitꞌeeda aji, Mɨta Tachi Akꞌõre.’ Mɨa na pakꞌurupa na todepema paniamaa wɨkꞌãri, waa padariitꞌee. 18Chikꞌo aɨde nɨ̃bɨ piukꞌoodariitꞌee mãikꞌaapa pania mikꞌia ũu beeitꞌee. Maperã Egipto pidaarãpa na pania todaamaa pꞌaneedaitꞌeeda” aji.

19Ma awara Tachi Akꞌõrepa Moisemaa mãgaji:

—Jaráji Aaronmaa ma pakꞌuru toidaa ɨamerã Egiptodepema to chakꞌe beemaa, lago beemaa mãikꞌaapa pania tꞌɨpata pozo beemaa, ma pania jõmaweda waa padaimerã. Mãgá Egipto eujã jõmaade waa unudaitꞌeeda aji, pania tꞌɨpata pakꞌurudee oodade, mãudee oodade paara.

20Moisepa Aarón ome oojida Tachi Akꞌõrepa jaradakꞌa. Aaronpa Nilo todepema pania tꞌõbaiji ma pakꞌurupa Faraón kꞌĩrapite mãikꞌaapa poro waibɨarã iru jua ekꞌari beerã kꞌĩrapite. Mãpai pania jõmaweda waa padachi. 21Chikꞌo jõmaweda aɨde pꞌanadapꞌedaa kꞌiniidachida. Eperãarãpa madepema pania pꞌoyaa todakꞌaa paji, mikꞌia bada perã. Egipto eujã jõmaade waa unujida.

22Mamĩda Egiptodepema petau tau kꞌawaa beerãpa aukꞌa oojida. Mapa Faraonpa ijãa–e paji, kꞌɨɨrɨ kꞌisua bada perã Tachi Akꞌõrepa naaweda jaradakꞌa. 23Ichi palaciodee wãji, ichi–itꞌee pꞌua–e bada perã Tachi Akꞌõrepa oopida. 24Nilo to ide Egipto pidaarãpa eujãde uria kꞌorojida pania bëisãa todaitꞌee, toida wẽ–e pada perã.

25Tomiamaa Tachi Akꞌõrepa Moisés waya Faraonmaa pëiji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index