Search form

Éxodo 8

Tachi Akꞌõrepa baso chokꞌara Egipto eujãdee pëida

1Tachi Akꞌõrepa Moisemaa mãgaji:

—Faraonmaa jaranapáde aji: “Tachi Akꞌõrepa nãga jara bɨ: ‘Mɨ eperãarã wãpipáde a bɨ, mɨmaa ɨtꞌaa tꞌɨ̃nadamerã. 2Mãga oo–e pɨrã, mɨa baso chokꞌara pɨ eujãdee pëiitꞌee. 3Toida chokꞌara paraaitꞌee. Toiduupa uchiadaitꞌee mãikꞌaapa tꞌĩudaitꞌee pɨ palaciode, pɨ kꞌãiparimãi, poro waibɨarã pɨ jua ekꞌari beerã tede, apemaarã Egiptodepemaarã tede, pan ɨ̃pɨpatamãi, pan masa oopatamãi paara. 4Ichiaba batau chedaitꞌee pɨ ɨ̃rɨ, poro waibɨarã pɨ jua ekꞌari beerã ɨ̃rɨ, apemaarã eperãarã jõmaarã ɨ̃rɨ paara.’ ”

5Mãpai Tachi Akꞌõrepa Moisemaa mãgaji:

—Aaronmaa jarapáde aji, ma pakꞌuru toidaa ɨamerã, to jõmawedamaa, to chakꞌe jõmawedamaa, mãikꞌaapa lago jõmawedamaa, baso chokꞌara uchiadamerã Egipto pidaarã eujãde.

6Aaronpa mãga ookꞌãri, Egipto eujã jõmaade baso chokꞌara uchiajida. 7Mamĩda petau tau kꞌawaa beerãpa aukꞌa oojida.

8Mãpai Faraonpa jara pëiji Moisés, Aarón ome chedamerã mãikꞌaapa ãramaa mãgaji:

—Tachi Akꞌõremaa ɨtꞌaa tꞌɨ̃́tɨ baso namãikꞌaapa ãyaa wãpimerã. Mãga ooruta pɨrã, mɨa hebreorã pëiyada aji, iru–itꞌee ne–animalaarã paanadamerã.

9Moisepa pꞌanauji:

—¿Sãapai kꞌinia bɨma aji, mɨa ɨtꞌaa tꞌɨ̃merã pɨ pari, poro waibɨarã pɨ jua ekꞌari beerã pari mãikꞌaapa apemaarã eperãarã pari, na baso parã tedeepa ãyaa wãdamerã mãikꞌaapa Nilo todepai pꞌaneedamerã?

10Faraonpa pꞌanauji:

—Nu mãga oopáde aji.

Moisepa mãgaji:

—Mãgara nu mãga ooitꞌee, pɨa kꞌawaamerã awaraa wẽ–e Tachi Akꞌõre, tai Akꞌõre Waibɨakꞌa. 11Na baso ãyaa wãdaitꞌee parã tedeepa mãikꞌaapa toidapai pꞌaneedaitꞌee.

12Maapꞌeda Moisés, Aarón ome uchiajida Faraón palaciodeepa. Moisepa ɨtꞌaa tꞌɨ̃kꞌãri, 13Tachi Akꞌõrepa baso teeda pꞌanadapꞌedaa, te ãukꞌidaa pꞌanadapꞌedaa mãikꞌaapa pꞌuurudeepa taawa pꞌanadapꞌedaa piupikꞌooji. 14Mãpai Egipto pidaarãpa ma baso pꞌedapꞌeda, chokꞌara pëi jẽra bɨjida. Mapa Egipto eujã jõmaade mikꞌia jo nɨ̃beeji. 15Faraonpa mãga unuji mĩda mãikꞌaapa kꞌawaji mĩda waa baso uchiada–e pꞌanɨ, israelitaarã pëi–e paji, kꞌɨɨrɨ kꞌisua bada perã Tachi Akꞌõrepa naaweda jaradakꞌa.

Tachi Akꞌõrepa Egipto eujãdee moscora pëida

16Maapꞌeda Tachi Akꞌõrepa Moisemaa mãgaji:

—Jarapáde aji, Aaronmaa ma pakꞌurupa yooro pꞌoramaa wɨmerã, madeepa moscora uchiadamerã.

17Mãga ooji. Aaronpa ma yooro pꞌoramaa wɨkꞌãri, Egiptodepema yooro pꞌora jõmaweda mosco pakꞌoodachi. Moscopa eperãarã mãikꞌaapa ne–animalaarã kꞌaamaa pꞌaneejida. 18Egiptodepema petau tau kꞌawaa beerãpa ichiaba mosco uchiapi kꞌinia pꞌanajida. Mamĩda pꞌoyaa ooda–e paji. Mãgá moscopa eperãarã, ne–animalaarã paara audupai kꞌaapachida.

19Mãpai chi petau tau kꞌawaa beerãpa Faraonmaa mãgajida:

—Akꞌõre Waibɨ́apata nãga oo bɨda ajida.

Mamĩda Faraonpa ijãa–e paji, kꞌɨɨrɨ kꞌisua bada perã Tachi Akꞌõrepa naaweda jaradakꞌa.

Tachi Akꞌõrepa Egipto eujãdee sĩtara pëida

20Maapꞌeda Tachi Akꞌõrepa Moisemaa mãgaji:

—Nu tapꞌedaweda Faraón toidaa wãitꞌee. Mapa tapꞌedaweda pꞌirabáiji mãikꞌaapa nãga jaranáji: “Tachi Akꞌõrepa nãga jara bɨ: ‘Mɨ eperãarã pëipáde a bɨ, mɨmaa ɨtꞌaa tꞌɨ̃nadamerã. 21Mãga oo–e pɨrã, mɨa sĩta pëiitꞌee pɨmaa, poro waibɨarã pɨ jua ekꞌari beerãmaa, apemaarã Egipto pidaarãmaa mãikꞌaapa parã jõmaarã temaa paara. Chokꞌara paraaitꞌee mãikꞌaapa ma sĩtapa parã eujã ipurudariitꞌee. 22Mamĩda mɨa mãga ookꞌãri, mãga oo–e paitꞌee Gosén eujã, mɨ eperãarã pꞌanapata eujãde. Jãma sĩta apida unuda–e paitꞌee. Mãgapɨ pɨa kꞌawaitꞌee mɨ, Tachi Akꞌõre, na eujãde bɨ. 23Mɨchi eperãarã pipɨara akꞌɨitꞌee përé kꞌãyaara. Nu pɨa unuitꞌeeda a bɨ, ma ne–inaa eperãarãpa pꞌoyaa oodakꞌaa.’ ”

24Tachi Akꞌõrepa ooji ichia jaradakꞌa. Sĩta cho–kꞌara pëiji Faraón palaciomaa, poro waibɨarã ichi jua ekꞌari beerã temaa, mãikꞌaapa jõmaarã Egiptodepemaarã temaa. Ne–inaa jõmaweda ma sĩtapa ãrikꞌoojida.

25Mãpai Faraonpa atapiji Moisés, Aarón ome mãikꞌaapa mãgaji:

—Wãdapáde aji, hebreorã jõmaweda pãchi Akꞌõre Waibɨa–itꞌee ne–animalaarã paade. Mamĩda Egipto eujãdeepa uchianaadapáde aji.

26Moisepa pꞌanauji:

—Mãga pꞌoyaa ooda–e. Egipto pidaarãpa ne–animalaarã ũkꞌuru peedakꞌaa ãra–itꞌee kꞌachia bairã. Maperã ãchi taide mãgɨ́ ne–animalaarã tai Akꞌõre Waibɨa–itꞌee peeruta pɨrã, ãrapa tai mãupa batꞌa peedayada aji. 27Tai wãdaipia bɨ ode kꞌãima õpee eperãarã pꞌanadakꞌaamaa. Mama ne–animalaarã paadaitꞌeeda aji, tai Akꞌõre Waibɨapa jaradakꞌa.

28Mãpai Faraonpa mãgaji:

—Mɨa parã pëiitꞌee eperãarã pꞌanadakꞌaamaa, mama ne–animalaarã paadamerã parã Akꞌõre Waibɨa–itꞌee. Mamĩda tꞌɨmɨ́ wãdaikꞌaraa bɨ. Ɨ̃rá mɨ pari parã Akꞌõre Waibɨamaa chupɨria iidipáde aji.

29Moisepa pꞌanauji:

—Mɨ namãikꞌaapa uchiakꞌãri, Tachi Akꞌõremaa ɨtꞌaa tꞌɨ̃itꞌee, irua nu parã jõmaarã tedeepa ma sĩta ãyaa pëimerã. Mamĩda waa tai kꞌũranáaji mãikꞌaapa jaranaapáde aji, wãnaadamerã ne–animalaarã paade Tachi Akꞌõre–itꞌee.

30Moisés Faraón palaciodeepa uchiakꞌãri, iru pari Tachi Akꞌõremaa ɨtꞌaa tꞌɨ̃ji. 31Tachi Akꞌõrepa ooji Moisepa iididakꞌa. Ma sĩta jõmaweda ãyaa pëiji Faraón palaciodeepa, poro waibɨarã ichi jua ekꞌari beerã tedeepa mãikꞌaapa apemaarã Egipto pidaarã jõmaarã tedeepa. 32Mamĩda Faraón atꞌãri kꞌɨɨrɨ kꞌisua bada perã, israelitaarã pëi–e paji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index