Search form

Éxodo int

Introducción

Éxodo jara kꞌinia bɨ ‘‘uchiada” maa–e pɨrã “awara ãi wãdapꞌedaa”. Na libro mãga tꞌɨ̃jarapata, Tachi Akꞌõrepa israelitaarã ateeda perã Egipto eujãde esclavo pꞌanadapꞌedaadeepa pꞌuuru chiwidi ooitꞌee.

Na librode naapɨara kꞌawadaitꞌee (cap. 1.1–15.21) israelitaarã esclavo pꞌanadapꞌedaa Egipto eujãde. Ma israelitaarã uchiapiitꞌee, Tachi Akꞌõrepa jɨrɨtꞌeraji eperã aba tꞌɨ̃jarapatapꞌedaa Moisés. Na libro leedakꞌãri, Moisés tꞌɨ̃ audú unudaitꞌee, iru kꞌapꞌɨa Tachi Akꞌõrepa ichi pꞌuuru pidaarã kꞌaripada perã. Kꞌawadaitꞌee Moisés tꞌoda mãikꞌaapa irua ooda, ichi kꞌũtrãa bakꞌãri. Ichiaba kꞌawadaitꞌee sãgata Tachi Akꞌõrepa iru jɨrɨtꞌerada. Mãgɨ́ eperãpa ichi pꞌuuru pidaarã uchiapiji Egipto eujãde esclavo pꞌanadapꞌedaamãiipa ateeitꞌee Canaán eujãdee. Na capitulode ichiaba kꞌawadaitꞌee sãgá Moisés pedeenada Faraón kꞌĩrapite israelitaarã pari. Na capitulode ichiaba kꞌawadaitꞌee sãgata chi naapema Pascua fiesta oodapꞌedaa mãikꞌaapa sãapꞌeda ma fiesta oojida.

Tꞌẽepai kꞌawadaitꞌee (cap. 15.22–20.1) ne–inaa Tachi Akꞌõrepa israelitaarãmaa jarateeda ichide audupɨara ijãadamerã. Mãgá ãchimaa jaratee wãji ma eujã pania wẽe bɨde wãyaa wãdakꞌãri, Sinaí eede parutamaa. ¿Sãapꞌeda israelitaarã eujã pania wẽe bɨde wãyaajida? Made wãyaajida Tachi Akꞌõrepa ãra uchiapikꞌãri Egipto eujãdeepa ateeitꞌee ichia eujã ãchi chonaarãmaa teeitꞌeeda adadee. Sinaide pꞌanɨde Tachi Akꞌõrepa teeji ley diez mãikꞌaapa pacto ooji ãra ome.

Tꞌẽepai kꞌawadaitꞌee (cap. 21–24) Tachi Akꞌõrepa ley teekꞌãri israelitaarãmaa kꞌawaadamerã sãga pꞌanapataadaipia bɨ iru kꞌĩrapite mãikꞌaapa ãchi kꞌõpꞌãyoorã ome.

Tꞌẽepai kꞌawadaitꞌee (cap. 25–31) Tachi Akꞌõrepa jarakꞌãri sãga oodaipia bɨ ichi ome unupata te mãikꞌaapa netꞌaa aɨde bɨpata.

Tꞌẽepai kꞌawadaitꞌee (cap. 32–34) israelitaarã oo kꞌiniada–e pꞌanadakꞌãri Moisepa jaradakꞌa. Ma kꞌãyaara oojida pꞌakꞌa chakꞌe nẽedee aɨ kꞌĩrapite ɨtꞌaa tꞌɨ̃daitꞌee.

Tꞌẽepai kꞌawadaitꞌee (cap. 35–40) Tachi Akꞌõre ome unupata te abaamãi oodakꞌãri.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index