Search form

Génesis 19

Tachi Akꞌõrepa Sodoma mãikꞌaapa Gomorra pꞌuuru jõpitꞌaada

1Kꞌeu wãkꞌãri, ma angeleerã omé Sodoma pꞌuurude panajida. Pꞌuuru tꞌĩupata kꞌaitꞌa eperãarã chipꞌepatamãi Lot su–akꞌɨ baji. Lotpa ma angeleerã unukꞌãri, bainɨ̃ beepꞌeda, ãra auteebaiji. 2Mãpai mãgaji:

—Eperãarã poro waibɨarã, mɨa kꞌinia bɨ parã mɨ temaa chedamerã, mɨa parã kꞌaripa kꞌinia bairã. Mama parã bɨɨrɨ sɨɨdai mãikꞌaapa kꞌãidai. Nu tapꞌedaweda parã ode pia wãdayada aji.

Mamĩda ma angeleerãpa mãgajida:

—Gracias. Pɨ tede kꞌãida–e. Plazade kꞌãidaitꞌeeda ajida.

3Mamĩda Lotpa jara bɨpa wãjida iru temaa. Mama panadakꞌãri, Lotpa chikꞌo joopipꞌeda, ãramaa teeji pan levadura wẽe bɨ ome kꞌodamerã.

4Teeda pꞌanɨde kꞌãidai naaweda, Sodoma pꞌuurudepema ɨmɨkꞌĩraarã; kꞌũtrãarã, chonaarã paara chejida mãikꞌaapa te wapꞌɨra atajida. 5Mãpai Lotmaa biajida:

—¿Sãma pꞌanɨma ajida, jã eperãarã omé chedapꞌedaa? Taawaa uchia pꞌe atapáde ajida. Tai ãra ome aukꞌa kꞌãidaitꞌee.

6Lot ichi tedeepa uchiaji mãikꞌaapa chi puerta jɨ̃aji. 7Mãpai mãgaji:

—Kꞌõpꞌãyoorã, mɨ chupɨria kꞌawaadapáde aji. Kꞌachia oonaadapáde aji, mɨa auteebaida eperãarã ome. 8Mɨa kꞌau awẽraarã teeyada aji. Mãɨrã waide ɨmɨkꞌĩraarã ome kꞌãida–e pꞌanɨ. Pãchia oo kꞌiniata oodai mãɨrã ome. Mamĩda na eperãarãmaa ne–inaa kꞌachia oonaadapáde aji, mɨa ãra auteebaida perã mɨ tede pꞌaneedamerã.

9Mamĩda ma ɨmɨkꞌĩraarãpa kꞌiniada–e paji. Mapa mãgajida:

—¡Pɨ nãpema–epɨ! ¡Tai chokꞌapari–epɨ! ¡Ãyaa wãpáde ajida, maa–e pɨrã pɨmaa ne–inaa audupɨara kꞌachia oodayada! ajida.

Lot jita atadaitꞌee paji mãikꞌaapa ichi tedepema puerta ãritꞌaadaitꞌee paji. 10Mamĩda angeleerãpa juadeepa teedaa jidiu atajida mãikꞌaapa chi puerta jɨ̃a nɨ̃bɨjida. 11Mãpai ma ɨmɨkꞌĩraarã; kꞌũtrãarã, chonaarã paara tau pꞌãriukꞌoodachida. Ma puerta maarepida unudakꞌaa paji ma angeleerãpa tau pꞌãriupikꞌoodapꞌedaa perã.

12Mãpai ma angeleerãpa Lotmaa iidijida:

—¿Na pꞌuurude awaraa eperãarã paraakꞌã ajida, pɨa atee kꞌinia bɨ pɨchideerã ome? Ma eperãarã jõmaweda atapꞌeda ãchi netꞌaa ome, wãdapáde ajida, 13na pꞌuurudeepa ãyaa, taipa nãpemaarã jõmaweda peekꞌoodaitꞌee perã. Tachi Akꞌõrepa ãchi ome waa choo–eda aji, jõmaarã kꞌĩrapite audú ne–inaa kꞌachia ooi awaa pꞌanadairã. Na pꞌuuru jõtꞌaadaitꞌeeda ajida.

14Mãpai Lot wãji chi wiurã padaitꞌee padaarãmaa jarade aukꞌa ma pꞌuurudeepa ãyaa uchiadamerã.

—¡Isapai chedapáde aji, pꞌuurudeepa taawaa, Tachi Akꞌõrepa na pꞌuuru jõtꞌaaitꞌee perã!

Mamĩda ãchia Lot pedee ijãada–e paji kꞌĩsiadapꞌedaa perã iru pedidata bɨ.

15Tapꞌedapodopa angeleerãpa Lotmaa mãgajida:

—¡Isapai pꞌirabáiji mãikꞌaapa wã́ji pɨchi wẽra ome, pɨ kꞌaurã omé ome! ¡Piu kꞌiniada–e pꞌanɨ pɨrã, wã́tɨ taipa na pꞌuurudepemaarã jõmaweda peekꞌoodaitꞌee perã!

16Mamĩda Lot audupai taarãdaida perã, angeleerãpa iru, chi wẽra, chi kꞌaurã ome juadeepa ãyaa ateejida. Mãga oojida Tachi Akꞌõrepa ãra chupɨria kꞌawaada perã.

17Pꞌuurudeepa tꞌɨmɨ́ panadakꞌãri, ángel abaapa mãgaji:

—¡Eedee pꞌiradapáde! aji. ¡Ãpɨtee akꞌɨnáatɨ mãikꞌaapa akꞌɨnɨ̃ pꞌaneenáatɨ na eujã jewedaade wãyaapari ode! Ee jẽra beemaa wãdapáde aji, piunaadamerã.

18Mamĩda Lotpa mãgaji:

—Mãga–eda aji. Mɨ chupɨria kꞌawaadapáde aji. 19Wãara, parãpa tai chupɨria kꞌawaa pꞌanɨ, kꞌaripamaa pꞌanadairã tai piunaadamerã. Mamĩda tai jã eede panada–e pai. Nama ode wãdade tai piudayada aji. 20Nama kꞌaitꞌa pꞌuuru kꞌaipee bɨ. Araadai jãmaa wãdaitꞌee. ¡Jãmaa pëipáde aji, maa–e pɨrã tai piudayada! aji.

21Mãpai abaapa mãgaji:

—Pɨa jaradakꞌa ooitꞌeeda aji. Ma pꞌuurude pꞌanɨɨrã pee–eda aji, parã mamaa wãruta perã. 22Mamĩda isapai mamaa wãdapáde aji, parã panadai naaweda, mɨa maarepida pꞌoyaa oo–e perã.

Ma pꞌuuru tꞌɨ̃jarapachida Zoar.

23Tapꞌedaweda Lot paji Zoar pꞌuurude. 24Mãpai Tachi Akꞌõrepa ɨtꞌariipa pëiji hielo kꞌoi taukꞌa, tꞌɨpɨtau ome Sodoma ɨ̃rɨ mãikꞌaapa Gomorra ɨ̃rɨ. 25Ma eujã jewedaade beeda pꞌuurudepemaarã jõmaweda jõ atapëiji; ãchia ne–uudapꞌedaa paara. Aba Zoar pꞌuuru aupai jõtꞌaa–e paji. 26Mamĩda chewã nidade Lot wẽrapa ãpɨtee akꞌɨkꞌãri, tꞌã padachi mãikꞌaapa mãukꞌa padachi.

27Aɨ norema Abraham tapꞌedaweda wãji Tachi Akꞌõre ome pedeemaa badamaa. 28Akꞌɨkꞌãri Sodoma, Gomorra pꞌuurumaa, ma eujã jewedaa jõmaweda nari jɨ̃rakꞌawaa nɨ̃baji. 29Mãgá Tachi Akꞌõrepa Lot bapariidamãi jõmaweda jõtꞌaaji. Mamĩda Abraham kꞌaurepa Lot jõpi–e paji.

Lotdeepa uchiadapꞌedaarã

30Ma tꞌẽepai Lot waawee beeji Zoar pꞌuurude beeitꞌee. Mapa chi kꞌau omé iru bada ome mẽe wãjida, ee paraamaa. Mama mãu te uriade pꞌaneejida.

31Mama pꞌanɨde ewari aba chi kꞌau naapemapa mãgaji chi tꞌẽepemamaa:

—Mɨ akꞌõre chonaadaruda aji. Nama wẽ–e ɨmɨkꞌĩraarã tachi atadaitꞌee ãchi wẽraarãkꞌa na eujãdepemaarãpa oopatakꞌa. 32Maperã vino topidáma mɨ akꞌõremaa, iru piu beemerã. Mãpai iru ome kꞌãidáma. Mãgá biakꞌoodayada aji, mãikꞌaapa tachideepa uchiadaitꞌeerã paraaitꞌeeda aji.

33Ma ewateweda pꞌãrikꞌua chi akꞌõre vinopa piupitꞌaajida. Mãɨmisa chi kꞌau naapema kꞌãiji iru ome. Mamĩda piu bada perã, Lotpa kꞌawa–e paji chi kꞌau jẽra beekꞌãri mãikꞌaapa pꞌirabaikꞌãri.

34Aɨ norema chi naapemapa mãgaji chi tꞌẽepemamaa:

—Nuweda mɨ kꞌãijida aji, mɨ akꞌõre ome. Waya piupidáma vinopa pɨ idi pꞌãrikꞌua iru ome kꞌãimerã. Mãgá tachi omeeweda warra tꞌodayada aji.

35Ma pꞌãrikꞌua waya piupitꞌaajida vinopa. Mãpai chi tꞌẽepema kꞌãiji Lot ome. Mamĩda Lotpa aukꞌa kꞌawa–e paji. 36Maapꞌeda biakꞌoojida. 37Chi naapemapa warra tꞌoji. Tꞌɨ̃ bɨji Moab. Irudeepa uchiajida moabitaarã. 38Chi tꞌẽepemapa ichiaba warra tꞌoji. Tꞌɨ̃ bɨji Ben Amí. Irudeepa uchiajida amonitaarã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index