Search form

Génesis 20

Abraham Abimélec ome

1Maapai Abraham banaji Néguev eujãde. Beeji Guerar pꞌuurude, Cades punto Sur punto esajĩakꞌa. 2Mama pꞌanɨde ma pꞌuurudepema rey waaweepa Abrahampa jaraji chi wẽra Sara ichi ɨ̃pewẽra. Mapa Guerardepema rey Abimelecpa Sara ichi temaa aneepiji chi wẽra papiitꞌee. 3Mamĩda ma ewate pꞌãrikꞌua Abimélec kꞌãimokꞌaraaji.

Ma kꞌãimokꞌaraa bɨde Tachi Akꞌõrepa jaraji:

—Pɨ piuitꞌeeda aji, chĩara wẽra atada perã.

4Mamĩda Abimelecpa atꞌãri Sara tꞌõbai–e bada perã, pꞌanauji:

—Mɨchi Waibɨa, ¿sãgá mɨ piupiyama aji, atꞌãri ma wẽra tꞌõbai–e bɨta? 5Abrahampa mɨmaa chi ɨ̃pewẽrada aji. Chi wẽrapa pida aukꞌa mãga jaraji. Mɨa ãchi pedee ijãaji. Tꞌãri jĩpꞌa mãga ooji. Maarepida kꞌachia oo–e pajida aji.

6Mãpai ma kꞌãimokꞌaraade Tachi Akꞌõrepa pꞌanauji:

—Mɨa kꞌawa bɨda aji, pɨa ãra pedee ijãada. Mapa ma wẽra tꞌõbaipi–e paji, ne–inaa kꞌachia mɨ kꞌĩrapite oonaamerã. 7Mamĩda ɨ̃rá ma wẽra teepáde aji, chi ɨmɨkꞌĩramaa, iru mɨ pedee jarapari perã. Iruata pɨ pari mɨmaa chupɨria iidiitꞌeeda aji, pɨ piunaamerã. Mamĩda ma wẽra pëi–e pɨrã chi kꞌimamaa, pɨ, pɨchideerã ome piudaitꞌeeda aji.

8Aɨ norema tapꞌeda Abimélec pꞌirabaipꞌeda, ma kꞌãimokꞌaraada nepɨrɨji ichi mimiapataarãmaa. Mãga ũridakꞌãri, pꞌeradachida.

9Ma tꞌẽepai Abimelecpa Abraham tꞌɨ̃ pëiji mãikꞌaapa irumaa mãgaji:

—¡Pɨ kꞌaurepa mɨ perá piujida! aji. ¿Sãapꞌeda mɨ, mɨchi jua ekꞌari pꞌanɨɨrã ome kꞌachiade baaipi kꞌinia bɨma? aji. Mãga ooikꞌaraa bɨda aji. 10¿Kꞌãata kꞌĩsia bajima aji, ma seewa mɨmaa jarakꞌãri?

Mãgá Abimelecpa Abraham ɨtrɨatꞌaaji.

11Mãpai Abrahampa pꞌanauji:

—Mɨa kꞌĩsiaji nãpemaarãpa Tachi Akꞌõre Waibɨa waaweedakꞌaa. Ãchobee baji mɨ peedai jĩakꞌaapa mɨ wẽra kꞌapꞌɨa. 12Mamĩda wãara jarajida aji, jarakꞌãri iru mɨ ɨ̃pewẽra. Iru mɨ akꞌõre kꞌau; mamĩda mɨ nawedeepa uchiada–e. Mapa mɨa ataji mɨchi wẽra papiitꞌee. 13Tachi Akꞌõrepa jarakꞌãri mɨ uchiamerã mɨ akꞌõre tedeepa, mɨa Saramaa mãgaji: “Pɨa mɨ wãara kꞌinia iru bɨ pɨrã, tachi unurutaarãmaa jarapáde aji, pɨ mɨ ɨ̃pewẽra, pɨ kꞌapꞌɨa mɨ peenaadamerã.”

14Mãpai Abimelecpa Sara teeji Abrahammaa. Ma awara teeji ovejaarã, pꞌakꞌaarã, esclavoorã esclavaarã ome.

15Mãpai Abrahammaa mãgaji:

—Na eujã mëreda aji. Jɨrɨtꞌerapáde aji, parã aɨde pꞌanapataadamerã.

16Mãpai Saramaa mãgaji:

—Mɨa ne–inaa teeda pɨ ɨ̃pemamaa pꞌaratꞌa tau mil vale bɨda aji. Ma ne–inaa kꞌaurepa parã ome nipapataarãdepema apidaapa pɨ ãpɨte pedee kꞌachia jaradaikꞌaraa bɨda aji.

17-18Abimelecpa Sara atakꞌãri ichi wẽra papiitꞌee, Tachi Akꞌõrepa iru tedepema wẽraarã jõmaweda kꞌayaapiji warra tꞌonaadamerã. Mapa Abimelecpa Sara teekꞌãri Abrahammaa, irua rey Abimélec pari, chi wẽra pari mãikꞌaapa ãchi tede mimiapataarã pari ɨtꞌaa iidiji. Mãgá Tachi Akꞌõrepa ãra jõmaweda jɨpaji warrarã tꞌodamerã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index