Search form

Génesis 23

Abraham wẽra Sara jai–idaada

1-2Taarã pakꞌãri, Abraham ichideerã ome pꞌananajida Quiriat Arbá pꞌuurude, ichiaba tꞌɨ̃jarapatapꞌedaa Hebrón. Ma pꞌuuru Canaán eujãde bɨ. Mama Sara jai–idaaji. Ciento veintisiete años iru baji. Abraham jẽeji ichi wẽra–itꞌee, mãikꞌaapa chi–ɨaji.

3Sara jai–idaada tꞌẽepai Abraham wãji pedeede ma eujãde pꞌanapatapꞌedaa hititaarã ome. Mãgaji:

4—Mɨ parã eujãde kꞌĩra tewaraa mĩda, kꞌinia bɨ mɨmaa eujã neto pëidamerã mɨ wẽra aɨde ɨaitꞌee.

5Hititaarãpa pꞌanaujida:

6—Eperãarã poro waibɨa, ¡ũripáde! ajida. Pɨ kꞌinia pꞌanɨ tai tꞌãide. Jɨrɨtꞌerapáde ajida, jãɨra pipɨara bɨ, aɨde pɨchi wẽra ɨamerã. Taidepema apidaapa pɨmaa eujã wãakꞌada–eda ajida, pɨchi wẽra aɨde ɨamerã.

7Mãpai Abraham bainɨ̃ beepꞌeda, ɨ̃jaabaiji ãchi kꞌĩrapite 8mãikꞌaapa mãgaji:

—Wãara kꞌinia pꞌanɨ pɨrã mɨa mɨchi wẽra ɨamerã parã eujãde, mɨ pari chupɨria iididapáde aji, Zojar warra Efronmaa. 9Iru eujãde bɨ mãu te tꞌɨ̃jarapata Macpela. Mãgɨ́ mɨa neto kꞌinia bɨ chi valor pari. Mãgá na eujãde mɨa jãɨra iru bayada aji.

10Ma hitita pida Efrón mama su–akꞌɨ bada perã ichi aukꞌaarã ome, ichia pꞌanauji. Ma pꞌuuru tꞌĩupatamãi wãyaa wãdapꞌedaarã jõmaarã taide mãgaji:

11—¡Eperãarã poro waibɨa, mãga–eda! aji. Ma eujã chi mãu te ome pɨmaa pari teeitꞌee. Mɨchi aukꞌaarã nama pꞌanɨɨrãpa ũri pꞌanɨ mɨa jara bɨ. Pari teeitꞌeeda aji. Ma mãu tede pɨchi wẽra ɨapáde aji.

12Mamĩda Abraham waya ɨ̃jaabaiji ãchi kꞌĩrapite 13mãikꞌaapa jõmaarã taide Efronmaa mãgaji:

—Chupɨria kꞌawaapáde aji. Mɨ pedee ũríji. Mɨa kꞌinia bɨ pɨa pꞌaratꞌa jitamerã ma eujã mãikꞌaapa chi mãu te pari. Maapꞌeda mɨchi wẽra mama ɨaitꞌeeda aji.

14Mãpai Efronpa pꞌanauji:

15—Eperãarã poro waibɨa, ũripáde aji. Ma eujã pꞌaratꞌa tau cuatrocientos vale bɨda aji. Aupedeenaadáma aji, ma kꞌapꞌɨa. Pɨchi wẽra mama ɨapáde aji.

16Abrahampa ijãaji. Efronpa jaradakꞌa hititaarã taide pꞌaratꞌa tau cuatrocientos pꞌaaji.

17Mãgá Efronpa eujã Macpela mãu te ome neto pëiji Abrahammaa. Ma eujã Mamré eujã oriente eere baji. Efronpa ma eujã neto pëiji chi pakꞌuru aɨde pꞌanɨ ome. 18Mãga ooji hititaarã taide mãikꞌaapa awaraa ma pꞌuurude tꞌĩupatade pꞌanadapꞌedaarã taide.

19Maapꞌeda ma mãu tede Abrahampa chi wẽra Sara ɨaji. Ma mãu te Macpela eujãde bɨ; Mamré eujã oriente eere. Ma Mamré eujã Canaán eujãde bɨ ichiaba Hebrón apachida. 20Mãgá hititaarã juakꞌaawa Abrahampa neto ataji ma eujã chi mãu te ome aɨde ichideerã ɨadamerã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index