Search form

Génesis 33

Jacob Esaú ome tꞌãri aukꞌa bɨdapꞌedaa

1Aɨ norema Jacobpa chi ɨ̃pema unukꞌãri cuatrocientos eperãarã ome cheruta, ãchobeedachi. Chi warrarã ãchi naweerã ome tꞌooji, mãgá awara–awaraa wãdamerã. 2Naapɨara pëiji chi esclavoorã ãchi warrarã ome. Maapꞌeda Lea pëiji ichi warrarã ome mãikꞌaapa tꞌẽe pëiji Raquel, José ome. 3Mãpai ichi ãra naa wãji chi ɨ̃pema kꞌĩrachuude. Esaú kꞌaitꞌa pakꞌãri, Jacob bedabaidachi tau bɨɨrɨ eujãde tꞌõbairumaa. Bedabaida siete mãgá bedabaidachi.

4Mamĩda Esaú pꞌiraji chi ɨ̃pemamaa mãikꞌaapa o–ĩadachida. Wëre atadapꞌeda, o–ĩapa jẽedachida. 5Maapꞌeda Esaupa unukꞌãri Jacob wẽraarã ãchi warrarã ome, iidiji:

—¿Jãgɨɨrã, kꞌáirãma? aji.

Jacobpa pꞌanauji:

—Mɨ pɨ mimiapari. Jãgɨɨrã mɨ warrarãda aji, Tachi Akꞌõrepa teeda.

6Mãpai ma esclavaarã ãchi warrarã ome kꞌaitꞌa chedapꞌeda, bedabaidachida tau bɨɨrɨ eujãde tꞌõbairutamaa. 7Tꞌẽepai Leapa ichi warrarã ome aukꞌa oojida. Maapꞌeda Raquelpa José ome aukꞌa oojida.

8Mãpai Esaupa iidiji:

—¿Kꞌãata kꞌĩsia iru bɨma aji, ooitꞌee ma ne–animalaarã chokꞌara mɨmaa pëida ome?

Jacobpa pꞌanauji:

—Pɨmaa teeitꞌeeda aji, kꞌawamerã tai pɨ ome kꞌãiwee pꞌanapataadaitꞌee.

9Mãpai Esaupa mãgaji:

—Mãga–eda aji, ɨ̃pema. Mɨa iru bɨda aji, mɨchideerã–itꞌee. Beepáde aji, përeerã ome.

10Mamĩda Jacobpa pꞌanauji:

—Mɨ chupɨria kꞌawaapáde aji. Pɨa mɨ pia akꞌɨ bɨ pɨrã, atáji mɨa tee kꞌinia bɨ. Pɨ nãgá tꞌãri o–ĩa unukꞌãri, mɨ–itꞌee Tachi Akꞌõre ome unu pɨkꞌa baji. 11Mapa kꞌinia bɨ pɨa jã ne–animalaarã pɨchi–itꞌee atamerã. Mɨa maarepida falta–e bɨ, Tachi Akꞌõrepa mɨ pꞌaratꞌara papida perã.

Mãga jara bɨpa Esaupa ijãaji. Ataji ma ne–animalaarã Jacobpa teeda. 12Mãpai mãgaji:

—Wãdáma aji. Mɨ parã naa wãitꞌeeda aji.

13Jacobpa pꞌanauji:

—Ɨ̃pema kꞌinia, pɨa kꞌawa bɨda aji, warrarã pꞌoyaa isapai nipadakꞌaa. Ma awara mɨa pia akꞌɨipia bɨ na pꞌakꞌaarãpa ovejaarã ome ãchi warrarã jutopi wãruta perã. Audú isapai wãruta pɨrã, ewari abaade ovejaarã piukꞌoodayada aji. 14Mɨ naa wãpáde aji. Mɨ pɨ mimiapari. Piakꞌãa chedaitꞌee warrarã kꞌaurepa mãikꞌaapa ne–animalaarã kꞌaurepa. Seirde unudayada aji.

15Esaupa pꞌanauji:

—Pia bɨda aji. Mɨ ome nipapataarã ũkꞌuru atabëiyada aji, parã kꞌaripadamerã.

Mamĩda Jacobpa mãgaji:

—Mãga–eda aji. Kꞌĩsianaapáde aji.

16Ma ewateweda Esaú ãpɨtee wãji ichi temaa Seirde. 17Jõdee Jacob banaji Sucot pꞌuuru kꞌaitꞌa. Mama te pakꞌuru juadee ooji ichi–itꞌee, chi ne–animalaarã–itꞌee paara. Maperã ma pꞌuuru tꞌɨ̃ bɨjida Sucot.+

18Mamãikꞌaapa banaji Canaán eujãdepema Siquén pꞌuuru kꞌĩrapite. Mãgá Tachi Akꞌõrepa iru Padán Aram eujãdeepa kꞌapꞌɨa pia aneeji. 19Mama Canaande eujã neto ataji cien pꞌaratꞌa tau pari eperã Siquén akꞌõre tꞌɨ̃jarapatapꞌedaa Jamor juakꞌaawa. Mama pꞌaneejida. 20Tꞌẽepai mama altar ooji Tachi Akꞌõre–itꞌee. Tꞌɨ̃ bɨji “Tachi Akꞌõre Waibɨa Israel Akꞌõre Waibɨa”.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index