Search form

Génesis 35

Jacob Betelde banada

1Maapꞌeda Tachi Akꞌõrepa Jacobmaa mãgaji:

—Betelde banapáde aji. Mama mɨ–itꞌee altar oopáde aji, mama mɨa pɨmaa unupida perã, Esaú waaweepa pɨ jirabodokꞌãri.

2Mãpai Jacobpa mãgaji ichideerãmaa mãikꞌaapa ichi ome nipapatapꞌedaarãmaa:

—Netꞌaa aɨ kꞌĩrapite ɨtꞌaa tꞌɨ̃pata iru pꞌanɨ pɨrã, aneedapáde aji. Maapꞌeda parã kꞌuidapáde aji, mãikꞌaapa pꞌaru ewaa tꞌõda jɨ̃ pꞌaneedapáde aji, 3tachi Beteldee wãdaitꞌee perã. Mama mɨa Tachi Akꞌõre unuji na eujãdeepa uchiakꞌãri. Maperã mɨa mama altar ooitꞌee iru–itꞌee. Irua mɨ wãru chaa kꞌaripapari mãikꞌaapa mɨ kꞌĩsia nɨ̃bakꞌãri, tꞌãri o–ĩapipari.

4Jacobpa jaradakꞌa netꞌaa aɨ kꞌĩrapite ɨtꞌaa tꞌɨ̃pata jõmaweda irumaa aneejida, ãchi kꞌɨɨrɨdeepema jɨ̃patapꞌedaa paara. Jacobpa ma jõma jau nɨ̃bɨji pakꞌuru ɨtꞌɨa bɨ jua ekꞌari Siquén pꞌuuru kꞌaitꞌa. 5Jacob mamãikꞌaapa uchiakꞌãri ichi ome nipapatapꞌedaarã ome, ãra kꞌaitꞌa pꞌanadapꞌedaa pꞌuuru pidaarãpa maarepida kꞌachia ooda–e paji mãikꞌaapa Jacob warrarã tꞌẽe wãda–e paji, ãra audú waawee pꞌanadapꞌedaa perã.

6Mãgá panajida Canaán eujãdepema Luz pꞌuurude. Mãgɨ́ pꞌuuru ichiaba tꞌɨ̃jarapachida Betel. 7Mama Jacobpa altar ooji Tachi Akꞌõre–itꞌee mãikꞌaapa ma punto tꞌɨ̃ bɨji El Betel, mama Tachi Akꞌõre unuda perã jirabodokꞌãri chi ɨ̃pema waaweepa.

8Mama pꞌanɨde Raquel akꞌɨpari Débora jai–idaaji. Pakꞌuru ɨtꞌɨa bɨ ekꞌari ɨajida Betel pꞌuuru kꞌaitꞌa. Jacobpa ma pakꞌuru bɨmãi tꞌɨ̃ bɨji Elón Bacut+ .

9Jacob Padán Aram eujãdeepa chekꞌãri, Tachi Akꞌõrepa waya ichi unupiji mãikꞌaapa na pedee pia jaraji:

10—Pɨ tꞌɨ̃jarapatada aji, Jacob. Mamĩda waa mãga tꞌɨ̃jarada–e paitꞌee. Ɨ̃rawedadeepa pɨ tꞌɨ̃jarapataadaitꞌeeda aji, Israel.

Maapꞌeda Tachi Akꞌõrepa mãgaji:

11—Mɨta Jõmaarã Akꞌõre Waibɨada aji. Warra chokꞌara oopáde aji, pɨdeepa uchiadaitꞌeerã chokꞌara paraamerã. Pɨdeepa uchiadaitꞌee pꞌuuru chokꞌara, reyrã paara. 12Na eujã mɨa Abrahammaa mãikꞌaapa Isaacmaa teeda ichiaba tee bɨ pɨmaa mãikꞌaapa pɨdeepa uchiadaitꞌeerãmaa.

13Mãga jarapꞌeda, Tachi Akꞌõre wãji.

14Mãpai Jacobpa mãu choma mama bainɨ̃ bɨji mãikꞌaapa aceite vino ome weeji ma mãu ɨ̃rɨ awara bɨitꞌee Tachi Akꞌõre–itꞌee. Mãgá ooji kꞌirãpaitꞌee Tachi Akꞌõre ichi ome pedeedamãi. 15Jacobpa ma mãu badamãi tꞌɨ̃ bɨji Betel.

Raquel jai–idaada

16Tꞌẽepai Beteldeepa chewã nipajida. Ma ode chewãdade Efrata pꞌuuru kꞌaitꞌa Raquel biakꞌoo bada, warra tꞌoji. Mamĩda tꞌoitꞌee audú taarãji.

17Warra tꞌo wãkꞌãri, chi parterapa Raquelmaa mãgaji:

—Waaweenaapáde aji, ɨmɨkꞌĩra warra awaraa tꞌoda perã.

18Mamĩda Raquelpa choo–e paji. Juakꞌaya bakꞌãri, chi warra tꞌɨ̃ bɨji Benoní.+ Mamĩda tꞌẽepai Jacobpa tꞌɨ̃ bɨji Benjamín.+

19Mãgá Raquel jai–idaaji. Efrata otꞌa ɨajida. Ma Efrata pꞌuuru ɨ̃rá tꞌɨ̃jarapata Belén. 20Raquel ɨadapꞌedaamãi Jacobpa mãu bainɨ̃ bɨji chi wẽra ɨadamãi kꞌirãpadamerã. Ma mãu atꞌãri unupata irua bainɨ̃ bɨdamãi.

21Israel ichi ome nipapatapꞌedaarã ome waawí wãdapꞌeda, torre Éder kꞌaitꞌa pꞌaneejida. 22Mama pꞌanɨde chi warra naapema Rubén Jacob wẽra kꞌãipari Bilhá ome kꞌãiji. Jacobpa mãga kꞌawa atakꞌãri, kꞌĩraudachi.

Jacobdeepa uchiadapꞌedaarã

Jacobpa warrarã doce iru baji.

23Lea ome ooji chi naapema Rubén; maapꞌeda Simeón, Leví, Judá, Isacar mãikꞌaapa Zabulón.

24Raquel ome ooji José mãikꞌaapa Benjamín.

25Raquel esclava Bilhá ome ooji Dan mãikꞌaapa Neftalí.

26Lea esclava Zilpá ome ooji Gad mãikꞌaapa Aser.

Mãɨrã paji chi warrarã tꞌodapꞌedaa Padán Aram eujãde.

Isaac jai–idaada

27Mãgá wãjida Mamredee, chi akꞌõre Isaac badamaa. Mãgɨ́ pꞌuuru ichiaba tꞌɨ̃jarapachida Arbá maa–e pɨrã Hebrón. Mama pꞌanapachida Abraham, maapꞌeda Isaac. 28-29Mama pꞌanɨde Isaac chonaa bada perã, jai–idaaji. Isaac jai–idaakꞌãri, ciento ochenta años iru baji. Mama Esaupa Jacob ome ãchi akꞌõre Isaac ɨajida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index