Search form

Génesis 39

José Potifar wẽra ome

1Madián pidaarã José atadapꞌedaarãpa netotꞌaajida Egiptodepema Potifarmaa. Ma Potifar Faraón jɨ̃apataarã poro waibɨa paji. 2Mãgá netotꞌaajida mĩda, Tachi Akꞌõre José ome baji. Maperã ma Egipto pida tede pia bapachi. 3Potifarpa kꞌawaaji Tachi Akꞌõrepa José pia akꞌɨ bada mãikꞌaapa kꞌaripa bada. 4Mapa José ome tꞌãri o–ĩa beeji mãikꞌaapa ichi esclavoorã poro waibɨa bɨji. Ichi netꞌaa jõmaweda José jua ekꞌari bɨji akꞌɨ bamerã. 5Maadamãiipa Tachi Akꞌõrepa Potifar netꞌaa pia akꞌɨji; teedapema netꞌaa, pꞌuurudeepa taawapema netꞌaa paara. 6Ma awara José kꞌaurepa Potifar maarepida kꞌĩsia nɨ̃bakꞌaa paji; ichi nekꞌoitꞌee bɨdepai kꞌĩsiapachi. Kꞌãiwee bapachi.

José kꞌapꞌɨa ɨ̃daa, kꞌĩra wãree baji. Mapa jõmaarãpa iru tꞌo pꞌanajida.

7Taarã–e nɨde Potifar wẽrapa ichi taumaa paji. Ewari aba ichia Josemaa mãgaji:

—Mɨ ome kꞌãipáde aji.

8Mamĩda Josepa mãgaji:

—Mãga–eda aji. Mɨ chiparipa ichi netꞌaa jõmaweda atabëijida aji, mɨa akꞌɨ bamerã, mɨ nama bɨde irua kꞌĩsianaamerã. 9Pɨ aupai mɨ jua ekꞌari bɨ–e paji, pɨ ichi wẽra perã. ¿Sãgá mɨa kꞌachia ooyama aji, Potifar ãpɨte mãikꞌaapa Tachi Akꞌõre kꞌĩrapite?

10Mãga bapachi Potifar wẽra José ome. Mamĩda José pꞌekꞌau oo–e paji iru ome.

11Ewari aba José wãji teedaa mimia oode. Eperãarã wẽ–e pada perã, 12Potifar wẽrapa José pꞌarude jita ataji mãikꞌaapa mãgaji:

—¡Mɨ ome kꞌãipáde! aji.

Aramata José pꞌira uchiadachi. Mamĩda chi pꞌaru ma wẽra juade baibeeji.

13Potifar wẽrapa mãga unukꞌãri, 14ichi mimiapataarã tꞌɨ̃ji mãikꞌaapa mãgaji:

—Jã hebreo, mɨ ɨmɨkꞌĩrapa aneedapa, tachi oo iru bɨda aji. Kꞌãi kꞌinia baji mɨ ome. Mamĩda mɨ golpe biaji. 15Mãga ũrikꞌãri, aramata pꞌira uchiadachi mãikꞌaapa ichi pꞌaru nama atabaibeejida aji.

16Mãpai ma wẽrapa José pꞌaru ɨa bɨji chi ɨmɨkꞌĩra cheru misa. 17Potifar pachekꞌãri, aukꞌa nepɨrɨji:

—Jã esclavo hebreo pɨa aneeda mɨ cuartode tꞌĩujida aji, mɨ ome kꞌãiitꞌee. 18Mamĩda mɨ golpe biakꞌãri kꞌaripa chedamerã, ichi pꞌira uchiadachi mãikꞌaapa chi pꞌaru nama atabaibeejida aji. 19Pɨchi esclavopa mãga oojida aji.

Mãga ũrikꞌãri, Potifar kꞌĩraudachi José ome. 20Mãpai José atapipꞌeda, jaraji carcelde tꞌɨ nɨ̃bɨnadamerã, reypa preso pëiparimãi.

21José mãgá carcelde banaji mĩda, Tachi Akꞌõre iru ome baji. Mama bɨde Tachi Akꞌõrepa kꞌaripaji chi carceldepema poro waibɨapa José pia akꞌɨmerã. 22Maperã mãgɨpa apemaarã carcel pidaarã mãikꞌaapa mimia mama oopatapꞌedaa jõmaweda José jua ekꞌari bɨji. 23Mãga nɨde ma carceldepema poro waibɨapa maarepida kꞌĩsiakꞌaa paji Josepa ooda jõma pia uchiapachi perã, Tachi Akꞌõrepa kꞌaripapꞌeda.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index