Search form

Génesis 43

Benjamín Egiptodee ateedapꞌedaa

1Ma tꞌẽepai ãchi eujãde jarrajara audupɨara paraaji. 2Mapa ãchi trigo jõdaikꞌãri, Jacobpa jaraji waya wãdamerã trigo netode.

3Mamĩda Judapa mãgaji:

—Ma poro waibɨapa jĩpꞌa jarajida aji, tai ɨ̃pema tꞌẽepema ateedamerã. Maa–e pɨrã tai unu kꞌinia–e bɨda aji. 4Maperã pɨa tai ome pëiru pɨrã, wãdayada aji, trigo netode. 5Mamĩda pëi–e pɨrã, wãda–eda aji, ma eperãpa jarada perã: “Pãchi tꞌẽepema nama aneeda–e pɨrã, chenáatɨ.”

6Mãpai Israelpa mãgaji:

—¿Sãapꞌeda mɨmaa na ne–inaa kꞌachia oojidama? aji. ¿Sãapꞌeda jarajidama aji, parãpa awaraa ɨ̃pema iru pꞌanɨ?

7Pꞌanaujida:

—Ma eperãpa iidida chokꞌara iidijida ajida, tai ëreerã pari. Nãga iidiji: “¿Parã akꞌõre atꞌãri chokꞌai bɨkꞌã?” “¿Awaraa ɨ̃pema iru pꞌanɨkꞌã?” ¿Sãga pꞌanaukꞌajidama? ajida. Kꞌawada–e pajida ajida, irua jaraitꞌee tai ɨ̃pema ateedamerã.

8Mãpai Judapa chi akꞌõre Israelmaa mãgaji:

—Na jarradeepa chokꞌai uchiadaitꞌee, Benjamín pëipáde aji, idiweda wãdamerã. Mɨa iru akꞌɨ bapariitꞌee. Mãgá apida jarrapa piuda–e paitꞌee. 9Mɨa pɨmaa ãpɨtee anee–e pɨrã, ichita mɨ kꞌachiade bapariitꞌeeda aji, pɨ kꞌĩrapite. 10¡Audú taarãda–e pada paara, wãda omé wã pꞌanakꞌajidada! aji.

11Mãpai Israelpa mãgaji:

—¿Kꞌãata waa oodayama? aji. Nãga oodapáde aji. Parã costalde regalo atéetɨ ma eperã–itꞌee. Atéetɨ na eujãdepema ne–inaa pipɨara bɨ: bálsamo, mirra, miéle, kꞌera, netꞌa teedaitꞌee chi netoparimaa chupɨria kꞌawaamerã. 12Ichiaba ma pꞌaratꞌa waya tee pëida atéetɨ awaraa pꞌaratꞌa ome trigo waya netodaitꞌee. ¿Ma pꞌaratꞌa parã ome pariatua pëitꞌaajida–ekꞌã? 13Ɨ̃raweda pãchi ɨ̃pema atéetɨ mãikꞌaapa wã́tɨ waya ma eperã bɨmaa. 14Mɨa kꞌinia bɨ Tachi Akꞌõre Waibɨapa chupɨria kꞌawaapimerã ma trigo netoparimaa uchia pëimerã ãra omeeweda. Mamĩda irua mãga oo–e pɨrã mãikꞌaapa mɨ warra wẽe beeru pɨrã, wẽe beeitꞌeeda aji.

15Mãgá waya Egiptodee wãjida. Ateejida Benjamín, pꞌaratꞌa, netꞌaa Jacobpa tee pëida ome.

16Ara panadakꞌãri, Josepa unuji Benjamín ãra ome chewã mãikꞌaapa nãga jaraji ichi tedepema mimiapataarã poro waibɨamaa:

—Jã eperãarã ateepáde aji, mɨ temaa. Pꞌakꞌa peepꞌeda, joopíji, imatꞌɨpa ãra mɨ ome nekꞌodaitꞌee perã.

17Chi mimiapataarã poro waibɨapa ooji Josepa jaradakꞌa. Wãji chi ɨ̃pemaarã pꞌanadapꞌedaamaa ãra José temaa ateeitꞌee. 18Mamĩda ãrapa kꞌawadakꞌãri José temaa wãda, ãchobeedachida. Ãchi pitapai pedeejida:

—Seewata nãga oomaa bɨda, ajida. ¿Nama ateeru–ekꞌã ajida, ma pꞌaratꞌa kꞌaurepa? Tachi ome chõo chedayada ajida, mãikꞌaapa esclavoorã papidayada ajida, tachi ne–animalaarã ome.

19Tedepema puerta kꞌaitꞌa panadakꞌãri, jarajida ma tedepema mimiapataarã poro waibɨamaa:

20—Aai, eperãarã poro waibɨa, naaweda chedakꞌãri, wãara trigo netodeta chejidada ajida. 21Mamĩda ãpɨtee wãdakꞌãri mãikꞌaapa otꞌa kꞌãidaitꞌee pakꞌãri, tai costal ewajida mãikꞌaapa ma trigo netodapꞌedaa pꞌaratꞌa unujida costal chaachaa. Nama iru pꞌanɨ waya teedaitꞌee pɨ chiparimaa. 22Ma awara pꞌaratꞌa aneejida waya trigo netodaitꞌee. Kꞌawada–e pꞌanɨda ajida, tai uchiadai naaweda kꞌáipata ma naawedapema pꞌaratꞌa tai costalde tꞌɨ nɨ̃bɨda.

23Ma mimiapataarã poro waibɨapa pꞌanauji:

—Waaweenaadapáde aji. ¿Parã mãikꞌaapa parã akꞌõre Akꞌõre Waibɨ́apata ma pꞌaratꞌa parãmaa waya teeji–ekꞌã? Mɨa kꞌawa bɨda aji, parãpa ma naawedapema trigo pꞌaadapꞌedaa, mɨa ma pꞌaratꞌa jitada perã.

24Mãpai Simeón carceldeepa aneeji mãikꞌaapa ãra jõmaweda ateeji José temaa. Mama panadakꞌãri, teeji pania ãchi bɨɨrɨ sɨɨdamerã. Ma awara nekꞌopiji ãchi burroorãmaa. 25José pacheru misa, ãchia regalo aneedapꞌedaa ẽtꞌajida irumaa teedaitꞌee, kꞌawadapꞌedaa perã ma tede nekꞌodaitꞌee.

26Iru pachekꞌãri, mãgɨ́ teejida mãikꞌaapa iru kꞌĩrapite bedabaidachida tau bɨɨrɨ te jãde tꞌõbairutamaa.

27Mãpai Josepa iidiji:

—¿Sãga pꞌanɨma? aji. ¿Sãga bɨma parã akꞌõre, chi chonaa chɨ? ¿Atꞌãri chokꞌai bɨkꞌã? aji.

28Ɨ̃jaabai pꞌanadapꞌeda, pꞌanaujida:

—Tai akꞌõre pɨ mimiaparíkꞌapɨ bɨda ajida. Chokꞌai bɨda ajida, mãikꞌaapa kꞌapꞌɨa pia bɨ.

29Josepa ãchi jõmaweda akꞌɨji. Chi ɨ̃pema nawe eereepa Benjamín unu atakꞌãri, mãgaji:

—¿Nãgɨkꞌã aji, parã tꞌẽepema, mɨmaa nepɨrɨdapꞌedaa? Warra, ¡mɨa kꞌinia bɨda aji, Tachi Akꞌõrepa pɨ pia akꞌɨ bamerã!

30Mãga jarakꞌãri, tauba cheji mãikꞌaapa jẽe kꞌinia nɨ̃beeji. Mapa isapai tꞌĩuji ichi kꞌãipari cuartode mãikꞌaapa jẽedachi. 31Jẽe aupakꞌãri, ichi kꞌĩra sɨɨji mãikꞌaapa uchiaji ãchi pꞌanɨmaa. Mãpai chi mimiapataarãmaa mãgaji:

—Chikꞌo aneedapáde aji.

32José su–akꞌɨ beeji mesa abaade; Egipto pidaarã mesa awaraade. Jõdee Jacob warrarã mesa awaraade su–akꞌɨ pꞌaneejida, Egipto pidaarã leyde jara bada perã araa nekꞌodaikꞌaraa bɨ awaraa eujãdepemaarã ome. 33Josepa ichi ɨ̃pemaarã su–akꞌɨ beepiji naapemadeepa ãchi tꞌẽepemamaa. Mãga unudakꞌãri, pꞌera pɨkꞌa pꞌanajida mãikꞌaapa akꞌɨtrua para beeji. 34Ichi mesade chikꞌo bɨdapꞌedaadepema teepiji chi ɨ̃pemaarãmaa. Mamĩda audupɨara teepiji Benjaminmaa. Mãpai José chi ɨ̃pemaarã ome to para beeji mãikꞌaapa o–ĩa pꞌaneejida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index