Search form

Jueces 1

Judadeepa uchiadapꞌedaarãpa mãikꞌaapa Simeondeepa uchiadapꞌedaarãpa Adonisedec pꞌoyaadapꞌedaa

1Josué jai–idaada tꞌẽepai, israelitaarãpa ɨtꞌaa iidijida Tachi Akꞌõrepa kꞌawapimerã chisãgɨ́ ëreerãdepemaarã naa wãdaipia bɨ chõode cananeorã ome. 2Tachi Akꞌõrepa jaraji Judadeepa uchiadapꞌedaarã naa wãdamerã, irua ãchi kꞌaripaitꞌee perã mãɨrã eujã jãri atadaitꞌee. 3Mãpai Judadeepa uchiadapꞌedaarã soldaorãpa jara pëijida ãchi aukꞌaarã Simeondeepa uchiadapꞌedaarã soldaorãmaa ãchi kꞌaripa chedamerã, Simeondeepa uchiadapꞌedaarãpa ma eujãdepema ũkꞌuru atadaitꞌee pada perã ãchi–itꞌee. Simeondeepa uchiadapꞌedaarã soldaorãpa jarajida kꞌaripadaitꞌee. Mãgá araa pꞌaneejida Judadeepa uchiadapꞌedaarã ome. 4-5Mãgá Judadeepa uchiadapꞌedaarã soldaorãpa chõonajida cananeorã ome, ferezeorã ome. Tachi Akꞌõrepa pꞌoyaapiji Judadeepa uchiadapꞌedaarãmaa. Bezecde pꞌoyaajida diez mil cananeorã ãchi rey Adonisedec ome. 6Mãgɨ́ rey jirabodoji mĩda, ẽpꞌe atajida mãikꞌaapa jita atadapꞌeda, iru jua nawe, bɨɨrɨ nawe tꞌɨapꞌe atajida waa pꞌoyaa chõonaamerã. 7Mãga oodakꞌãri, Adonisedecpa mãgaji: “Naaweda mɨa reyrã setenta jua nawe, bɨɨrɨ nawe ome tꞌɨapꞌekꞌooji mãikꞌaapa mɨ mesa ekꞌari ɨa bɨpachi. Ɨ̃rá Tachi Akꞌõrepa aukꞌa oopiji mɨa ma kꞌachia ooda kꞌaurepa.” Maapꞌeda Adonisedec Jerusalendee ateejida. Mama piuji.

Judadeepa uchiadapꞌedaarãpa Hebrón pꞌuuru, Jerusalén pꞌuuru ome pꞌoyaadapꞌedaa

8Judadeepa uchiadapꞌedaarã soldaorãpa Jerusalén pꞌuuru pidaarã ome chõodakꞌãri, pꞌoyaajida. Espadapa ma pꞌuurudepemaarã jõmaweda peekꞌoojida mãikꞌaapa ma pꞌuuru paatꞌaajida. 9Ma tꞌẽepai cananeorã ee jẽra bɨde pꞌanapatapꞌedaarã, Néguev eujãde pꞌanapatapꞌedaarã mãikꞌaapa ee ɨtꞌɨara jẽra bɨde pꞌanapatapꞌedaarã pꞌoyaajida. 10Ichiaba pꞌoyaajida cananeorã Hebrón pꞌuurude pꞌanapatapꞌedaa. Chonaarãweda ma pꞌuuru tꞌɨ̃jarapachida Quiriat Arbá. Ichiaba pꞌoyaajida Sesay, Ajimán, Talmay pꞌuuru.

Otonielpa Debir pꞌuuru pꞌoyaada

11Ma tꞌẽepai Debir pꞌuuru pidaarã ome chõojida. Chonaarãweda ma pꞌuuru tꞌɨ̃jarapachida Quiriat Séfer. 12Ma pꞌuuru pidaarã chõodai naaweda, Calebpa jaraji chi Debir pꞌuuru pꞌoyaarumaa ichi kꞌau tꞌɨ̃jarapatapꞌedaa Acsa teeitꞌee aɨ ome miakꞌãimerã. 13Chõodakꞌãri, Caleb ɨ̃pema tꞌẽepema Cenaz warra Otonielpa ma pꞌuuru pꞌoyaaji. Mãpai Calebpa chi kꞌau Acsa Otonielmaa teeji. 14Acsa panakꞌãri, Otonielpa jaraji eujã iidinamerã chi akꞌõremaa. Ma tꞌẽepai Calebpa ichi kꞌau burrodeepa ɨrabairu unukꞌãri, irumaa iidiji:

—¿Kꞌãata kꞌinia bɨma? aji.

15Chi kꞌaupa pꞌanauji:

—Mɨ chupɨria kꞌawaapáde aji. Pɨa mɨmaa teeji eujã Néguev eujãde bɨ. Ichiaba kꞌinia bɨ pania poátrɨ uchia bɨmãi teemerã.

Mapa Calebpa teeji pania poátrɨ uchia bɨmãi Hebrón pꞌuuru wãteikꞌa eere, baareikꞌa eere paara.

Judadeepa uchiadapꞌedaarãpa mãikꞌaapa Benjamindeepa uchiadapꞌedaarãpa eujã pꞌoyaadapꞌedaa

16Moisés chãuredeepa uchiadapꞌedaarã quenita pidaarã apachida. Ma quenita pidaarã uchiajida pꞌuuru Palma–idaadeepa wãdaitꞌee ma Judadeepa uchiadapꞌedaarã ome. Eujã pania wẽe bɨde Judadeepa uchiadapꞌedaarã eujãde, Arad eujã sur eere pꞌaneejida ma eujãdepemaarã ome. 17Maapai Judadeepa uchiadapꞌedaarã soldaorã mãikꞌaapa Simeondeepa uchiadapꞌedaarã soldaorã cananeorã ome chõojida Sefat pꞌuurude. Mãgá ma pꞌuuru jõtꞌaajida mãikꞌaapa tꞌɨ̃ bɨjida Jormá.+ 18Ma pꞌuuru jõtꞌaajida mĩda, pꞌoyaada–e paji Gaza, Ascalón, Ecrón pꞌuuru eujã aɨ ikꞌaawa bee ome. 19Tachi Akꞌõrepa ma Judadeepa uchiadapꞌedaarã kꞌaripaji eedepema pꞌuuru jõmaweda pꞌoyaadamerã. Mamĩda pꞌoyaada–e paji eujã jewedaade pꞌuuru pꞌanapatapꞌedaarã, mãɨrãpa carreta hierrodee ooda iru pꞌanadapꞌedaa perã. 20Calebpa Hebrón pꞌuuru ataji Moisepa jaradakꞌa. Maapꞌeda ma eujãdeepa gigante Anac warrarã õpee jërekꞌooji. 21Mamĩda Benjamindeepa uchiadapꞌedaarã soldaorãpa jebuseorã Jerusalén pꞌuurude pꞌaneedapꞌedaarã pꞌoyaa jërekꞌooda–e paji. Maperã jebuseorã atꞌãri pꞌanapata Jerusalende Benjamindeepa uchiadapꞌedaarã ome.

Josedeepa uchiadapꞌedaarãpa Betel pꞌuuru pꞌoyaadapꞌedaa

22-23Josedeepa uchiadapꞌedaarãpa kꞌĩsiajida Betel pꞌuuru pidaarã ome chõonadaitꞌee. Chonaarãweda ma pꞌuuru tꞌɨ̃jarapachida Luz. Eperãarã pëidakꞌãri ma pꞌuuru akꞌɨdamerã, Tachi Akꞌõrepa nãga kꞌaripaji. 24Ma pëidapꞌedaarãpa unujida eperã ma pꞌuurudeepa uchiaru. Mãgɨmaa mãgajida: “Pɨa jarateeru pɨrã sãgá na pꞌuurude tꞌĩudai, pɨmaa ne–inaa pia oodaitꞌeeda” ajida. 25Ma eperãpa ãchimaa jarateepꞌeda, ma pꞌuuru pidaarã jõmaweda peekꞌoojida espadapa. Mamĩda ma jaratee bada ichideerã ome peeda–e paji. 26Maapꞌeda ma eperã wãji hititaarã eujãdee. Mama pꞌuuru chiwidi ooji. Ma pꞌuuru tꞌɨ̃ bɨji Luz. Atꞌãri mãga tꞌɨ̃jarapata.

Manasedeepa uchiadapꞌedaarãpa mãikꞌaapa Efraindeepa uchiadapꞌedaarã pꞌuuru pꞌoyaada–e pada

27Manasedeepa uchiadapꞌedaarã soldaorãpa nãgɨ́ pꞌuuru pꞌoyaada–e paji: Betseán, Tanac, Dor, Ibleam, Meguido. Ichiaba mãgɨ́ pꞌuuru ikꞌaawa pꞌanapatapꞌedaarã pꞌoyaada–e paji. Maperã cananeorã ma pꞌuurude pꞌaneejida. 28israelitaarã juataura padaidakꞌãri, ma cananeorã mimiapipachida ãchi jua ekꞌari. Mamĩda ma eujãdeepa pꞌoyaa jërekꞌooda–e paji.

29Efraindeepa uchiadapꞌedaarã soldaorãpa ichiaba cananeorã pꞌoyaa jërekꞌooda–e paji Guézer pꞌuurudeepa. Maperã ma cananeorã ma eujãde pꞌaneejida.

Awaraa ëreerãdepemaarãpa pꞌuuru pꞌoyaada–e pada

30Zabulondeepa uchiadapꞌedaarã soldaorãpa ichiaba cananeorã pꞌoyaa jërekꞌooda–e paji Quitrón pꞌuurudeepa, Nalol pꞌuurudeepa. Maperã ma cananeorã ma eujãde pꞌaneejida. Mamĩda mimiapachida israelitaarã jua ekꞌari.

31-32Aserdeepa uchiadapꞌedaarã soldaorãpa ichiaba cananeorã nãgɨ́ pꞌuurudeepa pꞌoyaa jërekꞌooda–e paji: Aco, Sidón, Ajlab, Aczib, Jelba, Afec, Rejob. Maperã mãɨrã ichiaba mama pꞌaneejida.

33Neftalideepa uchiadapꞌedaarã soldaorãpa ichiaba cananeorã pꞌoyaa jërekꞌooda–e paji Bet Semes pꞌuurudeepa, Bet Anat pꞌuurudeepa. Mapa mãɨrã pꞌaneejida ma pꞌuurude israelitaarã jua ekꞌari.

34Dandeepa uchiadapꞌedaarã soldaorã wãdakꞌãri chõode amorreorã ome, mãɨrãpa Dandeepa uchiadapꞌedaarã jërekꞌoojida ee jẽra bɨmaa. Mapa ãchia ma eujãdepema eujã jewedaa pꞌoyaada–e paji. 35Mãgá ma amorreorã pꞌaneejida Heres pꞌuurude, Ayalón pꞌuurude, Salbín pꞌuurude. Mamĩda Josedeepa uchiadapꞌedaarã juataura padaidakꞌãri, ma amorreorã bɨjida ãchi jua ekꞌari mimiadamerã.

36Maapai amorreorã eujã i sur eere Acrabín eedeepa Selá waawí wãyaa baji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index