Search form

Jueces 11

Jefté israelitaarã poro waibɨa pada

1Jefté chõo kꞌawaa bapachi. Iru Galaad eujãdepema paji. Chi nawe prostituta paji. Jõdee chi akꞌõre tꞌɨ̃jarapachida Galaad. 2Ma eperãpa ichi wẽra ome awaraa warrarã iru baji. Ma warrarã tawara pꞌaneedakꞌãri, Jefté ãchi tedeepa jëretꞌaajida. Kꞌiniada–e paji irua chi akꞌõre netꞌaa jɨ̃amerã awaraa wẽradeepa uchiada perã. 3Mãgá Jefté jirabodoji ichi ɨ̃pemaarã waidoopa. Banaji Tob eujãde. Mama bɨde chõoyaa beerã ome nipa beeji.

4Taarã pakꞌãri, Amón pidaarãpa israelitaarã ome chõo chejida. 5Maperã Galaad eujãdepema poro waibɨarãpa jara pëijida Jefté Tob eujãdeepa chemerã ãchi kꞌaripade. 6Ma pëidapꞌedaarã panadakꞌãri, Jeftemaa mãgajida:

—Chepáde ajida, tai kꞌaripade. Kꞌinia pꞌanɨda aji, pɨ tai soldaorã poro waibɨa pamerã Amón pidaarã ome chõodaitꞌee perã.

7Mamĩda Jeftepa pꞌanauji:

—¿Parãpa mɨ akꞌõre tedeepa jëretꞌaada–e pajikꞌã? aji. ¿Parãpa mɨ kꞌĩra unuamaa iru pꞌanɨ–ekꞌã? ¿Ɨ̃rá parã nepɨrade pꞌanadairã, mɨ ata chejida–ekꞌã? aji.

8Ma Galaaddepemaarãpa pꞌanaujida:

—Wãarapɨ. Tai nepɨrade pꞌanadairã pɨ ata chejidada ajida. Kꞌinia pꞌanɨ pɨ chemerã tai kꞌaripade. Amón pidaarã ome jura chõodaitꞌee. Pɨ Galaad eujãdepemaarã poro waibɨa papi kꞌinia pꞌanɨda ajida.

9Mãpai Jeftepa mãgaji:

—Wãara kꞌinia pꞌanɨ pɨrã mɨ Amón pidaarã ome chõode wãmerã, mãgara mɨ wãi. Tachi Akꞌõrepa mãɨrã mɨmaa pꞌoyaapiru pɨrã, mɨ parã poro waibɨa paitꞌeeda aji.

10Ma israelitaarã poroorãpa pꞌanaujida:

—Mãga oodaitꞌeepɨ Tachi Akꞌõre kꞌĩrapite jaradapꞌedaa perã.

11Mãpai Jefté wãji ãchi ome. Ãchi pꞌuurudepemaarãpa iru ãchi poro waibɨa papijida. Mizpade pakꞌãri, Jeftepa Tachi Akꞌõre kꞌĩrapite waya jaraji ichia naaweda jaradakꞌa. 12Maapꞌeda nãga jara pëiji Amón pidaarã reymaa: “¿Sãapꞌeda pɨ chõo che kꞌinia bɨma aji, mɨchi aukꞌaarã ome? 13Reypa ma pëidaarãmaa pꞌanauji: “Parã israelitaarã Egipto eujãdeepa uchiadakꞌãri, tai eujã jãri ata wãjida Arnón todeepa Jaboc to parumaa, Jordán to parumaa. Ɨ̃rá waya téetɨ mɨmaa. Mãgara chõoda–ee pꞌanapataadaitꞌee.”

14Mãga ũrikꞌãri, Jeftepa awaraa pedee jara pëiji Amón pidaarã reymaa. 15Mãgaji: “Jeftepa nãga jara pëiji: ‘Tai israelitaarãpa parã Amón eujã jãri atada–e paji. Moabitaarã eujã jida jãri atada–e paji. 16Tai Egipto eujãdeepa uchiadakꞌãri, pania wẽe bɨ eujãde wãyaajida pꞌusa Mar Rojo parutamaa. Mamãikꞌaapa Cades eujãde panajida. 17Mama pꞌanɨde jara pëijida Edom eujãdepema reymaa, irua tai wãyaapimerã ãchi eujãde. Mamĩda irua mãga oo–e paji. Aukꞌa jara pëijida Moab eujãdepema reymaa. Mamĩda irua aukꞌa mãga oo–e paji. Maperã Cades eujãde pꞌaneejida. 18Ma tꞌẽepai pania wẽe bɨ eujãde waya wãyaajida mãɨrã eujã wãyaada–e paitꞌee. Mãgá panajida Moab eujã oriente eere. Mama pꞌaneejida, Arnón to kꞌĩraikꞌa eere. Ma to sĩada–e paji, moabitaarã eujãde tꞌĩu kꞌiniada–e pada perã. 19Mama pꞌanɨde jara pëijida amorreorã Hesbón pꞌuurudepema rey Sijonmaa irua tai ãchi eujãde wãyaapimerã. 20Mamĩda Sijonpa mãga oo–e paji mãikꞌaapa ichi soldaorã ome uchiaji tai ome chõode Yahaza puntode. 21israelitaarã Akꞌõre Waibɨapa amorreorã rey Sijón ichi soldaorã ome taimaa pꞌoyaapiji. Mãgá amorreo eujã jãri atajida. 22Mãɨrã eujã jãri ata wãjida Arnón todeepa Jaboc to parumaa mãikꞌaapa pania wẽe bɨ eujãdeepa Jordán to parumaa. 23Ma amorreo eujã Tachi Akꞌõrepa jãri atapiji taimaa teeitꞌee. ¿Ɨ̃rapɨ pɨa tai na eujãdeepa jërekꞌoo kꞌinia bɨkꞌã? 24¿Pɨ akꞌõre waibɨa apata Quemopa parãmaa eujã pꞌoyaapida paara, parãde pakꞌaji–ekꞌã? Mãga pɨkꞌa taipa ijãapata na eujã taide, tai Akꞌõre Waibɨapa taimaa teeda perã. 25¿Pɨ waibɨara kꞌĩsia bɨkꞌã Zipor warra Balac kꞌãyaara? Ma Moabdepema rey tai ome chõo che–e paji ãchi eujã kꞌapꞌɨa pari. 26Tai israelitaarã trescientos año ma eujãde pꞌanapachida. Hesbonde, Aroerde aɨ ikꞌaawa eujã beede paara, Arnón to ide pꞌuuru pꞌanɨde pꞌanapachida. ¿Sãapꞌeda parãpa ma eujã aɨ naaweda iidi cheda–e paji? 27Mɨ pɨ ome nepɨra wẽe bɨ. Pɨata nepɨra jɨrɨmaa bɨ tai israelitaarã ome chõo cheda perã. Mamĩda Tachi Akꞌõrepa parã Amón pidaarãpa oopata akꞌɨmaa bɨ; tai israelitaarãpa oopata paara. Iruata jarai chisãgɨɨrãpa ne–inaa kꞌachia oomaa pꞌanɨ.”

28Jeftepa mãga jara pëiji mĩda, Amón pidaarã reypa ũri kꞌinia–e paji.

Jeftepa Tachi Akꞌõremaa jarada

29Mãpai Tachi Akꞌõrepa ichi Jaure Jeftemaa pëiji. Mãga nɨde Jefté Manasedeepa uchiadapꞌedaarã eujãde mãikꞌaapa Mizpa pꞌuuru Galaad eujãde badade wãyaaji Amón pidaarã eujãde chõonaitꞌee.

30Ma wãdade Jeftepa nãga jaraji Tachi Akꞌõremaa: “Pɨa mɨmaa Amón pidaarã pꞌoyaapiru pɨrã, 31mɨ temaa chekꞌãri, chi naa tedeepa uchiaruta mɨa peepꞌeda, pɨ–itꞌee paa jõitꞌeeda” aji.

32Maapꞌeda Jefté ichi ome nipapatapꞌedaarã ome Amón pidaarã ome chõodapꞌeda, pꞌoyaajida. 33Ma israelitaarã kꞌĩra unuamaa iru pꞌanapatapꞌedaarã chokꞌara peejida. Ma awara pꞌuuru veinte jãri atajida; Aroer pꞌuurudeepa Minit pꞌuurumaa mãikꞌaapa Abel Queraminmaa. Mãgá israelitaarãpa Amón pidaarã pꞌoyaajida.

34Tꞌẽepai Jefté Mizpadee chekꞌãri ichi temaa, chi kꞌau abapai iru bada tedeepa uchiaji pëira mãikꞌaapa pandero chaamaa o–ĩapa. Jeftepa warra awaraa wẽe baji. 35Mãgá chi kꞌauta uchiaru unukꞌãri, Jeftepa tꞌãri pꞌuapa chi pꞌaru jẽtꞌaaji mãikꞌaapa mãgaji:

—Aai, kꞌau, mɨ tꞌãri pꞌua papiruda aji, mɨa Tachi Akꞌõremaa jaradakꞌa ooitꞌee perã.

36Chi kꞌaupa pꞌanauji:

—Akꞌõre, pɨa Tachi Akꞌõre Waibɨamaa jaradakꞌa oopáde aji. Iruata tachi kꞌĩra unuamaa iru pꞌanapatapꞌedaarã, ma Amón pidaarã pɨmaa pꞌoyaapiji. 37Mamĩda pɨa jaradakꞌa ooi naaweda, mɨ chupɨria kꞌawáaji pꞌɨrrɨa kꞌinia bairã mɨchi kꞌõpꞌãyoorã ome mãikꞌaapa jẽe kꞌinia bairã piuitꞌee perã, miakꞌãi–ee.

38Jeftepa mãga ooji. Atane omé wãyaarude chi kꞌau chi kꞌõpꞌãyoorã ome jẽe nipapachida iru piuitꞌee pada perã miakꞌãi–ee. 39Maapꞌeda wãji chi akꞌõremaa irua oomerã Tachi Akꞌõremaa jaradakꞌa. Mãgá Jefté kꞌau piuji ɨmɨkꞌĩra ome kꞌãi–ee. 40Jeftepa mãga ooda perã, atꞌãri israelitaarã tꞌãide año chaa awẽraarã chipꞌedaipata jẽedaitꞌee Jefté kꞌau pari, kꞌãima kꞌĩmari wãyaaru misa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index