Search form

Jueces 13

Sansón tꞌoda

1Ma tꞌẽepai israelitaarãpa waya Tachi Akꞌõre kꞌĩrapite ne–inaa kꞌachia oo pꞌaneejida. Maperã cuarenta año wãyaarude Tachi Akꞌõrepa ãchi baaipiji filisteorã juade.

2Maapai Dandeepa uchiadapꞌedaarã eujãdepema tꞌɨ̃jarapatapꞌedaa Manoa bapachi Zora pꞌuurude. Chi wẽrapa warra tꞌokꞌaa paji. 3Mamĩda ewari aba ma wẽra kꞌĩrapite ángel bainɨ̃ ba cheji mãikꞌaapa mãgaji: “Pɨ warra tꞌokꞌaa mĩda, ɨ̃rá biakꞌoo beeitꞌee mãikꞌaapa ɨmɨkꞌĩra warra tꞌoitꞌeeda aji. 4Mamĩda pɨ biakꞌoo bɨde vino wa ne–inaa achuchua awaraa toikꞌaraa bɨ. Ma awara kꞌoikꞌaraa bɨ Tachi Akꞌõrepa chikꞌo kꞌoidaikꞌaraa bɨda adadepema. 5Pɨ warra tꞌodakꞌãriipa, chi puda tꞌɨɨikꞌaraa bɨ, iru Tachi Akꞌõre–itꞌee awara beeitꞌee perã. Iru tꞌoi naaweda, nazareo pida paitꞌee. Iruata israelitaarã kꞌaripaitꞌeeda aji, filisteorã jua ekꞌariipa.”

6Ma ángel wãda tꞌẽe, ma wẽrapa chi ɨmɨkꞌĩramaa nepɨrɨnaji. Mãgaji: “Tachi Akꞌõrepa pëida mɨmaa chejida aji. Mɨa pꞌera pɨkꞌa akꞌɨji Tachi Akꞌõre ángel jĩakꞌaapa. Mamĩda mɨa iidi–e paji iru kꞌaita pada. Ichiaba mɨmaa jara–e paji. 7Mamĩda mɨmaa jaraji warra tꞌoitꞌee. Ichiaba jaraji naaikꞌaapa waa mɨa vino wa ne–inaa achuchua awaraa toikꞌaraa bɨ. Ichiaba jaraji mɨ nekꞌonaamerã Tachi Akꞌõrepa chikꞌo kꞌodaikꞌaraa bɨda adadepema, na warra iru piurumaa nazareokꞌa Tachi Akꞌõre–itꞌee awara baitꞌee perã.”

8Manoapa mãga ũrikꞌãri, Tachi Akꞌõremaa ɨtꞌaa iidiji. “Tachi Waibɨa, mɨa chupɨria iidi bɨ pɨa ma eperã taimaa waya pëimerã. Mãgá pia kꞌawadayada aji, sãgá ma warra akꞌɨdaipia bɨ iru tꞌodakꞌãriipa.”

9Tachi Akꞌõrepa ooji Manoapa iididakꞌa. Iru ángel waya pëiji ma wẽramaa, ne–uu kꞌãide nide, chi ɨmɨkꞌĩra wẽe. 10Ma ángel unukꞌãri, ma wẽra pꞌira wãji chi ɨmɨkꞌĩramaa mãikꞌaapa mãgaji:

—¡Chepáde! aji. ¡Ma eperã mɨa unuda waya chejida! aji.

11Manoa wãji chi wẽra ome ma ángel badamaa. Mãpai mãgaji:

—¿Pɨkꞌã aji, mɨ wẽra ome pedeeda?

Ma eperãpa pꞌanauji:

—Mɨ pajida aji.

12Mãpai Manoapa mãgaji:

—Pɨa jaradakꞌa pꞌasakꞌãri, ¿sãga ma warra waridaipia bɨma? aji.

13Ma angelpa pꞌanauji:

—Pɨ wẽrapa ooipia bɨ jõma mɨa irumaa jaradakꞌa. 14Vino toikꞌaraa bɨ mãikꞌaapa ne–inaa awaraa uvadee ooda kꞌoikꞌaraa bɨ. Ne–inaa achuchua awaraa toikꞌaraa bɨ. Kꞌoikꞌaraa bɨ ne–animalaarã Tachi Akꞌõrepa kꞌodaikꞌaraa bɨda adadepema. Jĩpꞌa mɨa jaradakꞌa ooipia bɨ.

15Mãpai Manoapa ma angelmaa mãgaji:

—Tai chupɨria kꞌawaapáde aji. Beepáde aji, taipa cabra chakꞌe chuu pꞌanɨ misa pɨa kꞌomerã.

16Mamĩda ma angelpa pꞌanauji:

—Beeru mĩda mɨa parã chikꞌo kꞌo–e paitꞌee. Ma cabra peedapꞌeda, Jõmaarã Akꞌõre Waibɨa–itꞌee paa jõpidaipia bɨ. (Manoapa kꞌawa–e paji Tachi Akꞌõre ángel ome pedee bada.)

17Mãpai Manoapa mãgaji:

—Pɨchi tꞌɨ̃ jarapáde aji, gracias jara kꞌinia pꞌanadairã pɨa jaradakꞌa pꞌasakꞌãri.

18Mamĩda ma angelpa pꞌanauji:

—¿Sãapꞌeda mɨ tꞌɨ̃ kꞌawa kꞌinia pꞌanɨma? aji. Eperã apidaapa mɨ tꞌɨ̃ kꞌawada–e audú pi–ia bairã.

19Pedeeda tꞌẽepai Manoapa chivo kꞌaipee peeji paa jõitꞌee mãu ɨ̃rɨ netꞌa tau primiciakꞌa teeda ome. Mãpai Tachi Akꞌõrepa ne–inaa pi–ia ooji Manoa chi wẽra ome kꞌĩrapite. 20Ma tꞌɨpɨtau pia urua beekꞌãri, Tachi Akꞌõre ángel ɨtꞌaa wãji tꞌɨpɨtaudeepa ãra taide. Mãpai bedabaidachida tau bɨɨrɨ eujãde tꞌõbairutamaa. 21Mãga bɨde Manoapa kꞌawaji mama nipada Tachi Akꞌõre ángel paji. Ma ángel ãchimaa waa che–e paji. 22Mãpai Manoapa chi wẽramaa mãgaji:

—Tachi piudaitꞌee Tachi Akꞌõre unudapꞌedaa perã.

23Mamĩda chi wẽrapa mãgaji:

—Tachi Akꞌõrepa tachi pee kꞌinia bada paara, tachia ne–animalaarã iru–itꞌee paa jõpidapꞌedaa pia akꞌɨ–e pakꞌaji. Ichiaba tachimaa na ne–inaa etꞌewa unudapꞌedaa unupi–e pakꞌaji. Ma awara maarepida jara–e pakꞌaji warra oodaitꞌee.

24Ma tꞌẽepai ma angelpa jaradakꞌa Manoa wẽra biakꞌoo beepꞌeda, ɨmɨkꞌĩra warra tꞌoji. Tꞌɨ̃ bɨjida Sansón. Ma warra wari wãji mãikꞌaapa Tachi Akꞌõrepa iru pia akꞌɨ bapachi. 25Tꞌẽepai Sansón Dandeepa uchiadapꞌedaarã eujãde bɨde Zora, Estaol pꞌuuru esajĩakꞌa, Tachi Akꞌõrepa ichi Jaure irumaa pëiji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index