Search form

Jueces 15

1Ma tꞌẽepai taarã pakꞌãri, trigo tau ewapata pakꞌãri, Sansón waya ichi wẽra akꞌɨde wãji. Chivo chakꞌe ateeji chi wẽramaa teeitꞌee. Mama pakꞌãri, chi chãure padamaa mãgaji:

—Mɨ wẽra cuartode tꞌĩuitꞌeeda aji, iru akꞌɨde.

Mamĩda chi chãurepa wãakꞌaji. 2Mãgaji:

—Pɨchi wẽra kꞌinia–e bɨ jĩakꞌaapa mɨa pɨ kꞌõpꞌãyo abaamaa teejida aji. Chi tꞌẽepema kꞌĩra wãreera bɨ iru kꞌãyaara. Mata pɨchi–itꞌee atapáde aji.

3Mamĩda Sansonpa pꞌanauji:

—Mãga–eda aji. ¡Ɨ̃rapɨ mɨ kꞌĩra jõ–e paitꞌee filisteorã ome!

4Mãpai wãji mãikꞌaapa trescientos usapꞌãarã jita atapꞌeda, ãchi tru omee–omee jɨ̃ wãji mãikꞌaapa ma jɨ̃da chaachaa ĩpirã jɨ̃kꞌooji. 5Maapꞌeda tꞌɨpɨtaupa kꞌoopꞌeda, ma usapꞌãarã kꞌena pëiji filisteorã ne–uu kꞌãide wãyaadamerã. Mãgá ãchi trigo pꞌe iru pꞌanadapꞌedaa, chi atꞌãri ewada–e pꞌanadapꞌedaa paara, paa jõdachi. Ichiaba uva kꞌãi, olivo kꞌãi paara jõdachida. 6Filisteorãpa kꞌawa atadakꞌãri Sansónpata mãga ooji Timnat pꞌuurude bada chãurepa chi wẽra awaraamaa teeda perã, wãjida Timnat pꞌuurudee mãikꞌaapa Sansón wẽra pada chi akꞌõre ome paa peetꞌaajida. 7Sansonpa mãga kꞌawakꞌãri, mãgaji:

—Parãpa mãga oodapꞌedaa perã mɨ ome chõo jɨrɨmaa pꞌanɨ. Mɨ kꞌĩra jõ–ee beeitꞌeeda aji, parã filisteorã ome.

8Audú kꞌĩrau bada perã, Sansonpa ãchi ɨ̃rɨ wãpꞌeda, chokꞌara peekꞌooji. Ma tꞌẽepai mãu tede banaji Etam mãu–idaa bɨmãi.

9Mãga nɨde filisteorã Judadeepa uchiadapꞌedaarã eujãdee chejida Sansón jɨrɨdaitꞌee. Ãchi kꞌãipata oo wãjida Lehí punto parumaa. 10Mãga unudakꞌãri, Judadeepa uchiadapꞌedaarãpa ãramaa iidijida:

—¿Sãapꞌeda tai ome parã chõo jɨrɨ chejidama? ajida.

Pꞌanaujida:

—Sansonta ata chejidada ajida, irua tai ne–uu jõpida perã.

11Mãga ũridakꞌãri, Judadeepa uchiadapꞌedaarã õpee mil wãjida ma mãu tedee Etam mãu–idaa bɨmaa. Mama panadakꞌãri, Sansonmaa mãgajida:

—¿Pɨa kꞌawa–e bɨkꞌã ajida, filisteorã tai kꞌãyaara juataura pꞌanɨ? ¿Sãapꞌeda ãra kꞌĩraupijima ajida, tachi israelitaarã ome?

Sansonpa pꞌanauji:

—Mɨa aukꞌa oojida aji, ãrapa mɨmaa ne–inaa kꞌachia oodapꞌedaakꞌa.

12Mãpai ma Judadepemaarãpa mãgajida:

—Tai chejidada ajida, pɨ atade teedaitꞌee ma filisteorãmaa.

Sansonpa pꞌanauji:

—Tachi Akꞌõre kꞌĩrapite juraadapáde aji, parãpa mɨ peeda–e paitꞌee.

13Mãgajida:

—Pɨ peeda–e paitꞌeeda ajida. Aba ata chejida teedaitꞌee filisteorãmaa.

Mãpai pia jɨ̃ nɨ̃bɨdapꞌeda cuerda chiwidi omeepa, ateejida iru miru badamãiipa.

14Lehí puntode panadakꞌãri, filisteorã o–ĩapa biukꞌa para beeji, Sansón peetꞌaadai jĩakꞌaapa. Mamĩda Tachi Akꞌõrepa ichi Jaure Sansonmaa waya pëiji. Juataura papiji. Mapa jɨ̃kꞌara tꞌɨɨkꞌooji lino kꞌãu paakꞌãri, tꞌɨɨdaiparikꞌa. 15Burro kꞌidatꞌu idatꞌu mama bada atapꞌeda, mãgɨpa filisteorã mil peekꞌooji. 16Mãpai mãgaji:

“Burro kꞌidatꞌupa piuda kꞌapꞌɨa pꞌeda omeede pꞌeji. Burro kꞌidatꞌupa ɨmɨkꞌĩraarã mil peeji.”

17Mãpai ma burro kꞌidatꞌu batꞌatꞌaaji. Mapa ma peedamãi tꞌɨ̃ bɨjida Ramat Lehí, jara kꞌinia bɨ ‘burro kꞌidatꞌu ee.’ 18Ma chõoda tꞌẽepai Sansón audú opisia nɨ̃beeji. Mapa ɨtꞌaa iidiji: “¿Sãgá pɨ juapa ma ijãadakꞌaa beerã pꞌoyaapꞌeda, ɨ̃rá mɨ opisiapa piuyama aji mãikꞌaapa baaiyama aji, mãɨrã pꞌaneedapꞌedaarã juade?”

19Mãpai Tachi Akꞌõrepa uria ewaji ma Lehí puntode mãikꞌaapa madeepa pania weeji. Ma pania topꞌeda, Sansón waya juataura beeji. Ma pania uchiadamãi tꞌɨ̃ bɨjida Enacoré, jara kꞌinia bɨ ‘chupɨria iidida pania poátrɨ uchia bɨmãi.’ Ma pania poátrɨ uchiada atꞌãri mama bɨ.

20Veinte año wãyaarude Sansón israelitaarã poro waibɨa paji. Maapai israelitaarã filisteorã jua ekꞌari pꞌanapachida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index