Search form

Jueces 17

Micaiapa ne–inaa kꞌĩrakꞌa bɨ ichi tede iru bada

1Efraindeepa uchiadapꞌedaarã eujãde ee jẽra bɨde eperã tꞌɨ̃jarapatapꞌedaa Micaías bapachi. 2-3Ewari aba chi nawemaa mãgaji:

—Nechɨ–idaa bɨpa pɨ pꞌaratꞌa tau cien chɨa ata chekꞌãri, pɨa jaraji ma eperã kꞌachiade baaimerã. Mɨata ma pꞌaratꞌa chɨa ataji. Mamĩda ɨ̃rá pɨmaa waya teeitꞌee ũri bada perã pɨa jarakꞌãri ma pꞌaratꞌa Tachi Akꞌõre–itꞌee awara bɨ baji. Mãgɨpa ne–inaa pakꞌurudee oopipꞌeda, pꞌẽepiitꞌee pajida aji, aɨ kꞌĩrapite ɨtꞌaa tꞌɨ̃daitꞌee.

Mãga jarapꞌeda, ma pꞌaratꞌa chi nawemaa teeji.

Mãpai chi nawepa mãgaji:

—Warra, pɨa mãga ookꞌãri, ne–inaa pia ooji. Maperã Tachi Akꞌõrepa pɨ pia ooipia bɨ.

4Maapꞌeda chi nawepa ma pꞌaratꞌa tau doscientos teeji ne–inaa pꞌaratꞌadee oo kꞌawaa beemaa mãgɨpa ne–inaa kꞌĩrakꞌa bɨ oomerã mãikꞌaapa ma pꞌaratꞌapa pꞌẽemerã. Tꞌẽepai ma ne–inaa chi warra Micaías tede bɨji.

5Aɨ naaweda Micaiapa ɨtꞌaa tꞌɨ̃patamãi ichi tede oo iru baji ichi te pidaarã mama ɨtꞌaa tꞌɨ̃pataadamerã. Mama iru baji efod apata mãikꞌaapa ne–inaa kꞌĩrakꞌa bɨ ichi chonaarãpa iru pꞌanadapꞌedaa. Ma awara ichi warra aba awara bɨji ãchi pꞌaarekꞌa. 6Maapai Israel eujãde rey atꞌãri wẽ–e paji. Eperãarãpa ãchia oo kꞌiniata oopachida.

7Ma Micaías bapariikꞌãri, Judadeepa uchiadapꞌedaarã eujãde Belén pꞌuurude Levideepa uchiada kꞌũtrãa aba bapachi. 8Ma kꞌũtrãa uchiaji Belén pꞌuurudeepa awara ãyaa banaitꞌee. Mãgá wãde Efraindeepa uchiadapꞌedaarã eujãde wãyaaji ee jẽra bɨmãi. Mãgá ewari aba Micaías temaa panaji.

9Micaiapa iidiji:

—¿Pɨ sãmãikꞌaapa cheruma? aji.

Ma kꞌũtrãapa pꞌanauji:

—Belén pꞌuurudeepa chejida aji. Mɨ Levideepa uchiada. Jɨrɨmaa bɨ sãma bapariitꞌee.

10Mãpai Micaiapa mãgaji:

—Nama mɨ ome beepáde aji, pɨ mɨchideerã pꞌaare pamerã mãikꞌaapa mɨchideerãkꞌa pamerã. Año chaa mɨa pɨmaa pꞌaratꞌa tau diez pꞌaaitꞌeeda aji, pꞌaru, chikꞌo awara.

11Ma Levideepa uchiadapa mãga ũrikꞌãri, ijãaji. Micaías tede beeji iru warrakꞌa. 12Micaiapa ma kꞌũtrãa ichi te pidaarã pꞌaare bɨji. Mama bapachi ãra ome. 13Micaías o–ĩa baji ma Levideepa uchiada ichi tede pꞌaare pada perã. Kꞌĩsiaji ma kꞌaurepa Tachi Akꞌõrepa ichi pia akꞌɨ bapariitꞌee.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index