Search form

Jueces 18

Micaías Dandeepa uchiadapꞌedaarã ome

1Maapai Israel eujãde rey wẽ–e paji. Ichiaba Dandeepa uchiadapꞌedaarãmaa eujã waide teeda–e pꞌanajida. Maperã eujã jɨrɨ nipapachida aɨde pꞌanapataadaitꞌee. 2Ãchi poro waibɨarãpa chõo kꞌawaa beerã joisomaa pëijida Zora pꞌuurudeepa mãikꞌaapa Estaol pꞌuurudeepa aɨ ikꞌaawa bee eujã akꞌɨdamerã. Mãga oo pꞌanɨde Efraindeepa uchiadapꞌedaarã eujãdepema ee jẽra bɨde wãyaajida. Mãgá panajida Micaías temaa mãikꞌaapa mama kꞌãi pꞌaneejida. 3Micaías te kꞌaitꞌa pachedakꞌãri mãikꞌaapa ma kꞌũtrãa unudakꞌãri, iru pedeedeepa kꞌawa atajida iru Levideepa uchiada. Irumaa iidijida:

—¿Kꞌaipa pɨ nama aneejima? ajida. ¿Sãapꞌeda pɨ nama bɨma? ajida. ¿Kꞌãata pɨ nama oomaa bɨma? ajida.

4Mãpai ma Levideepa uchiadapa nepɨrɨji Micaiapa ichi pia ooda mãikꞌaapa jarada mama beemerã iru pꞌaarekꞌa. 5Mãpai ma eujã akꞌɨ chedapꞌedaarãpa mãgajida:

—Mãgara Tachi Akꞌõremaa tai pari nãga iidipáde ajida: “¿Tai na ode wãdade pia wãdaitꞌee wa mãga–e?”

6Mãpai ma Levideepa uchiada pꞌaarepa pꞌanauji:

—Kꞌãiwee wãdapáde aji, Tachi Akꞌõrepa parã wãrutamaa jɨ̃aitꞌee perã.

7Aɨ norema ma Dandeepa uchiadapꞌedaarã joisomaa uchiajida mãikꞌaapa wãjida Lais pꞌuurudee. Maapai ma pꞌuurudepemaarã kꞌãiwee pꞌanapachida awaraa sidoniorã pꞌanapatapꞌedaakꞌa. Ma Lais pꞌuurudepemaarã chõo jɨrɨdakꞌaa paji awaraarã ome mãikꞌaapa awaraarãpa ãra ome nepɨra jɨrɨdakꞌaa paji. Ne–inaa faltadakꞌaa paji, awaraa sidoniorã ikꞌaawaapa tꞌɨmɨ́ pꞌanapachida mĩda. Ma awara kꞌõpꞌãyo meraadakꞌaa paji awaraarã ãchi ikꞌaawa pꞌanapatapꞌedaarã ome. 8Ma pꞌuuru akꞌɨdapꞌeda, ma Dandeepa uchiadapꞌedaarã joisomaa ãpɨtee wãjida ãchi kꞌõpꞌãyoorã pꞌanadapꞌedaamaa Zora pꞌuurude mãikꞌaapa Estaol pꞌuurude. Mãɨrãpa ma joisomaa wãdapꞌedaarãmaa iidijida:

—¿Sãga wãjidama? ajida.

9Ãrapa pꞌanaujida:

—Ma eujã jõmaade nipajidada ajida. Eujã pi–ia bɨ. ¡Wãdáma mãdepemaarã ome chõode! ¡Nama kꞌãiwee pꞌaneenáatɨ! ¡Ma eujã jãri atanadáma! ajida. 10Mama panadakꞌãri, unudaitꞌee mãpemaarã kꞌãiwee pꞌanapata. Eujã pia waibɨa iru pꞌanapata. Ne–inaa faltadakꞌaa. Tachi Akꞌõrepa tachimaa ma eujã atapiitꞌeepɨ.

11Mãpai Dandeepa uchiadapꞌedaarã seiscientos arma panau uchiajida Zoradeepa mãikꞌaapa Estaoldeepa. 12Judadeepa uchiadapꞌedaarã eujãde panadakꞌãri, Quiriat Yearín pꞌuuru occidente eere ãchi kꞌãipata oojida. Ɨ̃rá ma punto tꞌɨ̃jarapata “Dandeepa uchiadapꞌedaarã kꞌãipata eujã”. 13Mamãikꞌaapa wãjida Efraindeepa uchiadapꞌedaarã eujãdepema ee jẽra bɨmaa. Mãgá Micaías temaa panajida. 14Mama pꞌanɨde ma naaweda Lais pꞌuuru akꞌɨdapꞌedaa joisomaarãpa mãgajida ãchi kꞌõpꞌãyoorãmaa:

—Na eperã tede efod, ne–inaa kꞌĩrakꞌa bɨ ome iru pꞌanɨ, ne–inaa kꞌĩrakꞌa bɨ pꞌaratꞌapa pꞌẽeda paara. ¿Kꞌãata kꞌĩsia pꞌanɨma? ¿Kꞌãata oodaipia bɨ? ajida.

15Pedeeteedapꞌeda, ma naaweda wãdapꞌedaa joisomaarãpa ãchi kꞌõpꞌãyoorã ikꞌaawaapa uchiadapꞌeda, wãjida Micaías temaa mãikꞌaapa ma Levideepa uchiada kꞌũtrãa saludaajida. 16Mãga nɨde ma Dandeepa uchiadapꞌedaa seiscientos soldaorãpa ma tedepema puerta taawa nɨ pꞌaneejida. 17Ma joisomaarã teeda tꞌĩudapꞌeda, ma ne–inaa kꞌĩrakꞌa bɨ pꞌaratꞌapa pꞌẽeda jita atajida awaraa ne–inaa kꞌĩrakꞌa bɨ ome, ma efod paara. Ãrapa mãga oo pꞌanɨ misa, ma Levideepa uchiada pꞌaare bainɨ̃ baji tedepema puerta taawa ma seiscientos soldaorã ome.

18Ma pꞌaarepa unukꞌãri ma joisomaarãpa Micaías tedepema ne–inaa kꞌĩrakꞌa bɨ pꞌe wãdá, mãgaji:

—¿Kꞌãata oomaa pꞌanɨma? aji.

19Pꞌanaujida:

—kꞌĩupꞌee beepáde ajida. Tai ome chepáde ajida. Kꞌinia pꞌanɨ pɨ tai pꞌaare pamerã mãikꞌaapa taideerãkꞌa pamerã. ¿Piara bɨ–ekꞌã ajida, pɨ Israeldeepa uchiada ëreerã pꞌaare pamerã eperã abapai te pidaarã pꞌaare pai kꞌãyaara?

20Ma pedee ũrikꞌãri, ma pꞌaarepa ijãaji. Ma ne–inaa kꞌĩrakꞌa bɨ, ma efod, awaraa ne–inaa kꞌĩrakꞌa bɨ ome pꞌe atapꞌeda, wãji ma Dandeepa uchiadapꞌedaarã ome. 21Ãra naa nipapachida ãchi warrarã, ne–animalaarã, netꞌaa ome. 22Tꞌɨmɨɨpai wãrutade, Micaías ichi te kꞌaitꞌa pꞌanapatapꞌedaarã ome chipꞌedachida tꞌẽe wãdaitꞌee. 23Ãra kꞌaitꞌa wãdakꞌãri, ma Dandeepa uchiadapꞌedaarãpa Micaías eere pꞌanadapꞌedaarã biapi ũrijida. Mapa ãpɨtee chejida Micaías ome pedeedaitꞌee. Irumaa iidijida:

—¿Pɨ sãga nɨ̃bɨma? ajida. ¿Sãapꞌeda parã audú bia jõnɨma? ajida.

24Micaiapa pꞌanauji:

—Parãpa mɨ ne–inaa kꞌĩrakꞌa bɨ mɨchi juadoopa ooda chɨa ateeruta. Ma awara mɨ pꞌaare atee wãda. Mɨ ne–inaa pia jõmaweda chɨa ateeruta. ¿Mãga bɨta, iidi pꞌanɨkꞌã aji, mɨ sãga nɨ̃bɨ?

25Mamĩda ma Dandeepa uchiadapꞌedaarãpa pꞌanaujida:

—Tai ome aupedeenáaji, maa–e pɨrã taidepemaarãpa pɨ ome waa chooda–e pai mãikꞌaapa pɨ, pɨ eere pꞌanɨɨrã ome chõodai. Mãgara pɨ, pɨchideerã ome piudayada ajida.

26Micaiapa ãchi chokꞌara nida unukꞌãri, ichi temaa ãpɨtee wãji. Jõdee ma Dandeepa uchiadapꞌedaarã ãchi ode wãjida. 27Ateejida Micaiapa netꞌaa ichi juadoopa ooda iru pꞌaare ome mãikꞌaapa Lais pꞌuurude panajida. Ma pꞌuurudepemaarã kꞌãiwee pꞌanapatapꞌedaa perã, kꞌĩsiajida ma Dandeepa uchiadapꞌedaarã tꞌãri pia pꞌanapata ãchikꞌa. Mamĩda atu pꞌanɨde ma Dandeepa uchiadapꞌedaarãpa ma pꞌuurudepemaarã espadapa peekꞌoo wãjida. Maapꞌeda ãra pꞌuuru paa jõjida. 28Ma pꞌuuru awaraa sidoniorã pꞌanapatapꞌedaamãiipa tꞌɨmɨ́ bada perã mãikꞌaapa awaraarã ome kꞌõpꞌãyo meraadakꞌaa pada perã, apidaapa ãra kꞌaripa cheda–e paji. Mãgá ma Dandeepa uchiadapꞌedaarã pꞌaneejida ma eujã jewedaa Bet Rejobde. Pꞌuuru chiwidi oo atajida mãikꞌaapa mama pꞌanapachida. 29Naaweda ma pꞌuuru Lais tꞌɨ̃jarapachida mĩda, ma Dandeepa uchiadapꞌedaarãpa tꞌɨ̃ bɨjida Dan, ãchi chonaa Israeldeepa uchiada warra Dan pari. 30Dandeepa uchiadapꞌedaarãpa ma ne–inaa kꞌĩrakꞌa bɨ pꞌaratꞌapa pꞌẽeda mãikꞌaapa awaraa ne–inaa kꞌĩrakꞌa bɨ bɨjida ãchi pꞌuuru pidaarãpa aɨ kꞌĩrapite ɨtꞌaa tꞌɨ̃pataadamerã. Ma kꞌũtrãa Micaías tedeepa ateedapꞌedaa bɨjida ãra pꞌuurude pꞌaare mimia oopariimerã. Ma kꞌũtrãa Moisés ãichakꞌe, Gersón warra paji, tꞌɨ̃jarapatapꞌedaa Jonatán. Tꞌẽepai Jonatandeepa uchiadapꞌedaarã Dandeepa uchiadapꞌedaarãdepema pꞌaareerã pꞌaneejida, israelitaarã kꞌĩra unuamaa iru pꞌanapatapꞌedaarãpa ãra ateerutamaa awaraa eujãdee. 31Tachi Akꞌõre te Siló pꞌuurude bɨ misa, ma Dandeepa uchiadapꞌedaarãpa ma ne–inaa kꞌĩrakꞌa bɨ Micaiapa ooda ãchi pꞌuurude iru pꞌanapachida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index