Search form

Jueces 19

Levideepa uchiada ichi wẽra kꞌãipari ome

1Israel eujãde atꞌãri rey wẽ–e paji. Maapai Levideepa uchiada bapachi Efraindeepa uchiadapꞌedaarã eujãde ee jẽra bɨ tꞌɨmɨara bɨde. Mãgɨ́ eperãpa Belén de Judá apatapꞌedaa pꞌuurudepema wẽra ataji ichi wẽra kꞌãiparii papiitꞌee. 2Mamĩda tꞌẽepai ma wẽra iru ome kꞌĩraudachi mãikꞌaapa wãji Belendee ichi akꞌõre temaa. Mama baji atane kꞌĩmari wãyaarude. 3Mãpai ma Levideepa uchiada wãji ichi wẽra akꞌɨde. Kꞌũra ata kꞌinia baji waya ichi ome beemerã. Ma wẽra akꞌõre temaa panakꞌãri ichi mimiapari, burro omé ome, chi wẽrapa teeda tꞌĩupiji. 4Ma wẽra akꞌõrepa ma Levideepa uchiada o–ĩa auteebaiji mãikꞌaapa jaraji ãchi ome beemerã. Mãgá ma Levideepa uchiada ichi mimiapari ome mama kꞌãima õpee pꞌaneejida; nekꞌomaa, ne–inaa tomaa, kꞌãimaa. 5Ewari kꞌĩmariide tapꞌedaweda ma Levideepa uchiada pꞌirabaiji wãitꞌee ichi temaa. Mamĩda wãdai naaweda ma wẽra akꞌõrepa chi wiumaa enenee nɨ̃beeji nekꞌomerã:

—Pan kꞌóji ma–ãri pida juatau iru bamerã.

6Mãpai ma Levideepa uchiada su–akꞌɨ beeji ichi chãure ome nekꞌoitꞌee mãikꞌaapa ne–inaa toitꞌee. Mãga bɨde ma wẽra akꞌõrepa jaraji waya kꞌãiwee kꞌãi beemerã ichi tede. 7Pꞌirabaiji mĩda wãitꞌee, chi chãurepa jara nɨ̃bɨpa wã–e paji.

8Ewari joisomaade ma Levideepa uchiada waya pꞌirabaiji wãitꞌee ichi temaa. Mamĩda chi chãure waya enenee nɨ̃beeji wãi naaweda nekꞌomerã. Mãgá ma Levideepa uchiada beeji kꞌewara parumaa. 9Mãpai ma Levideepa uchiada wãitꞌee pakꞌãri chi mimiapari ome, chi wẽra kꞌãipari ome, chi chãurepa jaraji audú kꞌewara bairã waya pꞌaneedamerã. Mãgá pia ɨ̃idai mãikꞌaapa nu wãdayada aji. 10Mamĩda ma Levideepa uchiadapa waa bee kꞌinia–e paji. Mapa uchiaji ichi wẽra kꞌãipari ome, chi mimiapari ome, ma burro omé su–akꞌɨ beepari ome. 11Ode wãdade Jebús, ichiaba tꞌɨ̃jarapata Jerusalén pꞌuuru kꞌĩrapite panadakꞌãri, ma mimiaparipa mãgaji:

—¿Sãapꞌeda na jebuseorã pꞌuurude kꞌãida–ema? aji.

12Mamĩda ma Levideepa uchiadapa pꞌanauji:

—Pꞌaneeda–e paitꞌeeda aji, israelitaarã pꞌuuru–emãi. Wãdáma aji, Guibeá pꞌuurudee. 13Mama maa–e pɨrã Ramá pꞌuurude pꞌaneedayada aji.

14Mãgá wãjida ãchi ode. Akꞌõrejĩru baai wãkꞌãri, panajida Guibeá pꞌuurude. Ma pꞌuuru Benjamindeepa uchiadapꞌedaarã eujãde baji. 15Ma odeepa uchiadapꞌeda, Guibeáde tꞌĩujida kꞌãidaitꞌee. Ma pꞌuuru jãdepema plazade su–akꞌɨ pꞌananajida apidaapa te teeda–e pada perã kꞌãidaitꞌee.

16Taarã pakꞌãri, pꞌãrikꞌua chonaa chai wãyaa wãji mimia oo badadeepa mẽe. Ma chonaa Efraindeepa uchiadapꞌedaarã eujãde ee jẽra bɨdepema paji. Ma Benjamindeepa uchiadapꞌedaarã pꞌuurude bapachi mama mimia unuda perã. 17Ma chonaapa ma Levideepa uchiada plazade unukꞌãri, iidiji:

—¿Sãmãikꞌaapa cheruma aji, mãikꞌaapa sãmaa wãma?

18Ma Levideepa uchiadapa pꞌanauji:

—Belén pꞌuurude pꞌasia nipajida. Efraindeepa uchiadapꞌedaarã eujãdee wãruta ee jẽra bɨ tꞌɨmɨara bɨmãi mama mɨ bapari perã. Mamĩda ɨ̃rá te unuda–e bɨda aji, mama kꞌãidaitꞌee. 19Pꞌũajara pꞌooda iru bɨda aji, mɨchi burroorã–itꞌee. Ichiaba pan vino ome iru bɨ tai–itꞌee; mɨ, mɨchi wẽra, mɨchi mimiapari–itꞌee. Ne–inaa awaraa faltada–e pꞌanɨda aji.

20Mãpai ma chonaapa mãgaji:

—Chedapáde aji, mɨ temaa. Mɨa parã kꞌaripaitꞌee plazade kꞌãinaadamerã. Chikꞌo, kꞌãipari parãmaa teeitꞌeeda aji. 21Mãgá ma chonaapa ãra ichi temaa ateeji. Ma Levideepa uchiada ichideerã ome ãchi bɨɨrɨ sɨɨdapꞌeda, nekꞌomaa, ne–inaa tomaa pꞌaneejida. Mãɨmisa ma chonaapa pꞌũajara pꞌooda teeji ãchi burroorãmaa. 22Mãgá tꞌãri o–ĩ–ĩa pꞌanɨde, ma pꞌuurudepema kꞌachia ooi awaa pꞌanapatapꞌedaarã pachejida mãikꞌaapa ma chonaa te wapꞌɨra atajida. Ma tedepema puerta sĩjida mãikꞌaapa ma chonaamaa golpe mãgajida:

—¡Pëipáde ajida, jã ɨmɨkꞌĩra etꞌewa pacheda iru ome kꞌãi kꞌinia pꞌanadairã!

23Mãga ũrikꞌãri, ma chonaapa enenee nɨ̃beeji:

—Kꞌõpꞌãyoorã, ¡mɨ chupɨria kꞌawáatɨ! ¡Mãga kꞌachia oonáatɨ mɨa auteebaidamaa! 24Mɨa kꞌau iru bɨda aji, waide ɨmɨkꞌĩra ome kꞌãi–ee. Ichiaba na eperã pacheda wẽra kꞌãipari iru bɨ. Ãra pëiitꞌee pãchi oo kꞌiniata oodamerã. Mamĩda na eperãmaa mãgee kꞌachia oonáatɨ.

25Mamĩda ma chonaa pedee ũridaamaa pꞌanajida. Mapa ma Levideepa uchiadapa ichi wẽra kꞌãipari calle jãdee wãpiji. Mãpai ma kꞌachia beerãpa ma wẽra ome kꞌãijida irua kꞌinia–e bɨde tapꞌeda parumaa mãikꞌaapa ichiakꞌau atabaibëijida. 26Tapꞌedaweda ma wẽra pacheji ma chonaa temaa, ichi ɨmɨkꞌĩra kꞌãi badamãi. Mama ma tedepema puerta kꞌĩrapite baaipꞌeda, piudachi. 27Tꞌẽepai chi ɨmɨkꞌĩrapa ma puerta ewakꞌãri ichi ode wãitꞌee, chi wẽra unuji barroo baibɨ puerta tꞌaide. Ma puerta tꞌɨapatadepema tabla jita iru baji juapa. 28Mãpai ma Levideepa uchiadapa mãgaji chi wẽramaa:

—Pꞌirabáiji. Wãdáma aji.

Mamĩda chi wẽrapa maarepida pꞌanau–e paji piu baibada perã. Mãpai ma Levideepa uchiadapa chi wẽra kꞌapꞌɨa piuda bɨji ichi burrode mãikꞌaapa ichi temaa wãji. 29Mama panakꞌãri, chi wẽra kꞌapꞌɨa piuda loweropa tꞌooma docede tꞌookꞌooji mãikꞌaapa ma tꞌooma aba–abaa pëiji israelitaarã ëreerã chaachaa. 30Ma wẽra piuda kꞌapꞌɨa tꞌooda unudapꞌedaarãpa mãgajida:

—Israelitaarã Egipto eujãdeepa uchiadapꞌedaadeepa tachia nãgee ne–inaa kꞌachia unudakꞌaa paji. Kꞌĩsiadáma mãikꞌaapa pedeeteedáma. Mãgá kꞌawadaitꞌee kꞌãata oodaipia bɨ ma wẽra peedapꞌedaarãmaa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index