Search form

Jueces 2

Ángel unudapꞌedaa Boquinde

1Tachi Akꞌõrepa ángel pëida wãji Guilgaldeepa Boquindee. Mama israelitaarãmaa mãgaji: “Mɨa parã uchiapiji Egiptodeepa mãikꞌaapa aneeji na eujãde, mɨa parã chonaarãmaa jaradakꞌa. Ãramaa nãga jaraji: ‘Ichita ooitꞌee mɨa pacto parã ome oodade jara bɨkꞌa 2parãpa mɨa jara bɨkꞌa ooruta pɨrã. Pacto oonáatɨ ma eujãdepemaarã ome chõoda–ee pꞌanapataadaitꞌee. Ma awara ãra akꞌõre waibɨa apatamaa ɨtꞌaa tꞌɨ̃pata altar bee ãrikꞌoodapáde’ aji. Mamĩda parãpa mɨa jaradakꞌa ooda–e paji. ¡Ma kꞌãyaara pãchia kꞌiniata oojida! 3Maperã mɨa nãga jara bɨ: Ma eujãdepemaarã jërekꞌoo–e paitꞌee parã tꞌãideepa. Ichiakꞌau bɨitꞌeeda aji, ãrapa mãikꞌaapa ãchi akꞌõre waibɨa apataarãpa parã kꞌũradamerã.”

4Ma ángel pedee aupakꞌãri, arii pꞌanadapꞌedaa israelitaarã golpe jẽe pꞌaneejida. 5Mapa ma punto tꞌɨ̃ bɨjida Boquín.+ Mama israelitaarãpa ne–animalaarã peedapꞌeda, Tachi Akꞌõre–itꞌee paapijida.

Josué jai–idaada

6Josuepa israelitaarã despediikꞌãri, ãra wãjida ãchi eujã atade. 7Josué chokꞌai bɨ misa, israelitaarã Tachi Akꞌõremaa ɨtꞌaa tꞌɨ̃pachida. Ichiaba mãga pꞌanapachida chonaarã, chi Tachi Akꞌõrepa ne–inaa pia kꞌĩra tꞌãdoo ooda israelitaarã kꞌaripaitꞌee unudapꞌedaarã chokꞌai pꞌanɨ misa. 8Mamĩda Josué jai–idaaji ciento diez año iru bakꞌãri. 9Ɨajida ichi eujã Timnat Serade Gaas ee norte eere bɨ Efraindeepa uchiadapꞌedaarã ee jẽra bɨ eujãde. 10Maapꞌeda israelitaarã Josué kꞌawadapꞌedaarã ichiaba jai–idaa wãjida. Mãgá ãra tꞌẽe tꞌodapꞌedaarãpa Tachi Akꞌõre netꞌaa kꞌawada–e paji. Ichiaba kꞌawada–e paji irua ooda ãchi chonaarã kꞌaripaitꞌee.

Israelitaarã Tachi Akꞌõrede ijãa amaadapꞌedaa

11Maperã ɨtꞌaa tꞌɨ̃ pꞌaneejida awaraa akꞌõre waibɨa apata Baalmaa. Tachi Akꞌõrepa mãga unukꞌãri, israelitaarã pia akꞌɨ–e paji. 12Irua ãchi chonaarã Egipto eujãdeepa uchia ataji mĩda, irude ijãa amaa pꞌaneejida. Irude ijãadai kꞌãyaara ãchi tꞌãide pꞌanapatapꞌedaarã akꞌõre waibɨa apataarãmaa ɨtꞌaa tꞌɨ̃pachida. Maperã ãra ome Tachi Akꞌõre kꞌĩrau beeji. 13Irude ijãa amaajida akꞌõre waibɨa apata Baalde mãikꞌaapa akꞌõre waibɨa apataarã Astartede ijãadaitꞌee. 14Maperã ãra ome Tachi Akꞌõre kꞌĩrau baji. Ãra waa pia akꞌɨ–e paji. Mapa nechɨ–idaa beerãpa ãra netꞌaa jãri ata wãjida. Ma awara ãra kꞌĩra unuamaa iru pꞌanadapꞌedaarãpa ãchi pꞌoyaa wãjida, Tachi Akꞌõrepa ãra kꞌaripa–e pada perã. 15Chõode uchiadakꞌãri, Tachi Akꞌõrepa ãra kꞌĩra unuamaa iru pꞌanadapꞌedaarã kꞌaripaji ãra pꞌoyaadamerã. Ooji irua naaweda jaradakꞌa ãra kꞌaripa–e paitꞌee awaraa akꞌõre waibɨa apatade ijãa pꞌaneeruta pɨrã.

Maapai israelitaarã chupɨria pꞌanapachida. 16Tachi Akꞌõrepa ãramaa mãga ooji mĩda, ichia poro waibɨarã uchiapiji ãra kꞌaripadamerã. Mãgá chõo ũkꞌuru pꞌoyaajida. 17Mamĩda taarã–e nɨde israelitaarãpa ma poro waibɨarã pedee ũridaamaa pꞌaneejida. Mãga nɨde Tachi Akꞌõre yiaraa iru pꞌanapachida mãikꞌaapa awaraa akꞌõre waibɨa apatade ijãapachida. Ãchi chonaarãpa Tachi Akꞌõre leyde jara bɨkꞌa oopachida mĩda, ãrapa mãga oo kꞌiniada–e paji. 18Mãpai Tachi Akꞌõrepa waya unukꞌãri israelitaarã chupɨria chitoonɨ awaraarã juade, ãra chupɨria kꞌawaaji. Poro waibɨa chiwidi uchiapiji ãra kꞌaripamerã. Ichia ma poro waibɨa kꞌaripaji ãra uchiapimerã ãra kꞌĩra unuamaa iru pꞌanadapꞌedaarã juadeepa. Ma poro waibɨa chokꞌai bɨ misa, chõo pꞌoyaapachida. 19Mamĩda mãgɨ́ eperã jai–idaakꞌãri, waya kꞌachiade baaijida mãikꞌaapa ãra chonaarã kꞌãyaara kꞌachiara pꞌanapachida, ooi awaa pꞌanadapꞌedaa perã awaraa akꞌõre waibɨa apataarãpa oopidapꞌedaakꞌa. Ãrapa ne–inaa kꞌachia oopatapꞌedaa jarada–e paji Tachi Akꞌõremaa irua ãyaa bɨmerã. Kꞌɨɨrɨ kꞌisua pꞌanapachida. 20Maperã Tachi Akꞌõre israelitaarã ome kꞌĩrau baji mãikꞌaapa mãgaji: “Na eperãarãpa oodaamaa pꞌanɨ mɨa pacto ãra chonaarã ome oodade jaradakꞌa. Mɨa oopi kꞌinia bɨkꞌa oodaamaa pꞌanɨ. 21Maperã mɨa waa jërekꞌoo–e paitꞌee ãra kꞌĩra unuamaa iru pꞌanapataarã ãra naa, mɨa Josuemaa jaradakꞌa. Josuepa pꞌoyaada awara mɨa ãramaa pꞌoyaapi–e paitꞌee.” 22Tachi Akꞌõrepa ma eujãdepemaarã ichiakꞌau bɨji kꞌawaitꞌee israelitaarã waya ichide ijãa pꞌaneedai ãchi chonaarãkꞌa wa ijãada–e pꞌaneedai. 23Ma eujãdepemaarã jërekꞌoo–e paji ichia oodakꞌa Josuepa pꞌoyaada eperãarã ome.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index