Search form

Jueces 3

Pꞌuuru pidaarã Canaán eujãde pꞌaneedapꞌedaa

1Mãgá Tachi Akꞌõrepa jërekꞌoo–e paji ma eujãdepemaarã ũkꞌuru. Mãɨrã ichiakꞌau atabëiji pꞌanapataadamerã Israel pidaarã tꞌãide, ma israelitaarã waide tꞌoda–ee pꞌanadapꞌedaa perã ãchi chonaarã Canaán eujãde ewaa tꞌĩudakꞌãri. 2Tachi Akꞌõrepa mãɨrã bëiji Canaán eujãde, israelitaarãpa chõo kꞌawaadamerã mãɨrã ome chõodakꞌãri. 3Mãgá nãgɨɨrã Tachi Akꞌõrepa teeitꞌee bada eujãde pꞌaneejida: filisteorã poro waibɨarã joisomaa, cananeorã jõmaweda, sidoniorã, heveorã ome. Ma heveorã Líbano ee jẽra bɨde pꞌanapachida Baal Hermón eedeepa Jamat o wãyaapari ee jẽra bɨde parumaa. 4Tachi Akꞌõrepa mãɨrã ichiakꞌau atabëiji Israel pidaarã ome chõodamerã. Kꞌawa kꞌinia baji israelitaarã ijãadai iru leyde jara pëida Moisés kꞌapꞌɨa wa mãgɨde ijãada–e pai. 5Mãgá israelitaarã pꞌanapachida ma cananeorã, hititaarã, amorreorã, ferezeorã, heveorã, jebuseorã ome. 6Maapai ma israelitaarã warrarã, kꞌaurã paara miakꞌãipachida mãɨrã warrarã, kꞌaurã ome. Mãgá ɨtꞌaa tꞌɨ̃pachida mãɨrã akꞌõre waibɨa apataarãmaa.

Otonielpa israelitaarã kꞌaripada

7israelitaarãpa ne–inaa kꞌachia oopachida Tachi Akꞌõre kꞌĩrapite. Iru kꞌĩra atuajida mãikꞌaapa ɨtꞌaa tꞌɨ̃pachida Baalmaa, Astartemaa. 8Maperã Tachi Akꞌõre ãra ome kꞌĩrau baji mãikꞌaapa ãra pꞌoyaapiji Mesopotamia eujãdepemaarã reymaa. Mãgɨ́ tꞌɨ̃jarapachida Cusán Risatayin. Ocho año mãgɨ́ jua ekꞌari pꞌanajida. 9Ma tꞌẽepai israelitaarãpa Tachi Akꞌõremaa chupɨria iidijida kꞌaripapari pëimerã. Mapa Tachi Akꞌõrepa Caleb ɨ̃pema tꞌẽepema Cenaz warra pëiji ãra kꞌaripamerã. Mãgɨ́ tꞌɨ̃jarapachida Otoniel. 10Tachi Akꞌõrepa ichi Jaure pëiji Otonielmaa, irua israelitaarã kꞌaripamerã. Uchiadakꞌãri chõode rey Cusán Risatayin ome, Tachi Akꞌõrepa Otoniel eere pꞌanadapꞌedaarãmaa pꞌoyaapiji. 11Ma tꞌẽepai cuarenta año wãyaarude israelitaarã kꞌãiwee pꞌanapachida Cenaz warra jai–idaarumaa.

Aodpa israelitaarã moabitaarã juadeepa kꞌaripa atada

12Mamĩda Otoniel jai–idaada tꞌẽepai, israelitaarãpa waya ne–inaa kꞌachia oo pꞌaneejida Tachi Akꞌõre kꞌĩrapite. Maperã Tachi Akꞌõrepa Moabdepema rey, tꞌɨ̃jarapatapꞌedaa Eglón, juataura papiji. 13Rey Eglonpa pedeeteeji Amón pidaarã ome, amalecitaarã ome israelitaarãmaa chõonadaitꞌee. Mãgá israelitaarã ome chõodakꞌãri, Palma–idaa pꞌuuru jãri atajida. 14Maperã israelitaarã dieciocho año pꞌanapachida rey Eglón jua ekꞌari. 15Maapai waya Tachi Akꞌõremaa chupɨria iidijida irua kꞌaripapari pëimerã. Mapa Tachi Akꞌõrepa Benjamindeepa uchiada, Guerá warra pëiji. Mãgɨ́ tꞌɨ̃jarapachida Aod. Aodpa ne–inaa audú oopachi juabipa.

Ewari aba israelitaarãpa impuesto pꞌaa pëijida rey Eglonmaa Aod kꞌapꞌɨa. 16Wãi naaweda Aodpa espada kꞌĩraichaaweda pꞌewedee oo ataji. Mãgɨ́ espada teesoo metro esa–aukꞌa baji. Mãgɨ́ espada merã tꞌɨ bɨji ichi kꞌɨrrɨde jɨ̃pari cinturonkꞌa bɨ ekꞌari juaraarepema eere. 17Mãpai wãji rey Eglonmaa impuesto pꞌaade. Eglón audú poree baji. 18Impuesto pꞌaapꞌeda, Aod uchiaji ichi ome nipapatapꞌedaarã ome. 19Mamĩda Guilgal kꞌaitꞌa panadakꞌãri ne–inaa juapa ooda aɨ kꞌĩrapite ɨtꞌaa tꞌɨ̃pata badamãi, Aod ãpɨtee cheji rey Eglonmaa mãikꞌaapa mãgaji:

—Rey Waibɨa, mɨa pɨmaa ne–inaa jara kꞌinia bɨda aji. Mamĩda kꞌinia–e bɨ awaraarãpa ũridamerã.

Mãpai Eglonpa ichi mimiapataarãmaa jaraji kꞌĩupꞌee taawaa wãdamerã. 20Eglón su–akꞌɨ baji ichi cuarto iru badade verano wãyaaitꞌee. Ituaba pꞌaneedakꞌãri, Aod kꞌaitꞌa wãpꞌeda, mãgaji:

—Rey Waibɨa, mɨa jara cheji Tachi Akꞌõrepa pɨmaa jara pëiru.

Mãga ũrikꞌãri, Eglón bainɨ̃ beeji. 21Mamĩda Aod, juabipa ma espada juaraarepema eere merã bada ẽtꞌa ataji mãikꞌaapa Eglón bide sutꞌaaji. 22Eglón audú poree bada perã, ma espadapa sukꞌãri, chi kꞌukꞌu paara tꞌĩudachi. Aodpa ẽtꞌa ata–e paji. 23Maapꞌeda Aodpa chi puerta pia jɨ̃a nɨ̃bɨji mãikꞌaapa ventanadeepa uchiadachi.

24Tꞌẽepai rey mimiapataarãpa iru akꞌɨ chedakꞌãri, unujida ma puerta jɨ̃a nɨ̃bɨ. Kꞌĩsiajida rey ãmaa bɨ. Mapa tꞌĩuda–e paji. 25Mamĩda taarã nɨ̃bakꞌãri, kꞌĩsia pꞌaneejida rey uchia–e bada perã. Maperã llave atadapꞌeda, ma puerta ewa atadakꞌãri, ãchi chipari unu atajida te jãde piu baibɨ.

26Ãchia nɨ pꞌanɨ misa rey uchiamerã, Aod jirabodo baji. Ma ne–inaa juapa ooda Guilgalde bada wãyaapꞌeda, Seirat puntode mirunaji. 27Israelitaarã eujãde panakꞌãri, Efraindeepa uchiadapꞌedaarã eujãdepema ee jẽra bɨde trompeta chaaji, israelitaarã chipꞌedaidamerã. Mãpai ee jẽra bɨdeepa edaa chejida Aod, ãchi poro waibɨa ome. 28Aodpa jaraji: “Wãdáma moabitaarã ome chõode Tachi Akꞌõrepa tachi kꞌaripaitꞌee perã.” Mãgá chõo chejida mãikꞌaapa jõmaweda Jordán to sĩapatamãi jãri atajida maapꞌeda Moab eujãdeepa waa apida mama wãyaapida–e paji. 29Maapai moabitaarã ome chõodakꞌãri, ãra soldaorã sõcharra beerã diez mil peekꞌoojida. 30Mãgá israelitaarãpa moabitaarã pꞌoyaajida. Ma tꞌẽepai ochenta año wãyaarude israelitaarã kꞌãiwee pꞌanapachida.

Samgarpa israelitaarã filisteorã juadeepa kꞌaripa atada

31Maapꞌeda Tachi Akꞌõrepa Anat warra, Samgar, israelitaarã poro waibɨa papiji. Samgarpa filisteorã seiscientos peeji totꞌekꞌa bɨpa. Mãgá israelitaarã mãɨrã juadeepa kꞌaripa ataji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index