Search form

Jueces 5

1Sísara piuda ewateweda Deborapa Abinoam warra Barac ome nãga kꞌarijida:

2“Gracias jaradáma Tachi Waibɨamaa Israelde atꞌãri ɨmɨkꞌĩraarã sõcharra beerã paraa perã. Atꞌãri ɨmɨkꞌĩraarã paraa chõodaitꞌee tachi pꞌuuru pari. 3¡Ũrítɨ na eujãdepemaarã reyrã! ¡Ũrítɨ eperãarã poro waibɨarã! ¡Mɨa Tachi Waibɨamaa kꞌariitꞌee! ¡Iruta israelitaarã Akꞌõre Waibɨa!”

4“Tachi Waibɨa, pɨ Seirdeepa uchiakꞌãri mãikꞌaapa Edom eujãdeepa wãkꞌãri, na eujã wëre nɨ̃beeji mãikꞌaapa kꞌoi chedachi. 5israelitaarã Akꞌõre Waibɨa kꞌĩrapite ee wëre nɨ̃beeji, irua Sinaí ee wërepidakꞌa. 6Anat warra Samgar na eujãde bakꞌãri mãikꞌaapa Jael na eujãde bakꞌãri, eperãarã ode pꞌoyaa wãdakꞌaa paji, kꞌachia beerãpa otꞌa nɨpatapꞌedaa perã tachi ome chõodaitꞌee. Maperã mẽe o kꞌachia beede nipapachida. 7Maapai pꞌuuru kꞌaipeede eperãarã pꞌanadakꞌaa paji. Mãga nɨde mɨ, Israeldepema wẽra, ãchi poro waibɨa beeji.

8“Israelitaarãpa jɨrɨtꞌerajida awaraa akꞌõre waibɨa apatade ijãapataadaitꞌee, ãchi kꞌĩra unuamaa iru pꞌanapataarã ome chõodai kꞌãyaara. Mapa ãchi tꞌãide jura chõo chedakꞌãri, arma wẽe pꞌanajida, ãchi cuarenta mil paji mĩda.

9“Mamĩda israelitaarã chõo kꞌinia pꞌaneedakꞌãri, mɨa ãra poro waibɨarã kꞌaripaji. ¡Kꞌarítɨ Tachi Waibɨamaa!

10“Ũrítɨ pꞌaratꞌa paraa beerã, chi burro tꞌorrotꞌorroo bee ɨ̃rɨ wãpataarã mãikꞌaapa tapete pi–ia bee ɨ̃rɨ su–akꞌɨ beepataarã. Ichiaba ũrítɨ parã awara ãyaa wãpataarã. 11Awẽraarãpa pania tꞌɨpata pozo beemãi kꞌarimaa pꞌanɨ. Nepɨrɨmaa pꞌanɨ Tachi Waibɨapa ooda tachi kꞌaripaitꞌee mãikꞌaapa tachi soldaorã sõcharraarãpa oodapꞌedaa. Maapai Tachi Akꞌõrede ijãapataarã pꞌuuru tꞌĩupatade chipꞌedaidapꞌedaarãpa

12mãgajida:

“¡Débora, ɨ̃rɨmáji, ɨ̃rɨmáji mãikꞌaapa kꞌaríji! ¡Abinoam warra, Barac, wã́ji tachi kꞌĩra unuamaa iru pꞌanapataarã ome chõode!

13“Mãga ooji. israelitaarã eedeepa edaa chejida chõode juataura pꞌanadapꞌedaarã ome. Mɨ kꞌaurepa Tachi Akꞌõre eerepema soldaorã chõo chejida jura oo kꞌawaa pꞌanapatapꞌedaarã ome. 14Efraindeepa uchiadapꞌedaarã ũkꞌuru chejida eujã jewedaadee. Ãchi tꞌẽe chejida Benjamindeepa uchiadapꞌedaarã, Maquir, Manasedeepa uchiadapꞌedaarã ëreerãdepemaarã poro waibɨarã, Zabulondeepa uchiadapꞌedaarã ëreerãdepemaarã poro waibɨarã paara. 15Ichiaba Débora ome chejida Isacardeepa uchiadapꞌedaarã ëreerãdepemaarã poro waibɨarã. Ãchia Barac kꞌaripajida iru tꞌẽe wãdakꞌãri ma eujã jewedaade.

“Rubendeepa uchiadapꞌedaarã tꞌãide sõcharra beerã paraa pɨrã, 16¿sãapꞌeda ovejaarã akꞌɨpataarã ome pꞌaneejidama? ¿Wãda–e paji–ekꞌã tꞌãri ma–ãri pꞌanadapꞌedaa perã?

17“¿Sãapꞌeda Gaddeepa uchiadapꞌedaarã Jordán to kꞌĩraikꞌa eere pꞌaneejidama? ¿Sãapꞌeda Dandeepa uchiadapꞌedaarã pꞌaneejida Aserdeepa uchiadapꞌedaarã ome pꞌusa ide, barco choma wiibaipatamãi? 18Mamĩda mãga ooda–e paji Zabulondeepa uchiadapꞌedaarãpa mãikꞌaapa Neftalideepa uchiadapꞌedaarãpa. Ãra chõonajida, piudaikꞌajida mĩda.

19“Canaán eujãdepema reyrã chipꞌejida Tanacde, Meguido pania paraa bɨmãi. Chõo chejida. Mamĩda pꞌaratꞌa, netꞌaa pi–ia jãri atada–e paji. 20Ɨtꞌaripema chõopataarãpa Sísara eere pꞌanadapꞌedaarã pꞌoyaa chejida. 21Cisón to chedaikꞌãri, ãra ũkꞌuru to barree topa atadachi. ¡Akꞌõre Waibɨa, mãgá pɨa juataura beerã pꞌoyaapari!

22¡Ãra caballoorã pꞌiradachida; pꞌira erreudachida! 23Mãga nɨde angelpa mãgaji: ¡‘Kꞌachiade baaidaitꞌee Meroz pꞌuurudepemaarã, kꞌaripa cheda–e pada perã Tachi Akꞌõre eerepemaarã!’

24“Mamĩda ɨ̃rá tachi jõmaarãpa Jael awaraa wẽraarã kꞌãyaara piara akꞌɨpata. Quenita Héber wẽra pia akꞌɨpata. 25Sisarapa pania iidikꞌãri, Jaelpa ne–animal juba vaso pi–ia bɨde teeji. 26Ma tꞌẽepai juabipa pakꞌuru kꞌɨ̃ mi–su ataji mãikꞌaapa juarapa martillo ataji. Mãgɨpa teeji Sísara porode. 27Mãgá Jael bɨɨrɨmãi Sísara pɨrabai, pɨrabai nɨ̃bapꞌeda, piudachi.

28“Mãɨmisa Sísara nawe kꞌĩsia nɨ̃baji iru che–e pakꞌãri. Ventanadeepa akꞌɨ bɨ misa, mãgaji: ‘¿Sãapꞌeda chi carreta taarã nɨ̃bɨma? aji. ¿Sãapꞌeda ũrida–ema ichi caballoorã carreta ome cheruta?’ 29Arii pꞌanadapꞌedaa wẽraarã kꞌĩsia kꞌawaara beerãpa mãgajida: 30‘¿Chõo pꞌoyaadapꞌeda, netꞌaa tꞌoomaa pꞌanɨ–epaama? ajida. ¿Soldaorã chaachaa esclava aba wa omé ata wãda–ekꞌã? ajida, mãikꞌaapa ¿Sisarapa pꞌaru pi–ia aba wa omé nonoree ome ata wã–epaama ajida, tachia jɨ̃pataadamerã?’

31“Tachi Waibɨa, ¡pɨ kꞌĩra unuamaa iru pꞌanapataarã jõmaweda mãgá jõdaipia bɨ, Sísara jõdakꞌa! ¡Jõdee pɨ kꞌinia iru pꞌanapataarã pia pꞌanapataadaipia bɨ! Akꞌõrejĩru pi–ia ɨ̃daaparikꞌa, mãga pɨkꞌa pɨ kꞌinia iru pꞌanɨɨrã ɨ̃daa pɨkꞌa pꞌanadaitꞌee jõmaarã taide.”

Maapꞌeda, cuarenta año wãyaarude israelitaarã kꞌãiwee pꞌanapachida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index