Search form

Jueces 6

Tachi Akꞌõrepa Gedeón jɨrɨtꞌerada israelitaarã kꞌaripamerã

1Maapꞌeda israelitaarãpa waya ne–inaa kꞌachia oo pꞌaneejida Tachi Akꞌõre kꞌĩrapite. Maperã irua ãchi Madián pidaarãmaa pꞌoyaapiji. 2Mãɨrãpa israelitaarã kꞌachia oo iru pꞌanapachida ãchi jua ekꞌari. Maperã israelitaarã mirunajida ee jẽra bɨmaa, mãu–idaa beede, mãu tede paara. 3israelitaarãpa ne–uuruta chaa, ãra ome chõo chepachida ma Madián pidaarã, amalecitaarã, oriente eerepemaarã paara. 4Ma kꞌĩra unuamaa iru pꞌanadapꞌedaarã Israel pidaarã eujãde pꞌaneejida mãikꞌaapa ãra ne–uudapꞌedaa jõtꞌaa wãpachida. Mãga oo wãpachida Gaza eujã parumaa. Maperã israelitaarã jarra oopachida ovejaarã, pꞌakꞌaarã, burroorã paara wẽ–e pada perã. 5Ma kꞌĩra unuamaa iru pꞌanadapꞌedaarã israelitaarã eujãde tꞌĩudakꞌãri, aneejida ãchi te ne–e ooda ãchi ne–animalaarã ome Xcamello chokꞌara omeX. Ma eujã jõtꞌaajida audú chokꞌara chedapꞌedaa perã. Sisiirã chokꞌaraarãpa tachi ne–uu jõtꞌaapatakꞌa kꞌokꞌoo chedakꞌãri, mãga pɨkꞌa mãɨrã chokꞌara chejida ãchi camelloorã ome XpꞌanajidaX. 6Ma Madián pidaarã kꞌaurepa israelitaarã chupɨria chitoonajida. Maperã waa chooda–e pakꞌãri, Tachi Akꞌõremaa chupɨria iidijida ãchi kꞌaripamerã.

7Mãgá israelitaarãpa chupɨria iididakꞌãri, Tachi Akꞌõrepa ãchi uchiapimerã Madián pidaarã jua ekꞌariipa, 8irua ichi pedee jarapari ãchimaa pëiji. Mãgɨpa mãgaji: “Israelitaarã Akꞌõre Waibɨapa nãga jara bɨda aji: ‘Mɨa parã Egipto eujãdeepa uchiapiji; parã esclavoorã pꞌanapatapꞌedaamãiipa. 9Mamĩda mɨa Egipto pidaarã juadeepapai uchiapi–e paji. Ichiaba uchiapiji parã kꞌĩra unuamaa iru pꞌanadapꞌedaarã juadeepa. Mãɨrã parã naa jërekꞌooji, parãpa ãchi eujã atadamerã. 10Maapai mɨa parãmaa jaraji: Mɨta parã Akꞌõre Waibɨa. Parã amorreorã eujãde pꞌanapata mĩda, ãchi akꞌõre waibɨa apataarã waaweenáatɨ. Mamĩda parãpa mɨ pedee ũri kꞌiniada–e pajida’ ” aji.

11Mãpai Tachi Akꞌõre ángel+ ɨtꞌariipa cheji mãikꞌaapa su–akꞌɨ banaji encina pakꞌuru jua ekꞌari Ofra pꞌuuru kꞌaitꞌa. Ma pakꞌuru chipari Joás paji. Iru Abiezer te pidaarãdeepa uchiada paji. Joás warra Gedeonpa trigo tau ãyaa pꞌemaa baji chi edeepa. Madián pidaarã waidoopa merã mãga oomaa baji uva piarsĩpatamãi vino oodakꞌãri.

12Mãga oomaa bɨde Tachi Akꞌõre ángel arii panaji mãikꞌaapa mãgaji:

—¡Tachi Akꞌõre pɨ ome bapari! ¡Mapa pɨ juataura, sõcharra bapari!

13Gedeonpa pꞌanauji:

—Mamĩda Señor, Tachi Akꞌõre tai ome bapari pɨrã, ¿sãapꞌeda tai audú chupɨria chitoonɨma? aji. ¿Sãa irua oo–ema aji, ne–inaa eperãarãpa pꞌoyaa oodakꞌaa ãchi juadoopa? Tai chonaarãpa nepɨrɨpata irua mãga ooji ãchi Egipto eujãdeepa uchia atakꞌãri. Mamĩda irua taita atabaibëiji Madián pidaarã juade baaidamerã.

14Tachi Akꞌõrepa irumaa akꞌɨpꞌeda, mãgaji:

—Pɨ juataura bapari perã wãpáde aji, israelitaarã kꞌaripade Madián pidaarã jua ekꞌariipa. Mɨata pɨ pëiru.

15Gedeonpa pꞌanauji:

—Mamĩda Señor, mɨ chupɨria kꞌawaapáde aji. ¿Sãgá mɨa israelitaarã kꞌaripaima? Mɨchideerã jõmaweda Manasedeepa uchiadapꞌedaarã kꞌãyaara ekꞌariara pꞌanɨ, chupɨriara pꞌanadairã. Ma awara mɨ mɨchi te pidaarã jõmaarã kꞌãyaara ekꞌariara bɨ.

16Mãpai Tachi Akꞌõrepa mãgaji:

—Pɨa ooipɨ mɨa jara bɨkꞌa mɨ pɨ ome baitꞌeeda perã. Madián pidaarã pꞌoyaayada aji, eperã apai pꞌoyaakꞌajikꞌa.

17Mãpai Gedeonpa mãgaji:

—Wãara pɨ mɨ ome baitꞌee pɨrã, mɨmaa akꞌɨpíji pɨ wãara Tachi Waibɨa. 18Nama nɨ béeji mɨa pɨ–itꞌee primicia atanaru misa.

Tachi Akꞌõrepa mãgaji:

—Nama nɨ baitꞌeepɨ pɨ cheru misa.

19Mãpai Gedeón wãji chivo chakꞌe atade. Peepꞌeda chuu nɨ̃bɨji. Harina waibɨa atapꞌeda, pan levadura wẽe ooji. Ma nechiara kꞌoraade pꞌe atapꞌeda pan ome, nẽba paara kꞌuurude ateeji. Ma jõmaweda ateeji ma encina pakꞌuru badamãi ma angelmaa teeitꞌee. 20Mãpai Tachi Akꞌõre angelpa jaraji ma nechiara pan levadura wẽe ome mãu ɨ̃rɨ pꞌe bɨmerã mãikꞌaapa chi nẽba aɨ ɨ̃rɨ weemerã. Gedeonpa mãga ooji. 21Ma angelpa ma nechiara pan ome pakꞌurupa tꞌõbaikꞌãri, ma mãudeepa tꞌɨpɨtau uchiaji. Mãgá ma nechiara pan ome paa jõdachi. Aramata Tachi akꞌõre ángel wẽpadachi. 22Gedeonpa kꞌawakꞌãri mãgɨ́ Tachi Akꞌõre angelta pada, mãgaji:

—¡Aai Tachi Akꞌõre, mɨ pɨ ángel ome kꞌĩrapite pedee bajida! aji.

23Mamĩda Tachi Akꞌõrepa pꞌanauji:

—Waaweenaapáde aji, pɨ piu–e paitꞌee perã. Kꞌãiwee beepáde aji.

24Mãpai Gedeonpa mama Tachi Akꞌõre–itꞌee altar ooji. Tꞌɨ̃ bɨji: “Tachi Akꞌõrepa eperãarã kꞌãiwee pꞌanapipari.” Ma altar atꞌãri bɨ Ofra pꞌuurude, Abiezerdeepa uchiadapꞌedaarã pꞌanapatamãi.

25Ma ewate pꞌãrikꞌua Tachi Akꞌõrepa Gedeonmaa mãgaji:

—Pɨ akꞌõrepa pꞌakꞌa iru bɨdepema pꞌakꞌa ɨmɨkꞌĩra omeedepema chi siete año iru bɨta atanapáde aji. Ãrikꞌóoji altar pɨ akꞌõrepa iru bɨ na eujãdepemaarã akꞌõre waibɨa apata Baal–itꞌee. Ichiaba ma altar ikꞌaawa pakꞌuru awara bɨda Baal–itꞌee tꞌupeetꞌáaji. 26Jõdee mama ee nokꞌode pɨ Akꞌõre Waibɨa–itꞌee altar óoji. Maapꞌeda ma pꞌakꞌa ɨmɨkꞌĩra peepꞌeda, paa jṍji ma altar ɨ̃rɨ. Ma pakꞌuru tꞌupeeda púuji tꞌɨpɨtau–itꞌee.

27Mãpai Gedeonpa mimiapataarã diez pꞌe ataji mãikꞌaapa jõmaweda ooji Tachi Akꞌõrepa jaradakꞌa. Mamĩda ãstaawa mãga oo–e paji. Pꞌãrikꞌuata ooji chi akꞌõre, ichi te pidaarã awaraarã, pꞌuurudepema ɨmɨkꞌĩraarã waidoopa. 28Aɨ norema ma pꞌuurudepemaarã pꞌirabaidakꞌãri, unujida ma altar Baal–itꞌee ooda ãri jẽra bɨ mãikꞌaapa pakꞌuru ma ikꞌaawa bada tꞌupee jẽra bɨ. Ma awara unujida altar chiwidi pꞌakꞌa ɨmɨkꞌĩra paa jõda ome. 29Mãga unudakꞌãri, iidi para beeji: “¿Kꞌáipata nãga oojima?” ajida.

Jɨrɨnadakꞌãri mãikꞌaapa iididakꞌãri, kꞌawa atajida Joás warra Gedeónpata ooda. Mapa Joamaa jaranajida.

30—¡Pɨchi warra atanapáde ajida, iru peedaitꞌee perã! ¡Ichiata Baal altar ãrikꞌooji mãikꞌaapa ma pakꞌuru awara bɨda Baal–itꞌee tꞌupeeji!

31Mamĩda Joapa pꞌanauji arii pꞌanadapꞌedaarãmaa:

—¿Parã Baal pari chõodaitꞌeekꞌã? aji. ¡Akꞌõrejĩru uchiai naaweda piu baibeepáde aji, chi Baal pari chõo kꞌinia bɨ! Baal wãara Akꞌõre Waibɨa pɨrã, ichiakꞌau bɨ́tɨ ichi itu chõomerã. ¿Ma altar ãridaida irude paji–ekꞌã? aji.

32Maadamãiipa Gedeón tꞌɨ̃jarapachida Jerobaal.+ Mãpai mama pꞌanadapꞌedaarãpa mãgajida: “Baal ichi itu chõoyada” ajida, mãgá Gedeonpa Baal altar ãrikꞌooda perã.

33Maapai Madián pidaarã, amalecitaarã, oriente eerepemaarã ome Jordán to sĩajida tꞌĩudaitꞌee israelitaarã eujãde Jezrel eujã jewedaade. 34Mamĩda Tachi Akꞌõrepa ichi Jaure pëiji Gedeonmaa. Mapa irua oveja ɨmɨkꞌĩra cacho golpe chaaji Abiezerdeepa uchiadapꞌedaarã chedamerã. 35Ma awara jara pëiji Manasedeepa uchiadapꞌedaarãmaa, Aserdeepa uchiadapꞌedaarãmaa, Zabulondeepa uchiadapꞌedaarãmaa mãikꞌaapa Neftalideepa uchiadapꞌedaarãmaa pëidamerã soldaorã ichi kꞌaripade. Mãgá ãrapa iru kꞌaripa chejida.

36Mãpai Gedeonpa Tachi Akꞌõremaa nãga ɨtꞌaa tꞌɨ̃ji: “Wãara pɨa jaradakꞌa mɨ kꞌapꞌɨa israelitaarã kꞌaripaitꞌee pɨrã, mɨmaa nãga akꞌɨpipáde aji. 37Mɨa oveja e bɨitꞌee trigo tau ãyaa bɨpatamãi chi edeepa. Nu tapꞌedaweda na oveja e beekꞌee bɨ pɨrã, eujã aɨ ikꞌaawa pꞌoo bɨ mĩda, mãgara mɨa kꞌawaitꞌee wãara pɨa jaradakꞌa mɨ kꞌapꞌɨa israelitaarã kꞌaripaitꞌee.”

38Mãga paji. Gedeón pꞌirabaikꞌãri mãikꞌaapa ma oveja e akꞌɨnakꞌãri, beekꞌee baji. Pꞌuyakꞌãri, vaso aba ipuru ataji ma pꞌãrikꞌua baaida paniapa. 39Mãga paji mĩda, Gedeonpa pia ijãa–e paji Tachi Akꞌõrepa jarada. Mapa Tachi Akꞌõremaa mãgaji: “Mɨ ome kꞌĩraunaapáde aji, mɨa waya iidiru pɨrã. Mamĩda mɨa kꞌinia bɨ pɨa waya ne–inaa akꞌɨpimerã mɨmaa. Ma tꞌẽepai waa iidi–e paitꞌee. Ɨ̃rá kꞌinia bɨ ma oveja e pꞌoo beemerã, pꞌãrikꞌua baaida paniapa eujã beekꞌee bɨ mĩda.”

40Tachi Akꞌõrepa mãga ooji. Aɨ norema ma oveja e pꞌoo baji. Mamĩda eujã aɨ ikꞌaawa beekꞌee jẽra baji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index