Search form

Jueces 7

Gedeonpa Madiandepemaarã pꞌoyaada

1Aɨ norema ɨ̃datɨpodopa Gedeón, ichiaba tꞌɨ̃jarapatapꞌedaa Jerobaal, ichi eere pꞌanadapꞌedaarã ome wãjida pania poátrɨ uchia bɨ Jarod apatapꞌedaamaa. Mama kꞌãijida. Madián pidaarã aɨ wãteikꞌa eere pꞌanajida eujã jewedaade, Moré ee kꞌarraya.

2israelitaarã mama pꞌanɨde Tachi Akꞌõrepa Gedeonmaa mãgaji: “Pɨa soldaorã audú chokꞌara pꞌe iru bɨda aji. Parã Madián pidaarã ome chõonadapꞌeda, pꞌoyaadakꞌãri, audua pꞌaneedariitꞌee, pãchi juadoopa pꞌoyaajida jĩakꞌaapa. 3Mapa soldaorãmaa nãga jaranáji: ‘Chi waawee–idaa bɨ wãipia bɨ ichi temaa.’ ”

Gedeonpa mãga ooji. Veintidós mil ãpɨtee wãjida ãchi temaa. Diez mil soldaorã pꞌaneejida. 4Mamĩda Tachi Akꞌõrepa Gedeonmaa mãgaji: “Atꞌãri audú chokꞌara pꞌanɨ. Ãra ateepáde aji, pania poátrɨ uchia bɨmaa pania tode. Mama mɨa pɨmaa kꞌawapiitꞌeeda aji, chisãgɨɨrãta pɨ ome wãdaipia bɨ chõode.”

5Gedeonpa mãga ooji. Ma pania paraa bɨmãi pꞌanɨde Tachi Akꞌõrepa mãgaji: “Awara bɨpáde aji, chi juade pania torutaarã usapa seneparikꞌa. Ichiaba awara bɨpáde aji chi bedabairutaarã itꞌaipa todaitꞌee.”

6Tonadakꞌãri, ɨmɨkꞌĩraarã trescientos juade tojida usapa seneparikꞌa. Apemaarã bedabaidapꞌeda, itꞌaipa tojida. 7Mãpai Tachi Akꞌõrepa Gedeonmaa mãgaji: “Jã ɨmɨkꞌĩraarã trescientos ome mɨa israelitaarã kꞌaripaitꞌee pɨ kꞌapꞌɨa. Madián pidaarã parãmaa jõpiitꞌee. Apemaarã soldaorã pëipáde aji, ãchi temaa.”

8Gedeonpa mãga ooji. Mamĩda ma soldaorã pëi naaweda, Gedeonpa pꞌe ataji ãchi chokꞌo, pꞌakꞌa cacho jĩwaapata ome. Gedeón beeji Akꞌõrepa jɨrɨtꞌerada trescientos soldaorã ome aupai. Ee bide ãchi kꞌãipata oojida. Jõdee ma Madián pidaarã eujã jewedaade ãra edaikꞌa eere pꞌanajida.

9Ma ewate pꞌãrikꞌua Tachi Akꞌõrepa Gedeonmaa mãgaji: “Pꞌirabaidapáde aji, mãikꞌaapa wãdapáde aji, jã Madián pidaarã ome chõode. Mɨa parãmaa ãchi pꞌoyaapiitꞌee. 10Waawee bɨ pɨrã ãra ome chõonaitꞌee, wãpáde aji, ãchi pꞌanɨmãi pɨ mimiapari Furá ome. 11Ãchia jara pꞌanɨ ũridapáde aji. Mãgá pɨ ãra ome chõo kꞌinia baitꞌee.”

Mãpai Gedeón wãji ichi mimiapari Furá ome. Panajida Madiandepema soldaorã pꞌanadapꞌedaa kꞌaitꞌa, jɨ̃apataarã pꞌanadapꞌedaamãi. 12Madián pidaarã, amalecitaarã, oriente eere pꞌanapatapꞌedaarã awara–awaraa pꞌanajida ma eujã jewedaade. Cho–kꞌara pꞌanajida sisiirã cho–kꞌara chepatakꞌa tachi ne–uu kꞌo chedakꞌãri. Camello audú chokꞌara iru pꞌanajida, ipu tau nãusaa pꞌusa ide paraaparikꞌa. 13Gedeón mãɨrã kꞌaitꞌa panakꞌãri, ũriji soldaorã pedee para bɨ. Abaapa awaraamaa ichia kꞌãimokꞌaraada nepɨrɨmaa baji. Mãgaji:

—Kꞌãimokꞌaraajida aji, pan cebadadee ooda ee bideepa namaa pɨrabai cheru. Pachekꞌãri te ne–edee oodamãi, ma te tꞌeetꞌaajida aji.

14Mãpai chi kꞌõpꞌãyopa mãgaji:

—Jãgɨ́ kꞌãimokꞌaraada jara kꞌinia bɨda aji, Israelita Joás warra Gedeón cheru tachi jõtꞌaade. Tachi Akꞌõrepa tachi Madián pidaarã tachi ome nipapataarã paara Gedeonmaa pꞌoyaapiitꞌeeda aji.

15Gedeonpa mãga ũrikꞌãri, o–ĩapa ɨtꞌaa tꞌɨ̃ji gracias jaraitꞌee Tachi Akꞌõremaa. Maapꞌeda wãji israelitaarã pꞌanadapꞌedaamaa mãikꞌaapa mãgaji:

—¡Pꞌirabáitɨ! Wãdáma aji, Madián pidaarãmaa Tachi Akꞌõrepa tachimaa ãra pꞌoyaapiitꞌee perã.

16Aramata ma soldaorã trescientos tꞌooma õpeede tꞌooji. Mãpai ãra chaachaa teeji pꞌakꞌa cacho chokꞌo ome. Ma chokꞌo chaa edajãde ĩpirã iru baji. 17Mãpai mãgaji:

—Mɨ panakꞌãri tachi kꞌĩra unuamaa iru pꞌanapataarã pꞌanapata kꞌĩraikꞌa eere, mɨmaa akꞌɨdapáde mãikꞌaapa mɨa oorukꞌa oodapáde aji. 18Mɨ ome wãrutaarãpa pꞌakꞌa cacho chaadakꞌãri, parãde aukꞌa chaadapáde aji. Mãɨmisa nãga golpe biadapáde aji: ‘¡Chõodáma Tachi Akꞌõre pari mãikꞌaapa Gedeón pari!’

19Mãga jarapꞌeda, Gedeón ichi soldaorã cien ome wãjida Madián pidaarã pꞌanadapꞌedaa kꞌĩraikꞌa eeree. Esapɨte pakꞌãri, Madián pidaarã jɨ̃apataarã tꞌerabaipata hora pakꞌãri, Gedeón ome pꞌanadapꞌedaarãpa pꞌakꞌa cacho chaajida mãikꞌaapa ma chokꞌo juade anipapata ãrikꞌoojida. 20Ma tꞌooma õpeerãpa aukꞌa pꞌakꞌa cacho chaajida mãikꞌaapa aukꞌa chokꞌo ãrikꞌoojida. Juabipa ĩpirã kꞌoo ateejida. Jõdee juarapa pꞌakꞌa cacho ateejida. Golpe biapachda: “¡Chõodáma! ¡Chõodáma Tachi Akꞌõre pari mãikꞌaapa Gedeón pari!” 21israelitaarã kꞌãiwee pꞌaneejida ma Madián pidaarã wapꞌɨra iru pꞌanadapꞌedaamãi. Mãga nɨde Madián pidaarã pꞌerakꞌoodachida mãikꞌaapa jĩchoodachida. 22Ma trescientos israelitaarãpa pꞌakꞌa cacho chaa jõnɨ misa, Tachi Akꞌõrepa Madián pidaarã ãchi pitapai chõo para beepiji. Jĩchoo wãjida Bet Sitá parumaa. Zeradeepa uchiada ode wãjida Abel Mejolá eujã i parumaa, Tabat punto ikꞌaawa.

23Mãpai Gedeonpa jara pëiji Neftalideepa uchiadapꞌedaarã, Aserdeepa uchiadapꞌedaarã mãikꞌaapa Manasedeepa uchiadapꞌedaarã soldaorãmaa, ma Madián pidaarã tꞌẽe wãdamerã peede. 24Ichiaba jara pëiji Efraindeepa uchiadapꞌedaarã soldaorãmaa uchia chedamerã ee jẽra bɨdeepa aukꞌa chõode ma Madián pidaarã ome mãikꞌaapa ãra nɨdamerã Jordán to sĩapata bɨmãi, ãra padai naaweda. Mãga oojida. 25Ãrapa Madiandepema poro waibɨarã omé jita atajida. Mãgɨɨrã tꞌɨ̃jarapachida Oreb mãikꞌaapa Zeb. Oreb peejida peña badamãi. Mapa mama Peña de Oreb apata. Zeb peejida uva piartꞌɨpatamãi. Mapa mama Zeb apata. Madián pidaarã jërekꞌoodapꞌeda, Oreb mãikꞌaapa Zeb poro tꞌɨapꞌedapꞌedaa ateejida Gedeón Jordán to kꞌĩraikꞌa eere badamaa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index