Search form

Jueces 9

Abimélec israelitaarã poro waibɨa pada

1Gedeón, ichiaba tꞌɨ̃jarapatapꞌedaa Jerobaal jai–idaada tꞌẽepai, chi warra Abimélec Siquén pꞌuurudee wãji chi nawe bapatamaa pedeede chi nawe ëreerã ome. Mãgaji:

2—Parã mɨ ëreerã perã, chupɨria iidi kꞌinia bɨ pedeedamerã na Siquendepemaarã ome mɨ pari. Pia–e bɨda aji, Jerobaal warrarã setenta parã poro waibɨarã pꞌanadamerã. Piara bɨda aji, poro waibɨa a–pai iru pꞌanapataadaitꞌee.

3Abimélec ãchi ëreerãdepema pada perã, iru eere tꞌĩujida mãikꞌaapa Siquén pꞌuuru pidaarãmaa mãga jaranajida. 4Ma awara pꞌaratꞌa tau setenta atadapꞌeda ãchi akꞌõre waibɨa Baal Berit tedepema, Abimelecmaa teejida. Ma pꞌaratꞌapa irua jɨrɨji chĩara peepataarã ichi ome nipapataadamerã. 5Mãpai mãɨrã ome Ofra pꞌuurudee wãji. Mãgɨ́ pꞌuuru chi akꞌõre bapariida pꞌuuru paji. Mama Abimelecpa ma chĩara peepataarã ome Jerobaal warrarã setenta peekꞌoojida mãu choma bɨmãi. Aba chi tꞌẽepema Jotanta chokꞌai uchiaji mirudaida perã. 6Maapꞌeda Siquén pꞌuurudepemaarã Bet Miló pꞌuurudepemaarã ome Siquendee chedapꞌeda, encina pakꞌuru bɨmãi chipꞌedachida, mãu awara bɨda ãchi akꞌõre waibɨa apata–itꞌee ikꞌaawa. Mama pꞌanɨde Abimélec ãchi rey bɨjida.

7Jotanpa mãga kꞌawa atakꞌãri, Guerizín ee bidee wãji. Mamãikꞌaapa golpe biaji ma see jõnadaarãpa ichi pedee ũridamerã. Mãgaji:

“¡Pia ũrítɨ Siquén pidaarã! Mãgara Tachi Akꞌõrepa parã pedee ũriyada aji.

8“Ewari aba pakꞌuruurã seedachida rey bɨ kꞌinia pꞌanadapꞌedaa perã. Maperã iidijida olivo pakꞌurumaa iru ãchi rey beemerã. 9Mamĩda irua kꞌinia–e paji, ãchi rey beeda paara eperãarãpa ichi nejõdeepa waa aceite atada–e pakꞌajida perã. Ma aceite tee kꞌinia baji eperãarã kꞌaripaitꞌee mãikꞌaapa ãrapa primiciakꞌa teedamerã Tachi Akꞌõremaa.

10“Mãpai ma pakꞌuru see jõnadapꞌedaarãpa higueramaa iidijida ãchi rey beemerã. 11Mamĩda ma higuerapa kꞌinia–e paji, ãchi rey beeda paara eperãarãpa ichi higojõ kꞌũ–ũa waa kꞌoda–e pakꞌajida perã.

12“Mãpai ma pakꞌuru see jõnadapꞌedaarãpa uva kꞌarramaa iidijida ãchi rey pamerã. 13Mamĩda ma uva kꞌarrapa kꞌinia–e paji, ãchi rey beeda paara ichi nejõdee eperãarãpa vino waa ooda–e pakꞌaji perã mãikꞌaapa ma vino kꞌaurepa eperãarã Tachi Akꞌõre ome o–ĩadaipata perã.

14“Mãpai ma pakꞌuru see jõnadapꞌedaarãpa pakꞌuru ne–ɨɨrɨ–idaamaa iidijida ãchi rey pamerã. 15Ma pakꞌuru ne–ɨɨrɨ–idaa bɨpa ijãaji. Maapꞌeda mãgaji: “Parãpa wãara kꞌinia pꞌanɨ pɨrã mɨ para rey beemerã, parã jõmaweda mɨ jua ekꞌari pꞌaneedaipia bɨda” aji. “Mamĩda mɨ kꞌiniada–e pꞌanɨ pɨrã, mɨdeepa tꞌɨpɨtau uchiaitꞌeeda aji, parã, Libanodepema pakꞌuru paara paa jõtꞌaaitꞌee.”

16Mãga nepɨrɨpꞌeda, Jotanpa mãgaji: “Ɨ̃rá mɨa parãmaa ne–inaa iidi kꞌinia bɨ. ¿Pia oojidakꞌã aji, Abimélec rey papidakꞌãri? ¿Pia oojidakꞌã Jerobaal ëreerã ome, irua pia ooda pari parã kꞌaripakꞌãri? 17Mɨ akꞌõre piukꞌaji para Madián pidaarã juadeepa kꞌaripa bɨ misa. Mamĩda kꞌaripa kꞌinia baji. 18Ma ooda pari parãpa iru ëreerãmaa ne–inaa pia oodai kꞌãyaara, kꞌachiata oojida. Iru warrarã setenta peepikꞌoojida mãu choma bɨmãi. Ma awara Abimélec pãchi rey papijida, iru Jerobaal wẽra kꞌãiparideepa uchiada mĩda. Mãga oojida Abimélec pãchi ëreerã perã chi nawe eereepa. 19Mamĩda mɨa parãmaa nãga jara kꞌinia bɨ. Parãpa Jerobaal ëreerãmaa ne–inaa pia oojida pɨrã Abimélec pãchi rey papidakꞌãri, mãgara iru ome pia pꞌanapatáatɨ. 20Mamĩda Jerobaal ëreerãmaa pia ooda–e paji pɨrã, mãgara Abimelecpa parã Siquendepemaarã Bet Milodepemaarã ome jõpiipia bɨ, tꞌɨpɨtaupa ne–inaa paa jõparikꞌa. Ichiaba parãpa iru aukꞌa jõpidaipia bɨ.

21Mãga jarapꞌeda, Jotán jirabodoji. Ber pꞌuurude banaji, chi ɨ̃pema Abimélec waawee bada perã.

22Israelitaarã Abimélec jua ekꞌari pꞌanapachida año õpee wãyaaru misa. 23Mamĩda Tachi Akꞌõrepa Siquén pꞌuurudepemaarã tꞌãri kꞌachia papiji Abimélec ome, iru jua ekꞌari waa pꞌana kꞌinianaadamerã. 24Mãga ooji Abimelecpa Jerobaal warrarã setenta peepida kꞌaurepa mãikꞌaapa ma Siquendepemaarãpa iru kꞌaripadapꞌedaa kꞌaurepa. 25Abimélec jua ekꞌari pꞌana kꞌiniada–ee pꞌanadapꞌedaa perã, Siquendepemaarã ũkꞌuru mẽe mirupachida chi ode wãyaarutaarã netꞌaa chɨa atadaitꞌee, eperãarãpa iru poro waibɨa kꞌachia adamerã. Mamĩda Abimelecpa kꞌawa ataji.

26Ewari aba Ébed warra Gaal ba cheji Siquén pꞌuurude ichi ɨ̃pemaarã ome. Ma pꞌuurudepemaarã kꞌũra ataji ichi pipɨara akꞌɨdamerã ãchi poro waibɨa kꞌãyaara. 27Ma pꞌuurudepemaarã ãchi uva kꞌãidee wãjida uva pꞌede vino oodaitꞌee fiesta waibɨa oo kꞌinia pꞌanadapꞌedaa perã ma eperã Gaal–itꞌee. Ãchi akꞌõre waibɨa apata tede nekꞌomaa pꞌanɨde mãikꞌaapa tomaa pꞌanɨde, Abimélec ãpɨte ikꞌachia pedee pꞌaneejida. 28Mãga nɨde Gaalpa mãgaji: “¿Kꞌaima aji, Abimélec tachi poro waibɨa pamerã ichi kꞌaripapari Zebul ome? ¿Jã Abimélec Jerobaal wẽra kꞌãiparideepa uchiada–ekꞌã? aji. ¿Sãapꞌeda tachi Siquén pꞌuurudepemaarã esclavoorãkꞌa pꞌanapatama ãra jua ekꞌari? Jã Abimélec jua ekꞌari pꞌanapataadai kꞌãyaara pꞌanapataadaipia bɨ tachi pꞌuuru ooda Jamordeepa uchiadapꞌedaarã jua ekꞌari. 29¡Mɨta parã poro waibɨa pada paara, jã Abimélec jua ekꞌariipa uchiakꞌaji!” Mãpai mãgaji: “Abimélec, ¡pɨchi soldaorã pꞌe atáji mãikꞌaapa tai ome chõo chéji!”

30Siquén pꞌuurudepemaarã poro waibɨa Zebulpa kꞌawa atakꞌãri Gaalpa mãga jara ni, audú kꞌĩraudachi. 31Abimélec Aruma pꞌuurude bada perã Zebulpa irumaa nãga jara pëiji: “Ébed warra Gaal ichi ɨ̃pemaarã ome nama pꞌanɨda aji. Na pꞌuurudepemaarã kꞌũra wãda pɨ jua ekꞌari waa pꞌananaadamerã. 32Mapa pɨchi soldaorã pꞌe atapꞌeda, pꞌãrikꞌua chétɨ mãikꞌaapa pꞌuuru kꞌaitꞌa miru pꞌanéetɨ. 33Tapꞌeda pakꞌãri, akꞌõrejĩru uchiakꞌãri, na pꞌuurudepemaarã ome chõo chétɨ. Jã Gaal ichi eere pꞌanɨɨrã ome chõode uchiadakꞌãri, ãra ome pɨchia oo kꞌiniata óoji.”

34Mãgá Abimélec ichi soldaorã ome pꞌãrikꞌua uchiadapꞌeda, Siquén pꞌuuru kꞌaitꞌa miru pꞌana chejida. Tꞌooma kꞌĩmariide tꞌoojida. 35Gaal ma pꞌuuru tꞌĩupatadeepa uchiakꞌãri ichi eere pꞌanadapꞌedaarã ome, Abimélec ichi eere pꞌanadapꞌedaarã ome aukꞌa uchiajida ãchi mirudapꞌedaamãiipa. 36Mãɨrã unu atakꞌãri, Gaalpa Zebulmaa mãgaji:

—¡Akꞌɨpáde! aji. ¡Soldaorã eedeepa namaa cheruta!

Mamĩda Zebulpa mãgaji:

—Mãga–eda aji. Pɨa ma ee jaureta eperãarãkꞌa unu bɨda aji.

37Mamĩda Gaalpa mãgaji:

—¡Kꞌomoo apata eujãdeepa ichiaba uchia cherutada aji, mãikꞌaapa awaraarã cheruta ne–inaa pꞌasapari jarapataarã pakꞌuru apatadeepa!

38Mãpai Zebulpa mãgaji:

—¡Ɨ̃rara sí pedeepáde aji, pedee–idaa bɨ! ¡Pɨata jaraji tachi Abimélec jua ekꞌari pꞌanapataadaikꞌaraa bɨ iru esclavoorãkꞌa! ¡Jãma cheruta soldaorã pɨa ekꞌariara pꞌanɨda adaarã! ¡Ãchi ome chõonáji!

39Mãpai Gaal Siquén pidaarã ichi eere pꞌanadapꞌedaarã ome uchiaji chõode Abimélec eere pꞌanadapꞌedaarã ome. 40Mamĩda Abimelecpa Gaal tꞌẽe wãkꞌãri, iru jirabodoji. Ma pꞌuurudepema puerta tꞌaide eperãarã chokꞌara piujida ma chõodapꞌedaa kꞌaurepa. 41Tꞌẽepai Abimélec waya banaji Aruma pꞌuurude. Mãpai Zebulpa Siquén pꞌuurudeepa Gaal ichi ɨ̃pemaarã ome jërekꞌooji.

42Aɨ norema Siquén pꞌuurudepemaarã ũkꞌuru uchiajida pꞌuurudeepa taawa ãchi ne–uu kꞌãide mimiade. Abimelecpa mãga kꞌawa atakꞌãri, 43ichi soldaorã tꞌooma õpeede tꞌooji mãikꞌaapa mãɨrã miru pꞌaneejida pꞌuuru pidaarã wãyaapata ode. Mama ma pꞌuurudepemaarã ome chõojida. 44Abimelecpa ichi ome nipadapꞌedaarã ome pꞌuurudepema puerta jɨ̃anajida apemaarãpa ma pꞌuurudepemaarã taawa pꞌanadapꞌedaarã peekꞌooruta misa. 45Ma ewate Abimélec ichi eere pꞌanadapꞌedaarã ome chõomaa pꞌaneejida Siquendepemaarã ome mãikꞌaapa ãra pꞌoyaajida. Pꞌuurude pꞌanadapꞌedaarã paara peekꞌoojida mãikꞌaapa ma pꞌuuru jõtꞌaajida. Tꞌẽepai tꞌã pꞌojida ma pꞌuurude mama ne–inaa apida tꞌononaamerã.

46Migdal Siquén pꞌuurudepemaarãpa kꞌawa atadakꞌãri Abimelecpa ooda Siquende, ãchi mirunajida ãchi akꞌõre waibɨa El Berit te waibɨa murallapa tꞌɨakꞌau badade. 47Mamĩda Abimelecpa kꞌawaakꞌãri ãchi jõmaweda mama see jõnɨ, 48wãji ichi eere pꞌanadapꞌedaarã ome. Zalmón eedee. Mama panadakꞌãri, Abimelecpa pakꞌuru jua chaarapa tꞌɨapꞌe atapꞌeda ichi ikꞌiade jira ataji mãikꞌaapa jaraji ichi ome nipadapꞌedaarãmaa aukꞌa oodamerã. 49Pakꞌuru jua chokꞌara tꞌɨapꞌe atadapꞌeda, Abimélec tꞌẽe wãjida ma pakꞌuru jua ome ãchi ikꞌiade. Ma te waibɨa murallapa tꞌɨakꞌau bɨmãi panadakꞌãri, ma pakꞌuru jua jõmaweda ma te ãukꞌidaa pꞌe nɨ̃bɨdapꞌeda, tꞌɨpɨtaupa kꞌoopatꞌaajida. Mãgá ma Migdal Siquén pꞌuurudepemaarã jõmaweda peekꞌoojida. Eperãarã mil paji, ɨmɨkꞌĩraarã, wẽraarã paara.

50Ma tꞌẽepai Abimélec wãji Tebes pꞌuurudee mãikꞌaapa ma pꞌuuru pidaarã ome chõopꞌeda, pꞌoyaaji. 51Ma pꞌuuru jãde torre baji. Aɨde pꞌuuru pidaarã jõmaweda mirunajida; ɨmɨkꞌĩraarã, wẽraarã paara. Ma torredepema puerta pia jɨ̃a nɨ̃bɨdapꞌeda, aɨde ɨtꞌaa wãjida mama Abimélec eere pꞌanadapꞌedaarãpa peekꞌooda–e pai jĩakꞌaapa. 52Mamĩda Abimelecpa ma torredepema puerta tꞌaide pakꞌãri, tꞌɨpɨtaupa kꞌoopatꞌaaitꞌee paji. 53Mãga nɨde wẽrapa kꞌũruma mãu ɨtꞌɨɨpa batꞌatꞌaakꞌãri, Abimélec poro ɨ̃rɨ baai cheji. Mãgá iru poro tꞌoopꞌedachi. 54Piu wãkꞌãri, Abimelecpa ichi arma anipapari tꞌɨ̃ji mãikꞌaapa mãgaji: “Pɨchi espada ẽtꞌa atapꞌeda, mɨ peetꞌaapáde aji. Kꞌinia–e bɨ jaradamerã wẽrapa mɨ peeji.” Mãpai chi mimiaparipa sutꞌaaji espadapa. Mãgá piuji. 55israelitaarãpa Abimélec piu baibɨ unudakꞌãri, ãchi te chaa wãjida.

56Mãgá Tachi Akꞌõrepa Abimelecmaa kꞌachia ooji irua chi akꞌõremaa kꞌachia ooda pari, iru warrarã setenta peekꞌookꞌãri. 57Tachi Akꞌõrepa ichiaba Siquén pꞌuurudepemaarãmaa kꞌachia ooji, ãchia kꞌachia oopatapꞌedaa pari. Irua mãga ookꞌãri, uchiaji Jerobaal warra Jotanpa pedee kꞌachia jaradakꞌa ãramaa, Abimelecmaa paara.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index