Search form

Rut 1

Belendepema eperã Moab eujãde banada

1-2Chonaarãweda, Tachi Akꞌõrepa poro waibɨa bɨda jua ekꞌari israelitaarã pꞌanapataadakꞌãri, ãchi eujãde jarrajara paraaji. Maperã Judá eujãdepema Elimélec uchiaji Belén pꞌuurudeepa mãikꞌaapa Moab eujãdee wãji. Ichi ome ateeji chi wẽra Noemí mãikꞌaapa chi warrarã omeeweda. Ãra tꞌɨ̃jarapachida Majlón mãikꞌaapa Quilión. Ãra jõmaweda efrateorã+ paji. Moab eujãde panadakꞌãri, mama pꞌaneejida.

3Mamĩda mama pꞌanɨde Noemí ɨmɨkꞌĩra, Elimélec jai–idaaji. Mãgá Noemí warrarã omé ome beeji. 4Ma warrarã kꞌũtrãa pꞌaneedakꞌãri, Moab eujãdepema wẽraarã ome miakꞌãijida. Aba tꞌɨ̃jarapachida Orfa; chi apema Rut. Mamĩda mama pꞌanɨde diez año wãyaakꞌãri, 5Majlón, Quilión ome jai–idaajida. Mãgá Noemí ituaba beeji; ɨmɨkꞌĩra wẽe, warra jida wẽe.

Noemí Rut ome Belén pꞌuurudee wãdapꞌedaa

6Ewari aba Noemipa ũriji Tachi Akꞌõrepa Israel eujãde pꞌanapatapꞌedaarã chupɨria kꞌawaada mãikꞌaapa ma jarrajara jõpida. Mama chikꞌo waya paraada perã, Noemí chi ãiguurã ome acomoraajida Judá eujãdee wãdaitꞌee. 7Uchiaji ichi bapariidamãiipa chi ãiguurã ome mãikꞌaapa wãjida Judá eujãdee wãpari ode. 8Mãgá ode wãdade Noemipa ãramaa mãgaji:

—Ãpɨtee wã́tɨ pãchi naweerã temaa. Mɨa ɨtꞌaa iidiitꞌee Tachi Akꞌõrepa parã pia akꞌɨ bapariimerã parãpa oopatapꞌedaakꞌa mɨ warra jai–idaadapꞌedaarã ome mãikꞌaapa mɨ ome. 9Ichiaba irumaa iidiitꞌeeda aji, parã waya miakꞌãipimerã mãikꞌaapa o–ĩa pꞌanapimerã.

Mãga jarapꞌeda, Noemipa ãra kꞌĩra ɨ̃ji mãikꞌaapa despediiji. Mãpai ãra jẽedachida 10mãikꞌaapa golpe mãgajida:

—¡Pɨ eujãdee pɨ ome aukꞌa wã kꞌinia pꞌanɨda! ajida.

11Mãpai Noemipa pꞌanauji:

—¡Kꞌaurã, pãchi temaa wã́tɨ! ¿Kꞌãare–itꞌee mɨ ome wãdaitꞌeema? ¿Mɨa waa warra tꞌoikꞌã parã ome miakꞌãidamerã? 12¡Kꞌaurã, pãchi temaa wã́tɨ! Mɨ audú chõtrãa kꞌɨrɨ waya miakꞌãiitꞌee. Mɨa mãga ooipia bada paara, idiweda miakꞌãikꞌaji mãikꞌaapa warra tꞌoda paara 13¿parãpa nɨkꞌajidakꞌã ma warrarã kꞌũtrãa parutamaa parã ome miakꞌãidamerã? ¿Mãga ooda paara, parã miakꞌãida–ee pꞌaneekꞌajidakꞌã? Mɨa mãga kꞌinia–epɨ. Tachi Akꞌõrepa mɨ miapi iru bɨ. Mɨa kꞌinia–e bɨ parã miadamerã mɨ mia nɨ̃bɨkꞌa.

14Mãga ũridakꞌãri, waya golpe jẽedachida. Maapꞌeda Orfapa chi pꞌãkꞌõre kꞌĩra ɨ̃ji mãikꞌaapa ãpɨtee wãji. Mamĩda Rut atꞌãri Noemí ome beeji.

15Mãpai Noemipa Rutmaa mãgaji:

—Akꞌɨ́ji. Pɨ ãyore wãruda aji, ichi aukꞌaarã pꞌanapatamaa mãikꞌaapa ãchi akꞌõre waibɨa apataarãmaa. Iru ome wãpáde aji.

16Mãpai Rutpa pꞌanauji:

—¡Waa jaranáaji mɨ ãpɨtee wãmerã mãikꞌaapa pɨ atabëimerã! Pɨ wãrumaa mɨ jida aukꞌa wãitꞌee. Pɨ banarumaa mɨ jida aukꞌa banaitꞌee. Pɨ aukꞌaarã mɨchi aukꞌaarã paitꞌee mãikꞌaapa pɨ Akꞌõre Waibɨa aukꞌa mɨ Akꞌõre Waibɨa paitꞌee. 17Pɨ jai–idaarumãi mɨ jida aukꞌa jai–idaaitꞌee. Mama mɨ ɨadaitꞌee. ¡Mɨ piu–emaa pɨ ikꞌaawaapa ãyaa wã–e. Pɨ ikꞌaawaapa wãru pɨrã, Tachi Akꞌõrepa mɨmaa ne–inaa kꞌachia ooipia bɨda! aji.

18Noemipa unukꞌãri Rut wãara wã kꞌinia bɨ, ichiakꞌau bɨji ichi ome wãmerã. 19Mãgá wãjida Judá eujãdee.

Belén pꞌuurude panadakꞌãri, pꞌuuru pidaarãpa akꞌɨtrua para beeji mãikꞌaapa wẽraarãpa iidi para beeji:

—¿Na Noemi–ekꞌã? ajida.

20Mãpai Noemipa pꞌanauji:

—Mɨmaa waa Noemí anáatɨ. Ma kꞌãyaara tꞌɨ̃jarapatáatɨ Mara,+ Tachi Akꞌõrepa mɨ tꞌãri ãriipida perã. 21Mɨ namãikꞌaapa uchiakꞌãri, ɨmɨkꞌĩra mãikꞌaapa warrarã iru baji. Mamĩda ɨ̃rá mɨ tuu cheru Tachi Akꞌõrepa mãga kꞌinia bairã. ¿Sãapꞌeda mɨmaa Noemí+ a pꞌanɨma aji, Tachi Akꞌõrepa mɨ nãga chupɨria iru bɨ?

22Mãgá paji Noemí Moab eujãdeepa cheda chi Moabdepema ãigu Rut ome. Belén pꞌuurude panadakꞌãri, ma eujãdepemaarãpa cebada+ ewamaa pꞌanajida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index