Search form

Rut 2

Rut Booz eujãde mimiada

1Mama Noemí ɨmɨkꞌĩra Elimélec ëreerãdepema bapachi. Mãgɨ́ tꞌɨ̃jarapachida Booz. Mãgɨ́ eperã pꞌaratꞌara bapachi mãikꞌaapa ichi aukꞌaarãpa iru tꞌo pꞌanapachida.

2Ewari aba Rutpa Noemimaa mãgaji:

—Mɨ ne–uu paraamaa wãpíji. Mãgá mɨa netꞌa tau ewapataarãmaa chupɨria iidii ãrapa netꞌa tau ewadapꞌedaadepema beeda mɨmaa pꞌepidamerã. (Levítico 19.9-10) Apida mɨ ome tꞌãri pia bɨ pɨrã, mɨmaa pꞌepiyada aji.

Mãpai Noemipa mãgaji:

—Kꞌau, wãpáde aji.

3Mãgá Rut Belén pꞌuurudeepa taawaa wãji cebada ewa pꞌanadapꞌedaamaa. Mama chi ewa pꞌanadapꞌedaarãmaa chupɨria iidipꞌeda, ãra tꞌẽe cebada beeda pꞌemaa beeji. Poro pia ma eujã Elimélec ëreerãdepema Booz eujã paji.

4Mãga bɨde Booz Belén pꞌuurudeepa pacheji mãikꞌaapa ma cebada ewa pꞌanadapꞌedaarãmaa mãgaji:

—¡Tachi Akꞌõrepa parã pia akꞌɨ bapáde! aji.

Ãrapa pꞌanaujida:

—¡Tachi Akꞌõrepa pɨ jida pia akꞌɨ bapáde! ajida.

5Maapꞌeda Boozpa ma cebada ewa pꞌanadapꞌedaarã poro waibɨamaa iidiji:

—Jã awẽra cebada beeda pꞌemaa bɨ, ¿kꞌai ëreerãdepemama? aji.

6Chi poro waibɨapa pꞌanauji:

—Jã wẽra Moab eujãdepema. Moab eujãdeepa cheji Noemí ome. 7Mɨmaa chupɨria iidiji cebada ewapataarã tꞌẽe wãpimerã chi beeda pꞌeitꞌee. Tapꞌewedakꞌaapa mimiamaa bɨda aji, makꞌɨara ɨ̃i–ee. Ɨ̃rapaita teedaa ɨ̃ide chejida aji.

8Mãpai Boozpa Rutmaa mãgaji:

—Wẽra, ũríji. Namãikꞌaapa awaraarã eujãdee wãnáaji netꞌa tau pꞌede. Wẽraarã mɨ–itꞌee mimiapataarã ome wã́ji 9mãikꞌaapa ãra cebada ewapataarã tꞌẽe wãrutamaa aukꞌa wã́ji. Ma cebada ewapataarãmaa mɨa jaraji pɨ ichiakꞌau bɨdamerã. Pɨ opisiadaikꞌãri, mɨ mimiapataarãpa chokꞌo ipurudapꞌedaadepema pania tonapáde aji.

10Mãga ũrikꞌãri, Rut Booz kꞌĩrapite bedabaidachi ichi tau bɨɨrɨ eujãde tꞌõbairumaa mãikꞌaapa irumaa iidiji:

—¿Sãapꞌeda pɨ mɨ ome audú tꞌãri pia bɨma aji, mɨ namapema–ee bɨta?

11Boozpa pꞌanauji:

—Eperãarãpa mɨmaa nepɨrɨjida pɨa pɨchi pꞌãkꞌõre pia akꞌɨ bapari pɨ ɨmɨkꞌĩra jai–idaadadeepa. Ichiaba nepɨrɨjida ma kꞌaurepa pɨchi akꞌõreerã mãikꞌaapa pɨchi eujã atabëida mãikꞌaapa na eperãarã pɨa kꞌawa–e bɨ tꞌãide ba cheda. 12¡Pɨa mãga ooda pari mɨa Tachi Akꞌõremaa iidi bɨ irua pɨ pia akꞌɨ bapariimerã! ¡Iidi bɨda aji, iru, israelitaarã Akꞌõre Waibɨapa pɨ kꞌaripamerã pɨa irumaa kꞌaripa iidida perã!

13Mãpai Rutpa mãgaji:

—Señor, pɨ audú tꞌãri pia bɨ mɨ ome, mɨ pɨ mimiapari–e mĩda. Pɨa pedee pia jarada kꞌaurepa mɨ tꞌãri o–ĩa beeruda aji.

14Nekꞌopata hora pakꞌãri, Boozpa Rutmaa mãgaji:

—Nama pan vinode sã atapꞌeda, kꞌóji.

Rut su–akꞌɨ beeji cebada ewapataarã ikꞌaawa. Mãpai Boozpa irumaa teeji cebada paada kꞌomerã. Bi jãwaarumaa kꞌoji mĩda, atꞌãri beeji.

15Tꞌẽepai Rut waya wãkꞌãri cebada baaida pꞌede, Boozpa ichi mimiapataarãmaa mãgaji:

—Jã wẽra ichiakꞌau bɨdapáde aji, irua cebada waibɨa pꞌemerã. Kꞌõrajɨ̃ma pꞌe bɨmãi paara pꞌepítɨ, ɨtrɨada–ee. 16Ma kꞌãyaara parãpa cebada tꞌɨapꞌe wãdakꞌãri, chi kꞌɨmɨ chakꞌeerã ũkꞌuru baaipidapáde aji, irua pꞌemerã. ¡Apidaapa iru ɨtrɨanaadapáde! aji.

17Kꞌewara parumaa Booz eujãde Rutpa ma cebada beeda pꞌeji. Maapꞌeda ichia ma cebada tau chi kꞌɨmɨ chakꞌeerãdeepa jonakꞌãri mãikꞌaapa chi e chakꞌeerã epꞌakꞌãri, veinte kilos apꞌeda waa uchiaji. 18Rutpa ma cebada pꞌuurudee ateeji mãikꞌaapa chi pꞌãkꞌõremaa akꞌɨpiji. Ma awara Boozpa chikꞌo teedadepema beeda ẽtꞌa ataji Noemimaa teeitꞌee.

19Mãpai Noemipa iidiji:

—¿Idi sãma netꞌa tau pꞌemaa bajima? aji. ¿Sãma mimia bajima? Waibɨa pꞌeji. ¡Tachi Akꞌõrepa pia akꞌɨ baipia bɨda aji, chi eperã pɨ nãgá kꞌaripada!

Mãpai Rutpa Noemimaa ichi pꞌasada nepɨrɨji:

—Mɨ mimia bada eujã chipari tꞌɨ̃jarapata Booz. Iruata mɨ kꞌaripajida aji.

20Mãpai Noemipa chi ãigumaa mãgaji:

—¡Tachi Akꞌõrepa iru pia akꞌɨ baipia bɨ! Tachi Akꞌõre tꞌãri pia bapari tachi ome mãikꞌaapa tachi ɨmɨkꞌĩraarã jai–idaadapꞌedaarã ome. Ma eperã mɨ ɨmɨkꞌĩra pada jai–idaada ome ëreerã. Mapa irua tachi pia akꞌɨ baipia bɨ.

21Mãpai Rutpa mãgaji:

—Irua jarajida aji, mɨ mimiamaa beemerã ichi mimiapataarã ome cebada ewa auparutamaa.

22Mãpai Noemipa pꞌanauji:

—Kꞌau, pia bɨ pɨ mama wẽraarã iru–itꞌee mimiapataarã ome mimiamerã. Mama apidaapa pɨmaa ne–inaa kꞌachia ooda–e. Mapa awara ãyaa wãnaapáde aji.

23Mãgá Rut Booz eujãde mimiamaa beeji wẽraarã Booz–itꞌee mimiapataarã ome. Mama mimiaji cebada maapꞌeda trigo ewa auparutamaa. Rut mãgá mimiamaa bɨ misa, Noemí ome bapachi.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index