Search form

Rut 3

Boozpa Rutmaa jarada

1Ewari aba Rut pꞌãkꞌõre Noemipa mãgaji:

—Kꞌau, mɨa pɨ–itꞌee ɨmɨkꞌĩra jɨrɨteeipia bɨ, mãgá pɨ tꞌãri o–ĩa bapariimerã. 2¿Pɨ ome mimiapataarã, ma wẽraarã chipari, Booz tachi ɨmɨkꞌĩraarã jai–idaadapꞌedaarã ome ëreerã–ekꞌã? Mɨa jararu pia ũríji. Idi pꞌãrikꞌua iru pꞌuurudeepa awara ãi wãitꞌee cebada tau chi kꞌɨmɨ chakꞌeerãdeepa jõnade mãikꞌaapa chi e epꞌade. 3Mapa pɨa nãga ooipia bɨ. Kꞌuipꞌeda, kꞌera pꞌuruipia bɨ mãikꞌaapa pꞌaru pi–iara bɨ jɨ̃ipia bɨ. Maapꞌeda wãipia bɨ Booz mimiamaa bɨmaa. Mamĩda unupiikꞌaraa bɨ, iru nekꞌoi naaweda mãikꞌaapa ne–inaa toi naaweda. 4Iru kꞌãide wãkꞌãri, pia akꞌɨ́ji sãma kꞌãiru. Mãpai iru jẽra beekꞌãri, iru poroba jira atapꞌeda, jẽra beepáde aji. Mãpai irua jarai pɨa kꞌãata ooipia bɨ.

5Rutpa pꞌanauji:

—Jõmaweda pɨa jara bɨkꞌa ooitꞌeeda aji.

6Maapꞌeda Rut wãji pꞌuurudeepa taawaa mãikꞌaapa jõma ooji chi pꞌãkꞌõrepa jaradakꞌa. 7Mãga bɨde Booz nekꞌopꞌeda mãikꞌaapa ne–inaa topꞌeda, tꞌãri o–ĩ–ĩa beeji. Maapꞌeda netꞌa tau pëi nɨ̃badamãi jẽra banaji. Tꞌẽepai Rut juajĩa wãpꞌeda, Booz poroba jira atapꞌeda, mama jẽra beeji. 8Esapɨte Booz ɨ̃rɨmadachi mãikꞌaapa tꞌerabaikꞌãri waya kꞌãiitꞌee, pꞌera pɨkꞌadachi wẽra unu atada perã ichi bɨɨrɨ ikꞌaawa.

Mapa mãgaji:

9—¿Pɨ, kꞌaima? aji.

Rutpa pꞌanauji:

—Mɨ Rut, pɨ mimiapari. Pɨ mɨ chãure pada ëreerã. Mapa pɨchi pꞌarupa mɨ poro bɨ́ji, mɨa kꞌinia bairã pɨa mɨ akꞌɨ bapariimerã.+

10Mãpai Boozpa mãgaji:

—¡Mɨa kꞌinia bɨ Tachi Akꞌõrepa pɨ bendiciamerã! Pɨa nãga ookꞌãri, akꞌɨpimaa bɨ wãara pɨ ɨmɨkꞌĩra piuda kꞌinia iru bada. Mɨ kꞌãyaara eperã kꞌũtrãara jɨrɨkꞌaji, pꞌaratꞌara bɨ maa–e pɨrã pꞌaratꞌa wẽe bɨ. Mamĩda mãga oo–e paji. 11Waaweenáaji. Mɨ pꞌuurudepemaarã jõmaarãpa kꞌawa pꞌanɨ pɨ wẽra tꞌãri pia bapari. Mapa mɨa ooitꞌee pɨa kꞌinia bɨkꞌa. 12Mamĩda naapɨara mɨa pɨmaa ne–inaa jaraitꞌee. Wãara mɨ pɨ chãure pada Elimélec ëreerã mĩda, awaraa ëreerã mɨ kꞌãyaara kꞌaitꞌaara paraa. 13Idi pꞌãrikꞌua nama béeji. Nu mɨ wãitꞌee ma eperã ome pedeede. Irua oo kꞌinia bɨ pɨrã Tachi Akꞌõre ũraade jara bɨkꞌa oomerã chi ëreerã pari; pia jaraitꞌeera pɨ ome miakꞌãi kꞌinia bɨ pɨrã, mãgara mãga ooipia bɨ. Mamĩda irua mãga oo kꞌinia–e pɨrã, Tachi Akꞌõre ichita chokꞌai bapari kꞌĩrapite mɨa juraa bɨ mɨta pɨ ome miakꞌãiitꞌee. Ɨ̃rá kꞌãipáde aji, ɨ̃daaru misa.

14Rut mama kꞌãi beeji Booz bɨɨrɨ ikꞌaawa. Aɨ norema taujaaweda pꞌirabaiji wãitꞌee, aɨ naaweda Boozpa jarada perã: “Apidaapa kꞌawadaikꞌaraa bɨda aji, wẽra nama kꞌãi bada.”

15Rut wãitꞌee pakꞌãri, Boozpa mãgaji:

—Pɨchi ɨ̃rɨpema pꞌaru ẽra atapꞌeda, ewatꞌɨpáde aji.

Rutpa ma pꞌaru ewatꞌɨkꞌãri, aɨde Boozpa cebada tau veinte kilos pꞌe bɨji mãikꞌaapa kꞌaripaji Rutpa ãpꞌa ateemerã. Mãgá Rut pꞌuurudee wãji.

16Temaa panakꞌãri, Noemipa iidiji:

—Kꞌau, ¿sãga wãjima? aji.

Mãpai Rutpa nepɨrɨji Boozpa ichimaa pia ooda. 17Ma awara mãgaji:

—Mɨmaa na cebada waibɨa teeji mãikꞌaapa mãgaji: “Pɨ pꞌãkꞌõremaa chikꞌo wẽe wãnaapáde” aji.

18Mãpai Noemipa mãgaji:

—Ɨ̃rá nɨdáma kꞌawaadaitꞌee sãga uchiai. Iru ɨ̃i–e paitꞌee ma ëreerã kꞌaitꞌaara bɨ ome pedee–emaa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index