Search form

Marka 5

Yéesu wëkíꞌta haꞌ-raɓ ga Gerasaa

(Mëccëe 8: 28-34; Lúkkaa 8: 26-39)

1Ɓa leꞌꞌa tewisaa giiyaa Gëlílée wíinoowaa, ga kúlkaa Gerasaa+ . 2Yéesu yaa yoosuk ga loocaa, laakka ɓaa raɓ am, meyohha ga ɗuuƴ loycaa+ , yaa gúꞌɗukohhi. 3Ya dëkee ga loycaa ee ken mínsiséeríiri kipok, luu enee na ceen. 4Leekleek ya jëengíseera kotcaa, yahcaa poku na ceen, wayee ya gúꞌ ceencaa, ya weel jéeŋcaa. Ken laakéeríi dooli kiꞌammbi. 5Wekoo nohoo, ya enee ga ɗuuƴ loycaa na ga jaŋjaŋcaa; ya weleluki, ya gaañi hafci na atoh.

6Daa ya séenee Yéesu, ya yaa fool, ya ƴíꞌꞌa ga fíkíici, 7-8Yéesu woꞌꞌari an:

- Hel wibóníꞌ, meyohaa ga ɓii!

Ɓaa ennda ga kifiip didóolíꞌ an:

- Yéesu, fu naroo ya, fu Kowukii Kooh yii ga ɗookaa-ɗookɗa? Mi yii kíimmbaa ga teekii Kooh, kaa tummboo iñaa meskin!

9Yéesu meekissari an:

- Fu teeku na?

Ɓaa taassa an:

- Mi teeku coogeel, ndaga ɗí yewinin.

10Helaa wibóníꞌwaa kíimee Yéesu doonaa ya meƴdohoori ga kúlkaa.

11Lakanaa laakin yop-mbaam-parki+ wiyaak waa na kiníiru ga ɓak jaŋjagaa. 12Raɓcaa kíimmba Yéesu an:

- Ëewdohaaríi ga mbaamcii, fu ekkíi gaɓa!

13Ya onndaɓa iñaama. Raɓcaa meyussa ga ɓaa, aasussa ga mbaamcaa; yopaa írkísukka tëgël-tëgëlaa, keennda ga giiyaa: mbaamcaa leꞌin ɓijúnni-kanak, muurussa ga giiyaa.

14Níirohcaagaɓa núpussa, ɓa woꞌneera iñaa hewɗa ga teeraa na dëkcaa cíinoo. Ɓuwaa ɓaa hay kimalak iñaa hewɗa. 15Ɓa hayya bi ga Yéesu, ɓa hotta haꞌ-rawaa ɓayee coogeelaaɗa yugin, ekkin kúltí, taammba na sagaagari. Ɓa dalla kiniik. 16Ɓuwaa maasohsee iñaa dalee haꞌ-rawaa na mbaamcaaɗa, ɓéestírussaɓa iñaa laakeeɗa. 17Waa ennda ɗa, ɓuwaa dalla kikíim Yéesu ya meyoh gohaagaɓa.

18Daa Yéesu en na kiꞌaas loocaa, ɓaa raɓcaa abeeɗa kíimmbari ya onndi kites nari. 19Yéesu onndiirika, wayee woꞌꞌari an:

- Ɓoƴkaa kaanfu, ga ɓu-kaanfu, fu ɓéestíꞌɓa tóoh iñii Haꞌmudii tumiꞌtaa ga yërmaandii ya laak garaaɗa!

20Ɓaa kaꞌta, dalla kiyéegaloh ga gohaa «Teerucaa cidaaŋkaahcaa+ » iñaa Yéesu tumɗeeri tóohɗa; ee ɓuwaa ɓéeɓɓa jaahliꞌussa ga.

Yéesu wëkíꞌta ɓeti, mílísiꞌta kowukaa Yayros

(Mëccëe 9: 18-26; Lúkkaa 8: 40-56)

21Daa Yéesu soofisee na looci ga tewisaa wíinoowaa, mbooloo wiyaak nëgírukohha ga yahaaci, ga daa ya enee ga tewisaaɗa. 22Laakka ɓoꞌ, bok ga ɓuwaa kuliyuk ga jaangu-yaawúuraa, ee teeku Yayros; daa ya hot Yéesu hen, ya ƴíꞌꞌa ga kotcaagari. 23Ya yaa kíimmbi an:

- Kowukaagoo kiɓetikaa kiƴínkaa kaa ƴah kilëehɗuk; hay tíkaari yahciigaraa doonaa ya wak ee ya pes!

24Yéesu yaa ƴah nari. Ee ɓoꞌ ɓiyewin ɓaa taabukki, ɓaa ñaak ga ɗookci.

25Daama nak, laakeera ɓetifaa daanee kimeƴdoh ñíf rek, iñaa leꞌin tíkíis tidaaŋkaah na tanak. 26Ya sodeera lool ga yah payoh ɓiyewin ee iñaa ya laakeeɗa tóoh eemmba ga, wayee onndiiri kitani; hanaa kay ya ɓaatee kikeen. 27Daa ya kelohee loo Yéesu, ya aassa ga mbooloomaa, ga fenooci, ya leꞌꞌa ga kúltífaagari, 28Ndaga ya woꞌee ga ɗuuƴci an: «Binaa mi mínee kileꞌ rek ga kúltíciigarinaa, mi hay kiwak.» 29Ga ɗekataama ñífaa íissa kimeƴ gari, ee ya yéeŋnga ga faanci an ya wakin. 30Yéesu dalla kiyéeŋ ga hafci an laakin doolaa meyoh gari. Ya móoñsúkka ga leeloo mbooloomaa, meekisohha an:

- Ɓii leꞌ ga kúltíciigoo ɓa?

31Tëelíbéecaagari woꞌussari an:

- Fu hot ga dii mbooloomii ñaak ga ɗookfuɗa, an fu woꞌ an: Ɓii leꞌ garoo ɓa?

32Wayee Yéesu yaa malak iñaa wíilliɗa, kihot ɓaa tumee iñaamaɗa. 33Ɓetifaa tíitta bi yaa saak, ndaga ya ínohin iñaa daleeriɗa. Ya hayya, keennda ga kotcaa Yéesu, woꞌꞌari kayohfaa tóoh. 34Yéesu woꞌꞌari an:

- Jowu, ngëmumgaraa wëkɗinndaa. Karaa na jam ee wakaa ga iñum mesikkaaɗa.

35Lak Yéesu yaa lís kiwoꞌ fodaama, ɓiɓoꞌ meyohussa kaan ɓaa kuliyuk ga jaangu-yaawúuraaɗa, kiwoꞌꞌi an:

- Kowukaagaraa kaanin. Iñii fu ƴah Jëgírohii kisonlukohis gaɗa ya?

36Daa Yéesu kelohee woꞌeenaagaɓa, woꞌꞌa ɓaa kuliyuk ga jaangu-yaawúuraaɗa an:

- Kaa niik dara, gëmaa hen rek!

37Ya tookkii ken taam nari, enndii Peeꞌ, na Saak na Saŋ, këmëeŋkícinaa. 38Ɓa leꞌ kaan Yayros hen, Yéesu hotta an coowaa yakin, ee ɓuwaa ɓaa looyoh, ɓaa fiipoh didóolíꞌ. 39Ya aassa, woꞌꞌaɓa an:

- Coowiigarúu wa yak na ɗa? Ɗú looyoh ya? Oomaanii kaanndii, en na kineeh.

40Ɓa ɓaa ciiɓsukki. Waa ennda ɗa, ya méyíꞌtaɓa tóoh ga fooh, ee ya ɓayya paam oomaanaa na eeci na ɓuwaa ɓenseeriɗa. Ya aassa ga daa oomaanaa enoheeɗa. 41Ya ammba oomaanaa ga yahaa, ya woꞌꞌa an:

- Talita kúm! (Wërí en: «Kuꞌoomaa-jowu, mi woꞌꞌaa, kolka!»)

42Kuꞌoomaa-jowukaa dalla kikoluk, ja laakee tíkíis tidaaŋkaah na tanak. Ja jaa tíin. Ɓuwaa jaahliꞌussa lool ga iñaama. 43Yéesu ɗíŋngaɓa na woꞌeen ciyëgísíꞌ an ken jomooka kiyéeŋ. Lëehíꞌta ya woꞌꞌa an kuꞌoomaakaa onsat ñamah.

Hewhewii winéwí'wii Kooh Kifiiliimunkii ki'askii

© Wycliffe Bible Translators, Inc. All rights reserved.

More Info | Version Index